Аҟәа. Лаҵарамза 4,  2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа I  Кавказтәи аинвестициатә цәыргақәҵа–  «АКАО аекономикатә лшара. Амакрорегион аҿиараҟны аинвестициақәа рроль» апленартә еилатәара ихы алаирхәит, ҳәа адырра ҟанаҵоит Аҳәынҭқарра Ахада ипресс-маҵзура.

Аапленартә еилатәара аҿы ажәахәқәа ҟаҵаны иқәгылеит Урыстәылатәи Афедерациа Аиҳабыра Ахантәаҩы ихаҭыԥуаҩ Алеқсандр Новак, Урыстәылатәи Афедерациа аекономикатә ҿиара аминистр Мақсим Решетников,  Акционертә Еилазаара "Н.И. Ткачиов  ихьӡ зху агрокомплекс афирма" адиректорцәа рхеилак ахантәаҩы  Алеқсандр Ткачиов, ИАО "Ааглыхеимадарабанк" ахантәаҩы Пиотр Фрадков,  Акционертә Еилазаара " УА. Аҩны" адиректор хада Витали Мутко, уҳәа убас аӡәырҩы.

Аҟәа. Лаҵарамза 4, 2023 шықәса. Аԥсныпресс. Аминералтә ӡқәа рыҟны I Кавказтәи аинвестициатә цәыргақәҵа зхы алазырхәуа Аԥсны Аҳәынҭқарра Ахада Аслан Бжьаниа лаҵарамза 3 рзы Урыстәылатәи Афедерациа аспорт аминистр ихаҭыԥуаҩ Одес Баисултанов диԥылеит.

Аԥсны Аҳәынҭқарра Ахада ипресс-маҵзура иҟанаҵо адыррақәа рыла,  Аслан Бжьаниеи Одес Баисултанови аспорт аусхк ала аусеицуразы азҵаарақәа ирылацәажәеит, ҷыдала, Аԥсны ашьапылампыл асразы аспорт аҿиара азҵаарақәа жәпакы.

Аҟәа. Лаҵарамза 4, 2023 шықәса. Аԥсныпресс.  Лаҵарамза 6, асааҭ 11:00 рзы, В.Арӡынба ихьӡ зху Аҳәынҭқарратә Арратә Ахьӡ-Аԥша амузеи Аԥсны иҟоу Урыстәыла аус ацура Ахаҭарнакреи Аԥсны Аҳәынҭқарра Ахада Иусбарҭа, атәылахьчара Аминистрра, Аԥсны иҟоу Урыстәыла Ацҳаражәҳәарҭа рыцхыраарала имҩаԥгахоит жәларбжьаратәи акциа «Агәалашәара Амца».

Акциа аҳәаақәа ирҭагӡаны урыстәылатәи аган ала аԥснытәи аган иамадахоит Александратәи абаҳча аҿы Кремльтәи аҭӡы ааигәара иаку Имыцәо амца ахәҭаҷқәа.

Идырым Асолдаҭ иҳаҭгәын — Александратәи абаҳча аҿы Кремльтәи аҭӡы ааигәара иҟоу амемориалтә архитектуратә ансамбль ауп. 1997 шықәса инаркны Идырым асолдаҭ иҳаҭгәын  аԥхьа ишьақәгылоуп Аԥыԥшырҭа № 1. Ари амонумент Урыстәыла акультуратә ҭынха аобиект астатус аҭоуп, иара  убас арратә ахьӡ-аԥша Амилаҭзегьтәи амемориал астатус ахҵоуп.

Ҭагалан, 1966  шықәсазы Асовет Еидгыла Акоммунисттә Партиа Акомитет Хада Кремль аҭӡқәа рааигәара амемориал – Аџьынџьтәылатәи еибашьра Дуӡӡа аҿы иҭахаз афырхацәа ргәалашәара иазкны – Идырым асолдаҭ Иҳаҭгәан аԥҵара азы ажәалагала ҟанаҵеит. Ас еиԥш аԥшьгара Москва амҵан анемец фашисттә архәҭақәа рықәхра  25- шықәса ахыҵра иадҳәалахеит.  

Аҟәа. Лаҵарамза 3, 2023 шықәса. Аԥсныпресс.  Лаҵарамза 30 инаркны рашәарамза 2 аҟынӡа Аԥсны имҩаԥыслоит Аахыҵ Уаԥстәыла акультура Амшқәа, ҳәа адырра ҟанаҵоит Аԥсны акультура Аминистрра апресс-маҵзура.  

Аахыҵ Уаԥстәыла акультура Амшқәа раартра аныҳәатә церемониа мҩаԥгахоит лаҵарамза  31 рзы. Самсон Ҷанба ихьӡ зху Аԥснытәи аҳәынҭқарратә драматә театр аҿы Аахыҵ Уаԥстәыла акультура амшқәа актәи амш азы К.  Хетагуров ихьӡ зху Аахыҵ Уаԥстәыла Аҳәынҭқарратә драматә театр ахәаԥшцәа иднарбоит адраматург Геор Хугаев еихьӡылоу иажәамаана ала иқәыргылоу аспектакль «Ауапа еиқәаҵәа». Ахәаԥшцәа ирызнагахоит гәыкала азыҟазаареи ачарҳәареи абзиабареи ауалԥшьа анагӡареи ирызку аҭоурых. Артистцәа ауаа ртипажқәа аазырԥшуа аԥстәқәа рыԥшра рыманы иқәгылоит.  

Аспектакль мҩаԥгахоит асааҭ 18:00 рзы. Аҩналара хәыда-ԥсадоуп.

Рашәарамза 1 азы Р.Гәымба ихьӡ зху аҳәынҭқарратә филармониа аҿы иқәгылоит Борис Галаев ихьӡ зху Аахыҵ Уаԥстәыла Аҳәынҭқарратә ансамбль «Симд». Уи сынтәа Аахыҵ Уаԥстәыла Ареспублика Аҳәынҭқарратә ансамбль ҳәа ахьӡ ахҵара 85-шықәса аҵра азгәанаҭоит.

Аҟәа. Лаҵарамза 3, 2023 шықәса. Аԥсныпресс. Лаҵарамза 3 рзы Аԥсны иҟоу Урыстәыла аус ацура азы Ахаҭарнакра Аракьычтәи абжьаратәи ашкол 576 шәҟәы ҳамҭа ианаҭеит.

Ашкол ҳамҭас иаиуит аҵара-методикатәи асахьаркыратәи алитературеи арҵагашәҟәқәеи  аматематика, алитература, аурыс бызшәа, афизика рзы аусуратә тетрадқәа, ажәарқәа, аурыс классикцәа рырҿиамҭақәа, ҳәа адырра ҟанаҵоит Аԥсны иҟоу Урыстәыла аус ацура азы Ахаҭарнакра апресс-маҵзура.

Аерманцәа реилазаара ахаҭарнакцәа анапхгаҩы Федотов Дмитри Геннади-иԥа аԥхьа днаргыланы, Ахаҭарнакра анапхгараҭареи аусзуҩцәеи зегьы иҭабуп ҳәа рарҳәеит иҟарҵаз ацхыраара азы,  ас еиԥш агуманитартә акциақәа ареспублика аҵараиурҭақәа рзы иаҵоу аҵакы ахадара атәы азгәарҭеит.

Ас еиԥш агуманитартә акциақәа Аԥсны иҟоу Урыстәыла аус ацура азы Ахаҭарнакра лассы-лассы имҩаԥнагоит.

Аҟәа. Лаҵарамза 3, 2023 шықәса. Аԥсныпресс. Аԥсны иҷыдоу аҭагылазаашьақәа рзы Аминистрра аҟынтәи изаамҭанытәиу агуманитартә цхыраара Аҟәантәи Луганскҟа идәықәҵахеит.

Аԥсны иҷыдоу аҭагылазаашьақәа рминистр Лев Кәыҵниа дызхагыло аԥснытәи аиқәырхаҩцәа Лугансктәи Жәлартә Республика ахь афатә аалыҵқәа, абаҭылкақәа ирҭоу аӡрыжәтә, амаҭәақәа наргоит. Аидара еизыргеит хазхаҭалатәи ауааԥсыреи аиуристтә хаҿқәеи.

Аҟәа. Лаҵарамза 3, 2023 шықәса. Аԥсныпресс. Аԥсны Аҳәынҭқарра Ахада зхадараҿы дыҟоу аԥснытәи аделегациа актәи Кавказтәи аинвестициатә цәыргақәҵа аартра иазку агәырӷьаратә усмҩаԥгатә иалахәын.

Ацәыргақәҵа мҩаԥысуеит Аминералтә ӡқәа рыҟны, ҳәа адырра ҟанаҵоит Аҳәынҭқарра Ахада ипресс-маҵзура.

Ацәыргақәҵа иаҭааит Урыстәылатәи Афедерациа арегионқәа зегьы рҟынтә асасцәа, Нхыҵ-Кавказтәи афедералтә округ ахадацәа.

Ацәыргақәҵа алахәцәеи асасцәеи аԥсшәа реиҳәеит Урыстәылатәи Афедерациа Аиҳабыра Ахантәаҩы ихаҭыԥуаҩ Алеқсандр Новак. Иара иазгәеиҭеит азҿлымҳара азҭо аганқәа злархәу аусмҩаԥгатә амҽхак аҭбаара, иҳәеит Кавказтәи аинвестициатә цәыргақәҵа Ставропольтәи атәылаҿацә ахь аинвестициа адыԥхьалара аимпульс ҿыц шанаҭо.

Аҟәа. Лаҵарамза 3, 2023 шықәса. Аԥсныпресс. Атәыла аԥыза-министр Алеқсандр Анқәаб Аԥсны аҭоурых-культуратә ҭынха ахьчара азы Аҳәынҭқарратә усбарҭа анапхгаҩы Гарри Сангәылиа, ауаажәларратә усзуҩ Белла Аршба, анардкыларатә еиҿкаара ахаҭарнак Русҭам Цәеиба алархәны аиашахаҵаратә культтә хыбрақәа реиқәырхара азҵаарақәа рыла аусуратә еилатәара мҩаԥигеит.

Аҳәынҭқарра Ахада А. Гь. Бжьаниа инапынҵақәа рҳәаақәа ирҭагӡаны имҩаԥысыз аусуратә еилатәара аҿы аҭынха аиқәырхара азы раԥхьатәи ауснагӡатәқәа рымҩаԥгара иазырхоу зыԥшра ҟамҵакәа аҳәынҭқарратә зхьаԥшра иазку аусмҩаԥгатәқәа рынагӡара иалацәажәеит.  Иалацәажәеит раԥхьа иргыланы Бедиатәи аныхабааи Мықәтәи акафедралтә уахәамеи рхыбрақәа рҭагылазаашьа.

Аҟәа. Лаҵарамза 3, 2023 шықәса. Аԥсныпресс. I Кавказтәи аинвестициатә цәыргақәҵа зхы алазырхәуа Аԥсны Аҳәынҭқарра Ахада Аслан Бжьаниа  Урыстәылатәи Афедерациа аԥыза-министр Михаил Мишустин ари атәылаҟа ԥыхьатәи иҭаарақәа ртәы анигәалаиршәа ашьҭахь, Аԥсныҟа ааԥхьара ииҭеит. Абри азы адырра ҟанаҵоит Урыстәыла аинформациатә Маҵзура ТАСС.

Нхыҵ-Кавказтәи афедералтә округ аҿы усуратә ҭаарала иҟоу Михаил Мишустин, ахашаҽны Кавказтәи аинвестициатә цәыргақәҵа аекспозициа даҭааит. Аԥсны астенд аҿаԥхьа ареспублика Ахада диҿцәажәо уи Аԥсны аҭыԥ ԥшӡақәа – аӡиа Риҵа, Афонҿыцтәи аҳаԥы, игәалаиршәеит. Уи арҭ аҭыԥқәа имбеижьҭеи акыр ҵуеит ҳәагьы иазгәеиҭеит.   

Аслан Бжьаниа аӡиа Риҵа, иара убас егьырҭ аҭыԥқәа рҿы асоветтә напхгаҩцәа рҳәынҭқарратә дачақәа еиқәырханы ишыҟоу азгәеиҭеит. Уи урыстәылатәи аԥыза-министр ареспублика аҭааразы ааԥхьара ииҭеит. «Иҭабуп. Аԥсны даара иԥшӡоу,  убла хызхуа тәылоуп», - ҳәа Михаил Мишустин иажәақәа цитатас иаанагоит Урыстәыла аинформациатә Маҵзура ТАСС.

Аԥсны Аҳәынҭқарра Ахада иара убас зынагӡара азԥхьагәаҭоу аперспектива злоу апроектқәа ртәы еиҭеиҳәеит. Аслан Бжьаниеи Михаил Мишустини Аԥсны анагӡаразы иазԥхьагәаҭоу агазыркреи, атуризм аусхк аҟны егьырҭ апроектқәеи ирылацәажәеит.

Аҟәа. Лаҵарамза 3, 2023 шықәса. Аԥсныпресс. Актәи Кавказтәи аинвестициатә цәыргақәҵа «МинводыЭКСПО» аҳәаақәа ирҭаӷӡаны имҩаԥысит Аԥсни Аахыҵ Уаԥстәылеи рхадацәа реиԥылара.

Аԥсны Аҳәынҭқарра Ахада ипресс-маҵзура иҟанаҵо адыррақәа рыла, Аслан Бжьаниа Алан Гаглоев иҭабуп ҳәа еиҳәеит аԥсуа делегациеи Аахыҵ Уаԥстәыла Аԥсны акультура амшқәа раан ахореографиатә коллективқәеи рыдкылара иаҵаз аԥхарразы.

«Иҭабуп идуӡӡаны ҳәа шәасҳәоит иҟашәҵаз адкыларазы. Ас еиԥш иҟоу аимадарақәа ирыцҵатәуп ҳәа сгәы иаанагоит. Ари аҵак ду амоуп. Аҭагылазаашьа схы иархәаны Аԥсныҟа ааԥхьара шәысҭарц сҭахуп. Шәара ианшәзыманшәалоу шәыдкылара ҳазхиоуп», –ҳәа  иҳәеит иара.