Аҟәа. Ԥхынгәымза 13, 2024 шықәса. Аԥсныпресс. Ақалақь Амшиира Очамчыра азгәаҭара иалагеит ақалақь аԥшаҳәа аҿы. Араҟа имҩаԥысуаз ахәаахәҭра-цәыргақәҵа аҿы ареспублика арегионқәа зегьы рҟынтәи анапҟазацәеи аҭыжьыҩцәеи еиқәшәеит.

Ицәыргақәҵахеит амҿы, аиха, уҳәа аматериалқәа ирылху еиуеиԥшым амаҭәарқәа, аҽырхиагақәа, асахьақәа, абзазараҿы рхы иадырхәо еиуеиԥшым амаҭәарқәа, уҳәа напыла иҟаҵоу егьырҭ аусумҭақәа.  Ари ацәыргақәҵа адгылара арҭеит Очамчыра ақалақь иалҵыз еицырдыруа асахьаҭыхыҩцәа: Варис Тамеев, Асида Аҳәба, Беслан Воуба.

Очамчыра араион ақыҭақәа ахәҭакахьала раалыҵ цәырыргеит: аԥсуа чаи, ахшхарҵәи акәаци ирылху афатә аалыҵқәа, ахаа-мыхакәа, ашәыр, ацха, арыжәтәи ашәырӡқәеи.

Игәырӷьаху аныҳәа агәалаҟазаара еиҳагьы ишьҭнахуан ана-ара игоз амузыка абжьы –  ансамбль «Ерцахә» артистцәа аԥсуа жәлар рашәақәа нарыгӡон. Ақалақь ауааԥсыреи асасцәеи еибаныҳәон, аныҳәа аиҿкаара аганахьала ргәаанагарақәеи уи ирызцәынагаз рцәаныррақәеи еибырҳәон.

Очамчыра араион ахада Беслан Бигәаа асас даӷьқәа  – Удмуртиеи Приднестровиеи рҟынтәи аҳәаанырцәтәи аделегациақәа рхаҭарнакцәеи Очамчыра араион ақыҭақәа рҟынтәи ахаҭарнакцәеи еибаирдырит.

Аҟәа. Ԥхынгәымза 13, 2024 шықәса. Аԥсныпресс. Аҟәа ақалақь аҿы ихыркәшахеит Жәларбжьаратәи ашахматтә турнир «Аҟәа Оpen 2024» аҩбатәи амш. Иахьа атурнир рхы аладырхәит  13 шықәса рҟынӡа зхыҵуа 40-ҩык инарзынаԥшуа ашахматистцәа, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы аофициалтә саит.

Актәи аҭыԥқәа ааныркылеит Кемаль Тос-оглы (ақ.Гагра), Софииа Кособокова (ақ.Красноиарск). Араӡнытә аԥхьахә ргеит Арсени Егоров (ақ.Пицунда), Полина Марченко (ақ. Аҟәа). Ахԥатәи аҭыԥқәа ааныркылеит Дамир Адлеиба (ақ. Аҟәа), Мирра Смыр (ақ. Афон Ҿыц).

Аҟәа. Ԥхынгәымза 13, 2024 шықәса. Аԥсныпресс. Очамчыра араион ахь иусуратә ныҟәараан Аҳәынҭқарра Ахада Кәтол ақыҭа даҭааит. Абри азы адырра ҟанаҵоит Аҳәынҭқарра Ахада ипресс-маҵзура.

Аҳәынҭқарра Ахада аҳәыра зхиааз астадион дахәаԥшны ианиба ашьҭахь, уи аиҭашьақәыргыларазы аԥара шырзауижьуа атәы иҳәеит. 

«Кәтолтәи ашьапылампыласратә клуб «Бзана» аспорттә еицлабрақәа зегьы раан алҵшәа бзиақәа аанарԥшуеит аҟнытә астадион бзиа амазарц ақәнагоуп», - ҳәа иҳәеит Аслан Бжьаниа.

Аслан Бжьаниа Кәтол ақыҭа Администрациа ахада Геннади Ҵулаиа аиҭашьақәыргыларатә аусурақәа рымҩаԥгаразы иаҭаху аԥаратә хархәагақәа ҽааны абиуџьет алаҵаразы апроект-харџьынҵатә документациа азирхиарц  идиҵеит. 

Аҟәа. Ԥхынгәымза 12, 2024 шықәса. Аԥсныпресс. Урыстәыла Аҩныҵҟатәи аусқәа Рмнистрра Краснодартәи Ауниверситет аҿы алеитенантцәа роушьҭра мҩаԥысит. Сынтәа ари ауниверситет иоушьҭымҭацәахеит 493-ҩык, урҭ рахьынтә  11-ҩык Ареспублика Аԥсны аҟынтәи акурсантцәа роуп, ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.

Аныҳәатә церемониа даҭааит Ареспублика Аԥсны аҩныҵҟатәи аусқәа рминистр, аинрал-маиор Роберт Киут. Уи дицын уи ихаҭыԥуаҩ - амилициа  аполковник Рашь Ҵәыџьба.

Амилициа алеитенант ҿарацәа Аԥсны азинхьчаратә усбарҭақәа русзуҩцәа рхыԥхьаӡара иацлоит. Хара имгакәа аушьҭымҭацәа еиуеиԥшым азанааҭқәа рыла рмаҵуратә уалԥшьақәа рынагӡара иалагоит.

Аушьҭымҭацәа дрыдныҳәало, Аԥсны аҩныҵҟатәи аусқәа рминистр Роберт Киут урҭ раԥхьаҟа ҭакԥхықәрала инарыгӡараны иҟоу Аԥсадгьыл амаҵзура иадҳәалоу аинтерес зҵоу иуадаҩу амҩа рзыԥшуп ҳәа иазгәеиҭеит. 

Аҟәа. Ԥхынгәымза 13, 2024 шықәса. Аԥсныпресс. Очамчыра ақалақь иахьа 2524 шықәса ахыҵуеит.

Хыԥхьаӡара рацәала аусмҩаԥгатәқәа азԥхьагәаҭоуп иахьа Очамчыра ақалақь аҿы. Аиҿкааҩцәа иалырхит аплошьадкақәа хԥа.

Актәи  - ари аԥшаҳәа Хада ауп. Араҟа имҩаԥгахоит ақыҭанхамҩатә цәыргақәҵеи Очамчыра араион аҿы инхо анапҟазацәа русумҭақәа рцәыргақәҵеи, анаҩс имҩаԥысуеит анардқәа рзы иаарту атурнир. Уи рхы аладырхәыр ҟалоит изҭаху зегьы.

Аҩбатәи алокациа – ари апарк Хада ауп. Араҟа  асааҭ 16:00 инаркны  18:00 рҟынӡа ахәыҷқәа рзы арлахҿыхратә усмҩаԥгатәқәа  азԥхьагәаҭоуп. Апрограмма аҿы иҟоуп: бзиа ирбо алакәқәа, амультфильмқәа рфырхацәа рԥылара, аквестқәа, арлахҿыхратә қьаадтә шоу, афокусқәа, ашәахтә шоу, уҳәа убас ирацәаны.

Аҟәа. Ԥхынгәымза 12, 2024 шықәса. Аԥсныпресс.  Жәларбжьаратәи ашахматтә турнир «Аҟәа Open 2024» актәи амш азы еицлабуан  7 – 9 шықәса зхыҵуаз ахәыҷқәа. Зынӡа иааизакны  урҭ рхыԥхьаӡара  72-ҩык рҟынӡа инаӡон.

7 шықәса зхыҵуа ақәратә категориа иаҵанакуа аҷкәынцәа рыбжьара аиааира ргеит: Мосикиан Георги (Шәача), Агрба Еснаҭ (Аҟәа), Антонов Никита (Ростов-на-Дону);

Аӡӷабцәа рыбжьара: Гәыргәылиа Алеқсандра (Аҟәа), Хонӡиа Саломеа (Аҟәа), Шамба Софиа (Аҟәа).

9 шықәса зхыҵуа ақәратә категориа иаҵанакуа аҷкәынцәа рыбжьара аиааира ргеит: Хьынҭәба Глеб (Гәдоуҭа), Паравиан Атом (Аҟәа), Гелениӡе Сандро (Москва);

Аӡӷабцәа рыбжьара: Агрба Амира (Гәдоуҭа), Гәылариа Емили (Гәдоуҭа), Ԥалаванӡиа Анна (Аҟәа).

Аҟәа. Ԥхынгәымза 12, 2024 шықәса. Аԥсныпресс. Аԥсны аԥыза-министр Алеқсандр Анқәаб аԥыза-министр ихаҭыԥуаҩ, афинансқәа рминистр Владимир Делба, агәабзиарахьчара аминистр Едуард Быҭәба, аџьынџьуаа рырхынҳәра азы Аҳәынҭқарратә Еилакы ахантәаҩы Вадим Ҳаразиа, арепатриациа Афонд анагӡаратә директор ихаҭыԥуаҩ  Асҭамыр Џьынџьал алархәны аусуратә еилацәажәара мҩаԥигеит.

Аиԥылара аҿы ахшаара змам аҭаацәа рыцхырааразы ацхыраагӡатә хшарауратә  технологиа (ЭКО) апроцедурақәа рынагӡареи иарбоу ахықәкқәа рзы арепатриациа Афонд аԥаратә хархәагақәа рхархәареи  иадҳәалоу азҵаарақәа ирылацәажәеит.

Аҳәынҭқарра уажәадагьы ас еиԥш иҟоу аҭаацәа амедицинатә цхыраара рынаҭон, уажәы аԥыза-министр иаԥшьгарала ахықәкытә программа аԥҵара азы азҵаара ықәгылоуп.

Алеқсандр Анқәаб ари даара аҵак ду змоу темоуп, уи анагӡара азы арепатриациа  Афонд аԥаратә хархәагақәа рхархәара алыршатәуп ҳәа иазгәеиҭеит. Вадим Ҳаразиеи Асҭамыр Џьынџьали ари аԥшьгара иадгылеит.

Аҟәа. Ԥхынгәымза 12, 2024 шықәса. Аԥсныпресс. Аԥсны Аҳәынҭқарратә шәарҭадара Амаҵзура аусзуҩцәеи Урыстәыла Афедералтә шәарҭадара Амаҵзура Аҳәаахьчаратә Усбарҭа аусзуҩцәеи 210-ҩык аҳәаахьчаратә закәанԥҵара еилазгаз ааныркылеит.  

Иаанкылаз ахаҿқәа Аԥсны Аҳәынҭқарра Административтә Зинеилагарақәа Рзакәанеидкыла ахәҭаҷ  190 «Аҳәаахьчаратә зона аҿы аҳәаахьчаратә режим аилагара»; Аԥсны Аҳәынҭқарра Административтә Зинеилагарақәа Рзакәанеидкыла ахәҭаҷ 190.1 «Ареспублика Аԥсны аҳәынҭқарратә ҳәаа арежим аилагара»; Аԥсны Аҳәынҭқарра Административтә Зинеилагарақәа Рзакәанеидкыла ахәҭаҷ 190.2 «Атерриториалтә мшыни Ареспублика Аԥсны аҩныҵҟатәи амшынтә ҵакыреи рҿы аҳәаахьчаратә режим аилагара» инарықәыршәаны иаанкылаз атәылауаа зегьы административтә ҭаԥхықәра иақәыршәоуп.  

Аҟәа. Ԥхынгәымза 12, 2024 шықәса. Аԥсныпресс. Амилаҭтә сахьатә галереиа ахыбра актәи аихагыла аиҭашьақәыгылара ҩымз рыҩныҵҟа ихыркәшахоит.

«Ҳара ахыбра ахыб ықәҵаны ҳалгахьеит. Ажәытә хыб шьаҭаныла иқәган, уи амыцхәрас аҿыц ҟаҵоуп. Ахыбра актәи аихагыла аҩныҵҟа иргылоу аҩкаагатә ҭыӡқәа, урҭ рыбжьара ауадақәа ҟаҵахоит, абетон ықәырҭәаахоит. Аҵыхәтәаны ҳара аԥенџьырқәа аҿаҳҵоит.  

Уажәы ахыбра ахаҿратә ган аԥслымӡкылҟьатә усдулара мҩаԥысуеит.  Ҳара иазԥхьагәаҭаны иҳамоуп катәи аихагыла 1,5-2 мыз рыла ахархәарахь рыҭара», - ҳәа Аԥсныпресс акоррспондент диҿцәажәо  еиҭеиҳәеит анардкыларатә еиҿкаара «Строймонтаж-2» адиректор Рустам Цәеиба. 

Аҟәа. Ԥхынгәымза 12, 2024 шықәса. Аԥсныпресс. Ҭҟәарчал ақалақь аҩ-хәҭак еимаздо амардуан шьаҭанкыла аиҭашьақәыргылара иалагеит.  Уи ргылан 1961 шықәса рзы, иара аҩ-раионк рыбжьара еиҳа икьаҿу ашьаҟамҩатә маршрутны иҟоуп. Уи ауааԥсыра ақалақь аҩадатәи ахәҭа аҿы иҟоу административтә усбарҭақәа рҟынӡа анаӡаразы активла рхы иадырхәоит, атуристцәа уи ауреи шамахамзар џьара иуԥымло аԥшреи аднаԥхьалоит, активла аԥсҭазаашьа алызхуа уи аспорт ала аҽазыҟаҵаразы рхы иадырхәуеит.

Ахархәара ашықәсқәа ирылагӡаны ари амардуан акыр иқәсит, џьара-џьарагьы амашәыр ахылҿиаара азы ашәарҭара аҵаны иҟалеит. Убри аҟнытә аҭыԥантәи анапхгара уи шьаҭанкыла аиҭашьақәыргыларазы аӡбамҭа рыдыркылеит.   Аҭыԥантәи абиуџьет аҟынтәи зфинансыркра мҩаԥысуа ари апроект анагӡара мҩаԥнагоит Зҭакԥхықәра Ҳәаақәҵоу Аилазаара  «Союз-W». Уи анапхгара аиҭоит Гьаргь Харчлаа.