Аҟәа. Жәабранмза 19, 2024 шықәса. Аԥсныпресс.  Аҟәа ақалақь аҿы иҟоу Москва Аҩны аҿы Аԥсадгьыл ахьчаҩ Имш иазку акомандатә шахматтә турнир мҩаԥысуеит, ҳәа адырра ҟанаҵоит «Москва Аҩны» апресс-маҵзура.  

Аусмҩаԥгатә еиҿкаахеит Москва Анапхгара, Москва ақалақь жәларбжьаратәи адәныҟаекономикатәи аимадарақәа Рдепартаменти Москватәи аидгьылуаа Рыҩни иҟарҵаз адгылара иабзоураны.

Атурнир зынӡа рхы аладырхәуеит 16 командак:

Аҟәа. Жәабранмза 19, 2024 шықәса. Аԥсныпресс. Аҳәынҭқарра Ахада Ихаҭыԥуаҩ Бадра Гәынба ихантәаҩрала Аԥсны Аҩбатәи Ахада, «Ахьӡ-Аԥша» аорден I аҩаӡара акавалер Сергеи Уасил-иԥа Багаԥшь диижьҭеи  75-шықәса аҵра  иазкны агәалашәаратә усмҩаԥгатәқәа реиҿкаареи рымҩаԥгареи ирызку аҳәынҭқарратә Комиссиа  аилатәара мҩаԥысит ашәахьа, жәабранмза 19 рзы.  

Аилатәара рхы аладырхәит Аҳәынҭқарра Ахада Иусбарҭа анапхгаҩы Абесалом Кәарҷиа, акультура аминистр инапынҵақәа назыгӡо Динара Смыр, Очамчыра араион ахада Беслан Бигәаа, Очамчыра араион Џьгьиарда ақыҭа ахада А.Амҷба, Сергеи Уасил-иԥа Багаԥшь иԥа Зураб Багаԥшь, Аҳәынҭқарра Ахада иԥкаанҵа Аусбарҭа аиҳабы И.Аџьынџьал, уҳәа убас Акомиссиа егьырҭ  алахәылацәагьы.     

Ажәалагалақәа рыхәаԥшраан аӡбамҭақәа рыдыркылеит. Урҭ инарықәыршәаны акультура Аминистрра абарҭ ахыдҵақәа аҭан:

– Сергеи Уасил-иԥа Багаԥшь диижьҭеи  75-шықәса аҵра иазкны хәажәкырамза 4, 2024 шықәса рзы зымҩаԥгара азԥхьагәаҭоу аҳәынҭқарратә усмҩаԥгатәқәа рахь ааԥхьаратә билеҭқәа реиқәыршәара  алыршара;

 – Хәажәкырамза 4, 2024 шықәса, асааҭ  15.00 рзы С.Ҷанба ихьӡ зху Аԥснытәи адраматә театр афоие аҿы Сергеи Уасил-иԥа Багаԥшь игәалашәара иазкны афотоцәыргақәҵа аиҿкааразы ажәалагалақәа реиқәыршәара; 

– Хәажәкырамза 4, 2024 шықәса, асааҭ 16.00 рзы С.Ҷанба ихьӡ зху Аԥснытәи адраматә театр аҿы Сергеи Уасил-иԥа Багаԥшь  диижьҭеи 75-шықәса аҵра иазкны аныҳәатә еилатәара асценари аиқәыршәара;

Аҳәынҭқарратә Комиссиа ала иара убас 2024 шықәсазы Аԥсны ахьыԥшымра жәларбжьаратәи азхаҵара Амш азгәаҭара инамаданы Сергеи Уасил-иԥа Багаԥшь аԥсуа жәлар рмилаҭ-хақәиҭтәратә қәԥара, аҳәынҭқарра аргылара, Аԥсны ахьыԥшымра азхаҵара аҿы инаигӡаз ароль иазкны анаука-практикатә конференциа амҩаԥгарагьы азԥхьагәаҭоуп.  

Аҟәа. Жәабранмза 16, 2024 шықәса. Аԥсныпресс.  Аҳәынҭқарра Ахада Аслан Бжьаниа аҳаҭыртә хьӡқәа ранашьара азы Аусԥҟақәа инапы рыҵаиҩит.

Аҳәынҭқарра Ахада Иусԥҟала «Аԥсны Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихҵоуп Кәарҷиа В. А.

Ахада Кәарҷиа Валери Андреи-иԥа «Аԥсны Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихиҵеит.

«Ажурналистика аус аҟны илшамҭақәеи шықәсарацәалатәи лыҵшәа змоу иусуреи рзы «Аԥсны  Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихҵазааит Кәарҷиа Валери Андреи-иԥа, Аԥсны Ажурналистцәа реидгыла алахәыла, Аҟәатәи Иаарту аинститут аректор», - ҳәа иаҳәоит Аусԥҟа.

 Адокумент иаҵаҩуп 2024 шықәса жәабранмза 16 рзы.

Аҟәа. Жәабранмза 19, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Зарандиа Заур «Ахьӡ-Аԥша» аорден II аҩаӡара ианеишьеит.

Заур Чанҭа-иԥа Зарандиа 1992-1993 шш. рзы Аԥсны Аџьынџьтәылатә еибашьраан илагаламҭа дуи Аԥсны Аҳәынҭқарра ауаажәларра-политикатә ԥсҭазаара активла иҽалархәреи рзы иреиҳау аҳәынҭқарратә ҳамҭа ианашьоуп.

Аусԥҟа иаҵаҩуп 2024 шықәса жәабранмза 15 рзы.

Аҟәа. Жәабранмза 15, 2024 шықәса. Аԥсныпресс. 2023 шықәсазы апрокуратуа аусбарҭақәа русура аихшьаалақәа рыҟаҵара иазкын аԥшьаша, жәабранмза 15 рзы имҩаԥысыз апрокуратура Хада аколлегиа инарҭбаау аусуратә еилатәара, ҳәа адырра ҟанаҵоит Аҳәынҭқарра Ахада ипресс-маҵзура. .

Аилатәара рхы аладырхәит Аҳәынҭқарра Ахада Аслан Бжьаниа, Жәлар Реизара-Апарламент Аиҳабы Лаша Ашәба, Аҳәынҭқарратә шәарҭадара Амаҵзура ахантәаҩы Ҭемыр Ахьиба,Иреиҳаӡоу аӡбарҭа ахантәаҩы Саида Быҭәба, апрокуатуа Хада аусзуҩцәа, Аҟәа ақалақь апрокурор, араионқәа рыпрокурорцәа.

Ажәахә хада ҟаиҵеит Аԥсны Апрокурор Хада Адгәыр Агрба, уи, ҷыдала, дырзааҭгылеит иҳаҩсыз ашықәс азы ареспубликаҟны имҩаԥысызи иаарԥшызи ацәгьоурақәа.

Аслан Бжьаниа аколлегиа аихшьалақәа дрыхцәажәо иазгәеиҭеит: «Аҳәынҭқарраҟны аус зуа зегьы, амчратә хырхарҭақәа зегьы рхықәкы - ҳҳәынҭқарра арӷәӷәароуп, избанзар аҳәынҭқарра- ҳара ҳзеиԥш ҩноуп. Шәара ибзианы ижәдыруеит аҳәынҭқарра зцәыӡыз  ажәларқәа рлахьынҵа шышьақәгылаз. Аҵыхәтәантәи ашықәсқәа рзы адунеи аҟны имҩаԥысуа шьаҭанкылатәи аҟазшьа змоу ахҭысқәа рацәоуп. Адунеи аҟны аибашьрақәа ахьцо  аҭыԥқәа, иаҳҳәозар Ашьха-Ҟарабахтәи Ареспублика, 30 шықәса рыҩныҵҟа ишьақәгылаз, иахьа фактла иҟаӡам. Азҿлымҳара ашәҭарц сҭахуп еиҳа аҵак ду змоу азҵаарақәа, убри аан Апрокуратура Хада аҳәынҭқарра ашьақәыргылараҟны инангӡо ароль ду. Шәара ижәдыруеит, ҳара зегьы ҳшазхарымҵац, ҳара ҳганахьала цәгьашақә зхы мҩаԥызго шыҟоугьы», - иҳәеит Аҳәынҭқарра Ахада, апрокуратура аусзуцәа ас еиԥш иҟоу апроцессқәа ирҿагылар шакәу азгәаҭаны.

Аҟәа. Жәабранмза 19, 2024 шықәса. Аԥсныпресс. Атәыла аԥыза-министр Алеқсандр Анқәаб Китаитәи Жәлартә Демократиатә Республика аҟынтәи жәларбжьаратәи ахәаахәҭра Акорпорациа «Мангенбон» адиректор хада Иун Гук Намом напхгара зиҭо Акорпорациа аделегациа идикылеит..

Акорпорациа афатә-ажәтә аалыҵқәеи ааглыхратә тауарқәеи рыҭиара, IT-технологиақәа, амедицина аусхкы аҿы аусеицура абжьаҵара, амшын аалыҵ аусдулара, атрикотажтә ааглыхра  иадҳәалоу аусура нанагӡоит.

Аԥыза-министр иԥылара аҿы аделегациа афатә-ажәтә ааглыхра, абанктә усхкы, атуризм, уҳәа егьырҭ ахырхарҭақәа рҿы аусеицура, иара убас Аҟәеи Пхениани ақалақьқәа рҿы аҩганк рыхәхаахәҭратә Хаҭарнакрақәа раартра азҵаарақәа  ирылацәажәеит.

Аҟәа. Жәабранмза 19, 2024 шықәса. Аԥсныпресс. 27 135 кьыла амимоза Аԥсны иалганы Урыстәылаҟа иргеит. 

Раԥхьатәи апартиақәа Аԥснынтәи Урыстәылаҟа ргара ашьҭахь ҩымчыбжь иреиҳаны иҵхьеит.

Аҟәа. Жәабранмза 18, 2024 шықәса. Аԥныпресс. Аамҭала Аԥсны Аҳәынҭқарра Акультура аминистр инапынҵақәа назыгӡо Динара Смыр атәыла Аҳада адырра илҭеит 2023 шықәса рзы акультура Аминистрра аусура аихшьалазы, илҭеит имҩаԥгаз еиуеиԥшымыз акультуратә, аиубеилеитә усмҩаԥгатәқәа, иара убас ареспубликаҿы еиҿкааз егьырҭ апрограммақәа рзы аинформациа.

«Иҳаҩсыз ашықәс хҭыс рацәала иҭәын. Акультуреи аҟазареи ирызку аҳәынҭқарратә  политика анагӡараҟны еснагь Шәара шәҟынтәи, иара убас аиҳабыра рганахьала адгылара ҳамоуп», - ҳәа иазгәалҭеит Динара Смыр.

Динара Смыр илҳәеит Аԥсны акультура Аминистрреи Урыстәыла Акультура Аминистрреи русеицура атәы: «Ҳусеицура аҳәаақәа ирҭагӡаны 60 инареиҳаны апроектқәа аус руеит. Урҭ мҩаԥысуеит Урыстәылатәи Афедерациа аҩныҵҟагьы. Ҷыдала,  П. Чаиаковски ихьӡ зху Москватәи аконцерттә зал аҟны қәҿиарала имҩаԥысит Ашәаҳәареи акәашареи аҳәынҭқарратә ансамбль ақәгылара. Жәларбжьаратәи амузыка Аҩны аҟны имҩаԥысит афортепианнатә концерт «Пиано-Дуо» Москва ақ. Акамертә оркестри ахортә копеллеи реицықәгыларала. Урыстәыла Акультура Аминистрреи ҳареи иҳабжьоу аимадаразы шаҳаҭра ауеит ҳара ҳахь ишауа еицырдыруа аколлективқәеи артистцәеи. Ҳара иҳалшо ала, ара иахәҭоу аҭагылазаашьақәа рзаԥаҳҵоит!», - ҳәа илҳәеит Динара Смыр. 

Аҟәа. Жәабранмза 18, 2024 шықәса. Аԥсныпресс. Аԥсны Иреиҳаӡоу аӡбарҭа апресс-маҵзура Урыстәылатәи Афедерациа адәныҟатәи аусқәа Рминистрра а-Telegram-канал аҿы иҟаз аҳәамҭа иахцәажәеит.  

Жәабранмза 16, 2024 шықәса рзы Урыстәылатәи Афедерациа адәныҟатәи аусқәа Рминистрра аофициалтә Telegram-канал аҿы Ареспублика Аԥсны атәылауаҩ Абыхәба Е.Г. «жәабранмза 2 рзы, иарбоу атәыла Иреиҳаӡоу аӡбарҭа аӡбамҭа ала уи иганахьала уаанӡа ирыдыркылаз азыӡба арԥсыҽра ашьҭахь ихы дақәиҭыртәит» ҳәа адырра ҟанаҵеит.   Урыстәылатәи Афедерациа адәныҟаполитикатә Хылаԥшырҭа аҿы Аԥсны Аҳәынҭқарра Иреиҳаӡоу аӡбарҭа аӡбамҭа аԥснытәи аиашаӡбара ареспублика иахьаҵанакуа иҟало ацәгьоурақәеи  ацәгьоуцәа ақәнага рақәыршәареи рганахьала гәхьаамкрала азнеира аанарԥшуеит  ҳәа ирыԥхьаӡоит.

Аԥсны Аҳәынҭқарра Иреиҳаӡоу аӡбарҭа апресс-маҵзура иҟанаҵаз ахҳәаа аҿы уаанӡа ирыдыркылаз азыӡба арԥсыҽра ҵаҵӷәыс иамоу азы алкаа ҟанаҵоит.  

«Аԥсны атәылауаҩ Абыхәба Е.Г. ацәгьа аниуаз 18 шықәса ихымҵыцызт. Уи иганахьала уаанӡа ирыдыркылахьаз азыӡба арԥсыҽразы аӡбамҭа адкылараан Аԥсны Иреиҳаӡоу аӡбарҭа Апрезидиум шьаҭаны иагеит Аԥсны Аконституциа (ахәҭаҷ 11), еицазхаҵоу жәларбжьаратәи азинтә шәҟәынҵақәа, Аԥсны Ашьауӷатә Закәанеидкыла (ахәҭаҷқәа 3, 4, 6, 82), иара убас Аԥсны Аконституциатә ӡбарҭа азинтә позициа иақәныҟәон» , - ҳәа иаҳәоит атекст аҿы.

Аҟәа. Жабранмза 18, 2024 шықәса. Аԥсныпресс.  Имам Шамиль имҩа аҟны (аҩны №128 аҿаԥхьа) 300 мм. рҟынӡа инаӡо аӡымҩангага ахьԥжәаз иахҟьаны, уаҵәы,  19.02.2024ш., асааҭ 00:00 инаркны 23:00 рҟынӡа аӡыржәтә аанкылахоит Аҟәа ақалақь ахәҭак аҿы: Аҳабла Ҿыц, Ажәытә ҳабла (Аихамҩатә ҳабла), ВИЕМ, Алашарабага аҳабла, Ешба имҩаду, ақалақь агәи ашьхара иахьаԥнуи, ҳәа иаанацҳауеит аҳҭнықалақь «Аӡыршьҭра».