«Урыстәылатәи Афедерациа Ахада Дмитри Медведев аҭоурыхтә ҟазшьа змоу Иусԥҟа ала ихацыркыз аполитикатә механизмқәа Ареспублика Аԥсны дарбанызаалак атәылауаҩ иԥсҭазаара ианыԥшит», – ҳәа иазгәеиҭеит Лаша Ашәба.  Иара, Аԥсны Аҳәынҭқарратә Думеи Афедерациа Ахеилаки рҿы Аԥсни Аахыҵ Уаԥстәылеи Рпарламентқәа аҩ-ҳәынҭқаррак рсуверенитети рхьыԥшымреи разхаҵаразы иҟарҵаз ааԥхьара ашьҭахь имҩаԥгаз абжьыҭира аихшьаалақәа  есымша ишыргәалашәало инаҵшьны иазгәеиҭеит. «Ҳара, Константин Иосиф-иԥа, ҩ-республикак рхьыԥшымра азхаҵара азҵаара аҿы хаҭала шәара шәлагала ибзианы иаҳгәалашәоит.  Иҭабуп ҳәа шәаҳҳәоит хаҭала Шәареи шаԥхьа иҟази рыла ишьақәыргылаз атрадициа бзиақәа иахьрыцышәҵо. Ҳара хра злоу алҵшәақәа маҷымкәа иҳамоуп, уи зегьы ҳусеицура иабзоураны иалыршахеит. Агәра ганы сыҟоуп ҳпарламенттә усеицурагьы арҭ хра злоу апроцессқәа рыҿиара иашацхраауа», – ҳәа иҳәеит Апарламент Аиҳабы.

Ахәҭакахьала, Афедерациа Ахеилак ахантәҩы ихаҭыԥуаҩ   Константин Косачиов Аԥсны жәлар рҭоурых аҿы акыр зҵазкуа арыцхә – Аԥсны Аҳәынҭқарра ахьыԥшымреи асуренитети разхаҵара Амш  15-шықәса ахыҵра азгәаҭара иазку аныҳәатә усмҩаԥгатәқәа рылахәхара азы ироуз ааԥхьаразы иҭабуп ҳәа иҳәеит.  «Шәара ишәгәалашәыршәеит Аҳәынҭқарратә Думеи Афедерациа Ахеилаки рҿы усҟан имҩаԥысыз абжьыҭира. Иара еицҿакны азҵаара иақәшаҳаҭны имҩаԥсит. Убасҵәҟьа иахьагьы Урыстәыла Аԥсны Аҳәынҭқарра асуверенитети ахьыԥшымреи адгылара аҭара аганахьала абсолиуттә консенсус шыҟац иаанхоит, ареспублика асоциал-економикатә ҿиара иазку апланқәа рынагӡараҿы аума, аҳәынҭқарра асуверенитети ахьыԥшымреи жәларбжьаратәи азхаҵара аус аҿы аума, ахырхарҭақәа жәпакы рыла адгылареи ацхыраареи рыҟаҵара иазхиоуп», –  ҳәа иҳәеит Контантин Косачиов.

Иара инаҵшьны иазгәеиҭеит ииасхьоу 15 шықәса рыла Урыстәыла еиҳагьы иӷәӷәахеит усҟан Аԥсны жәлар рыла иҟаҵаз ашьаҿа аиашареи аҩ-ҳәынҭқаррак рыбжьара астратегиатә партниорра иаҵоу аперспективареи рзы агәрагара. Контантин Косачиов  ареспублика аҿиара шымҩаԥысуа ахшыҩзышьҭара ду аиҭоит ҳәа иазгәеиҭеит. «Ҳара иаабоит ишәымоу аихьӡарақәа шмаҷым, уи жәаҳәарада ҳаигәырӷьоит.  Аамҭак ала инагӡоу апроектқәа рхыԥхьаӡара ессааира ирызҳауеит. Жәаҳәарада, урҭ 2025 шықәсанӡа Аԥсны асоциал-економикатә ҿиара апрограммеи аинвестициатә программеи рҳәаақәа ирҭагӡаны инагӡоу еиҳа ирацәоуп», –ҳәа иҳәеит Константин Косачиов.  Уи, аҩ-программак рыла абиуџьеттә процесс иҭагӡаны аӡбамҭақәа рыдкылара алыршоуп ҳәа иазгәеиҭеит. Урҭ Афедералтә еизара аҩ-палатак рҿы иахәҭоу апроцедурақәа зегьы ирхысит. Константин Косачиов, дара есымша аратификациа зҭаху аҩганктәи аиқәшаҳаҭрақәа приоритетла рыхәаԥшра шалдыршо азгәеиҭеит. «Ас еиԥш азнеишьа ара Жәлар Реизара-Апарламент аҟынгьы ахархәара шамоу азгәаҳҭеит», – ҳәа иажәа хыркәшо иҳәеит Афедерациа Ахеилак ахантәаҩы ихаҭыԥуаҩ.