Аҟәа. Жьҭаарамза 21, 2022 шықәса. Аԥсныпресс. Иахьа Аԥсны адәныҟатәи аусқәа Рминистрра Амедиацентр аҿы аконкурс «Аԥсны агәадура – 2022ш.» аҿы хҩык аиааира згаз алкаахеит.

Актәи аҭыԥ ааникылеит Валери Џьынџьал. Уи ипроект ашколхәыҷқәа рыбжьара ихадоу амедицинатә дыррақәа рыларҵәара иазкын. Аҩбатәи аҭыԥ ааникылеит – Гал араион ашәахтә инспекциа аусзуҩ Лев Буава. Уи аҳәынҭқарратә усбарҭақәа рҿы аусшәҟәқәа реикәыршара ацифровизациа иазкыз апроект адгалара мҩаԥигеит. Ахԥатәи аҭыԥ аҿы дгылоуп – Аԥсны иҟоу Урыстәыла аус ацура Ахаҭарнакра аусзуҩ Руслана Гергедаа. Уи лыпроект аҿартә политика аҿиареи анагӡареи иазкуп.

Аконкурс аҿы аиааира згаз аплатформа «Аԥсны аԥеиԥш» ашьаҭала аԥышәахысреи азанааҭтә дырра аҩаӡара ашьҭыхра апрограммақәеи рхысра аҿы ацхыраареи адгылареи рыҭахоит.

Аконкурстә комиссиа аилазаара иалан:  Аԥсны ахәыҷқәа рзинқәа рыхьчаразы Азинмчы змоу, афонд «Ашана» адиректор Мактина Џьынџьал, Аԥсны акультура зҽаԥсазтәыз аусзуҩ, асахьаҭыхыҩ Ныгәзар Логәуа, атәыла Анапхгара ԥыхьатәи аԥыза-министр ихаҭыԥуаҩ Алеқсандр Страничкин, Ауаажәларратә Палата алахәыла, Аԥсны Апарламент ԥыхьатәи Аиҳабы Сократ Џьынџьал.

Аҟәа. Жьҭаарамза 21, 2022 шықәса. Аԥсныпресс.  Атәылауаҩратә хьчара аобиектқәа рҿы иҟоу аҭагылазаашьа иалацәажәеит иахьа, жьҭаарамза  20 рзы имҩаԥысыз Аҟәа ақалақьтә Еизара аилатәара, ҳәа адырра ҟанаҵоит Аҟәа ақалақьтә Еизара апресс-маҵзура.  

Аилатәара рхы аладырхәит атәылахьчара Аминистрра ахаҭарнакцәа – аминистр иабжьгаҩ, аинрал-маиор Илиа Гамсаниеи акадрқәа русбарҭа анапхгаҩы, амаиор Ҭемыр Кәпалбеи, Иҷыдоу аҭагылазаашьақәа Рминистрра ахаҭарнакцәа – атәылауаҩратә хьчара аҟәша анапхгаҩы Маврики Амҷбеи аҳҭнықалақь абылрацәыхьчаратә отриад аиҳабы Ҭемыр Кәыҵниа, иара убас ақалақьтә Усбарҭа анапхгаҩцәа – Зураб Кобахьиа, Алеқсеи Багаҭелиа, Асҭамыр Матуа, Алхас Кәыҵниеи  Едуард Хашбеи. 

Адепутатцәеи ааԥхьара змаз асасцәеи атәылауаҩратә хьчара аобиектқәа рхыԥхьаӡареи урҭ рҭагылазаашьеи ирыдҳәалоу аинформациа еимырдеит, зыԥшра ҟамҵакәа иӡбатәу азҵаарақәа жәпакы ирылацәажәеит.

Аҟәа. Жьҭаарамза 21, 2022 шықәса. Аԥсныпресс. Еиду Амилаҭқәа Реиҿкаара Ахәыҷтәы Фонд (ЮНИСЕФ) Аҟәатәи аофис ацхыраарала аҟәатәи абжьаратәи ашколқәа ҩба – №6 ; №15 рҿы ӡыла аиқәыршәареи асанитар-гигиенатә ҭагылазаашьа аиӷьтәреи ирызкны  ихацыркыз аиҭашьақәыргыларатә усурақәа хыркәшахеит.  Аиҭашьақәыргыларатә усурақәа аҿиареи аусеицуреи рзы Швеицариатәи агентра афинанстә цхыраарала Еиду Амилаҭқәа Реиҿкаара Ахәыҷтәы Фонд (ЮНИСЕФ) аҟәатәи абжьаратәи ашколқәа рҿы асанитар-гигиенатә ҭагылазаашьақәа реиӷьтәра азы Апрограмма аҳәаақәа ирҭагӡаны имҩаԥысуан.

Аҟәа. Жьҭаарамза 20, 2022 шықәса. Аԥсныпресс. 2022 шықәса жәымз ирылагӡаны Аԥсны аҳәынҭқарратә шәарҭадара Амаҵзуреи Урыстәылатәи Афедерациа афедералтә шәарҭадара Амаҵзура Аҳәаахьчара Аусбарҭеи рысзуҩцәа зықь-ҩык инареиҳаны Аԥсны Аҳәынҭқарра аҳәаахьчаратә закәанԥҵара еилазгаз ааныркылеит, ҳәа адырра ҟанаҵоит Аԥсны аҳәынҭқарратә шәарҭадара Амаҵзура асаит.

«Аҳәаахьчаратә зана аҿы аҳәаахьчаратә режим аилагара» азы Аԥсны Аҳәынҭқарра административтә зинеилагарақәа рзы Азакәаеидкыла ахәҭаҷ 190; «Ареспублика Аԥсны аҳәынҭқарратә ҳәаа арежим аилагара» азы Аԥсны Аҳәынҭқарра административтә зинеилагарақәа рзы Азакәаеидкыла ахәҭаҷ  1901;  «Ареспублика Аԥсны амшынтә ҵакыреи аҩныҵҟатәи аӡытә ҵакыреи рҿы аҳәаахьчаратә режим аилагара» азы Аԥсны Аҳәынҭқарра административтә зинеилагарақәа рзы Азакәанеидкыла ахәҭаҷ 1902 инақәыршәаны, иаанкылоу атәылауаа административтә хьырхәра иақәыршәоуп.

Аҟәа. Жьҭаарамза 20,  2022 шықәса. Аԥсныпресс. Жьҭаарамза 20 рзы Аҟәатәи ақалақьтә Еизара аилатәара аҿы уи ахантәаҩы Иракли Харчлаа ҽҳәараанӡа изинмчы ааныжьра азы арзаҳал адгалара мҩаԥигеит.

Иҟаиҵаз аҳәамҭа аҿы  иара иколлегацәа –ақалақьтә Еизара адепутатцәа аусураҿы  ирҭоз адгылара азы ҭабуп ҳәа реиҳәеит, аилкаарагьы аадырԥшлым ҳәа агәыӷра шимоу иҳәеит.

«Ари сыӡбамҭа ишәа-иза исыдыскылеит, уи акыр зҵазкуа ҭагылазаашьоуп сара сзы. Убри аан сара сдепутаттә уалԥшьа анагӡара иацысҵоит, агәра ганы сыҟоуп аҟәаа ирыхәаша ала аусура сылсыршап ҳәа», - инаҵшьны иазгәеиҭеит Иракли Харчлаа.

Аҟәатәи ақалақьтә Еизара апресс-маҵзура иҟанаҵо адыррақәа рыла, адепутатцәа еицҿакны Иракли Харчлаа иԥхьатәара рыдыркылеит, анаҩс арегламент инақәыршәаны, Аизара ахантәаҩыс аҟаларазы акандидат иқәыргылара мҩаԥысит.

Аҟәа. Жьҭаарамза 20, 2022 шықәса. Аԥсныпресс. Аԥсны аресбилитациа азы аспециалистцәа Рассоциациа И. М. Сеченов ихьӡ зху Актәи Московатәи аҳәынҭқарратә  медицинатә университет ахылаԥшрала  имҩаԥысуаз аспорттә медицинеи ареабилитациеи рзы ХIV Жәларбжьаратәи асимпозиум рхы аладырхәит, ҳәа иаанацҳауеит агәабзиарахьчара Аминистрра.

Асимпозиум традициала ишышьақәгылаз ала, аспорттә медицинеи ареабилитациеи рҿы ицәырҵуа апроблемақәа рыӡбара азы апрофессионалтә еилацажәаразы зыхьӡ нагоу урыстәылатәии аҳәаанырцәтәии аспециалистцәа еиднакылоит. 

Аҟәа. Жьҭаарамза 20, 2022 шықәса. Аԥсныпресс. Аԥсны аԥыза-министр Алеқсандр Анқәаб «Жьҭаарамза-ԥхынҷкәынмза 2022 шықәса рзы Аԥсны Аҳәынҭқарра атәылауаа арратә маҵзура ахь ааԥхьара рыҭара азы» аминистрцәа Реилазаара Ақәҵара №153 инапы аҵаиҩит.

Аҟәа.   Жьҭаарамза 20,  2022 шықәса. Аԥсныпресс. Иахьа еицырдыруа аԥсуа ҵарауаҩ, аҭоурыхҭҵааҩы, аетнограф, алитературадырҩы, аҭоурыхтә наукақәа рдоктор Шьалуа Денис-иԥа Инал-Иԥа (жьҭаарамза 20, 1916ш. — цәыббрамза 22, 1995ш.) иԥсы ҭазҭгьы ихыҵуан 106 шықәса. Шьалуа Денис-иԥа Инал-Иԥа Аԥсны аҭоурыхҭҵаареи аетнографиеи рҿы илагала ахә ашьара уадаҩуп.

Шьалуа  Инал-иԥа Аԥсны еиԥш уи анҭыҵгьы  деицырдыруеит аԥсуаҭҵаареи кавказҭҵаареи аетногенези аԥсуаа рмилаҭтә ҭоурыхи рыҭҵаара аҿы ицәырҵуаз актуалра злоу апроблемақәа ирызку акыр зҵазкуа анаукатә усумҭақәа равтор иаҳасабала.   Аҵарауаҩ иҭҵааратә усумҭа дуқәа рахь иаҵанакуеит: «Аԥсуаа», «Аԥсуаа ретнокультуратә ҭоурых азҵаарақәа», «Атрадициақәеи ҳазҭагылоу аамҭеи», «Саӡаа», «Аԥсуа етикет азы аочеркқәа», уҳәа убас ирацәаны. Шьалуа Инал-иԥа иусумҭақәа анализ аҵаулареи аҵаҵӷәыркреи ахархәара змоу ахыҵхырҭадырратә материал ахкырацәареи рыла жәаҳәарада иалкаахоит.  

Аҵарауаҩ инаукатә интерессқәа рахь иаҵанакуан нарҭаа репос уахь иалаҵаны, абызшәадырра, алитературадырра, аетика, афольклористика еиуеиԥшым аспектқәа.  

Аҟәа. Жьҭаарамза 20, 2022 шықәса. Аԥсныппресс. Атәыла агәабзиарахьчара аминистр Едуард Быҭәба урыстәылатәи атәылауаҩра змоу Аԥсны ауааԥсыра ихымԥадатәиу амедицинатә бгаԥса аҳәаақәа ирҭагӡаны амедицинатә цхыраара рыҭара азҵаарақәа ирызкны инарҭбаау аусуратә еилатәара мҩаԥигеит.

Аусуратә еилатәара рхы аладырхәит аминистр ихаҭыԥуаҩ Саида Делба, ахәышәтәра-профилактикатә ҟәша аиҳабы Баҭал Кациа, ахәышәтәра-профилактикатә ҟәша аспециалист хада Дамеи Кәалӷьы, Аминистрра азиндырҩы Инна Кәыҵниа, иара убас абгаԥсатә медицинатә еиҿкаара ахаҭарнак.

Аминистр иарбоу ахырхарҭала имҩаԥысуа аусура азы адырра ирҭеит. Уажәазы ихымԥадатәиу амедицинатә бгаԥса азы аполис рымоуп  50 000-ҩык инареиҳаны ареспублика ауааԥсыра.  

Едуард Быҭәба Аԥсны ауааԥсыра ихымԥадатәиу амедицинатә бгаԥса аполис иазԥхьагәанаҭо иахәҭоу амедицинатә цхыраара ианаамҭоу инагӡаны ироуртә еиԥш урыстәылатәи амедицинатә усбарҭақәа аус рыцура аҩаӡара аиӷьтәразы анапынҵақәа ҟаиҵеит.

Аҟәа. Жьҭаарамза 20, 2022 шықәса. Аԥсныпресс. Аиҿкааҩцәа рааԥхьарала Аҟәа ақалақь ахада Беслан Ешба ихы алаирхәуеит Жәларбжьаратәи аекспорттә форум «Иҟаҵоуп Урыстәыла», ҳәа адырра ҟанаҵоит Аҟәа ақалақь Ахадара апресс-маҵзура.

Афорум апленартә еилатәара аҿы алахәылаҩцәа дрыдныҳәалеит Урыстәылатәи Афедерациа Анапхгара ахантәаҩы  Михаил Мишустин.