Традициала иреиӷьу алҵшәақәа аадырԥшуеит «ахәышәтәратә ус» ахырхарҭала абиутуриентцәа, араҟа еиҳау аконкурс шыҟоу убаратәы иҟоуп, иара убас иҳараку арбагақәа аадырԥшуеит IT-ахырхарҭала, иара убас архитектуреи арҿиаратә занааҭқәеи рыла ицо абитуриентцәа. Убри аан, иҳаҩсыз ашықәс иаҿырԥшны уахәаԥшуазар, сынтәа арҿиаратә занааҭқәа рҿы азыдымкылара ыҟан, убри инамаданы иарбоу аквотақәа егьырҭ ахырхарҭақәа рахь аихшара ҳақәшәеит.

«Атехникатә занааҭқәа рахь азхьаԥшра шыҟоу убаратәы иҟоуп», - ҳәа иҳәеит Дмитри Федотов.

2024-2025-тәи аҵарашықәс азы адкыларатә кампаниа аихшьаалақәа ҟаҵо, Аԥсны иҟоу Урыстәыла аус ацура азы Ахаҭарнакра ахаҭарнак  Екатерина Власова, иааизакны ҭыԥк ахь ҩыџьа абитуриентцәа ықәгылан, аиҳарак ахшыҩзышьҭра зауз амедицинатә хырхарҭа, IT-азанааҭҵарақәеи архитектуреи роуп ҳәа иазгәалҭеит.

«Ибжьаратәу азанааҭтә ҵара  ахь азыҳәамҭақәа сынтәа зынӡа иҟаӡамызт. Аиҳарак азхьаԥшра аиуит амагистратура – 17  зыҳәамҭа.  8-ҩык «аекономика», «ажурналистика», «алингвистика», «афымцаенергетика», иара убас  «адизаин» азанааҭҵара ала амагистратура иҭалеит», – ҳәа адырра ҟалҵеит Екатерина Власова.

Дмитри Федотов игәаанагарала, аԥснытәи абиутуриентцәа Урыстәыла ибжьаратәу азанааҭтә ҵара аиуразы имаҷны азхьаԥшра ахьарҭо зыхҟьо аԥснытәи абитуриентцәа рықәра ауп: ахәыҷқәа рҭаацәа а-9-тәи акласс аҿы итәоу, 14–15 шықәса зхыҵуа рхәыҷқәа даҽа тәылак ахь рдәықәҵара иацәшәоит.

Дмитри Федотов Аԥснынтәи абитуриентцәа урыстәылатәи аҵараиурҭақәа рахь рыдкылараан Урыстәыла аус ацура азы Ахаҭарнакра инанагӡо ароль дахцәажәеит. Уи, ахәҭакахьала, Урыстәыла аус ацура азы Ахаҭарнакра аԥснытәи абитуриенцәеи Урыстәылатәи Афедерациа аҵараиуҭақәеи рыбжьара «аоператор», даҽакала иуҳәозар, «аимадаҩ-абжьаҟаза» аҳасабла иқәгылоит. Уи ахықәкыс иамоуп аквотатә кампаниа аинформациатә еиқәыршәара.

«Ҳара аквотақәа рышьақәыргылара еиԥш, аԥышәарақәа рылҵшәақәагьы анырра аҳҭаӡом. Аконкурс иаартны имҩаԥысырц азы алԥшааратә усмҩаԥгатәқәа рымҩаԥгара апрокторинг асистема ала имҩаԥысуеит», – ҳәа инаҵшьны иазгәеиҭеит Дмитри Федотов.

Уи игәаанагарала, аквотатә кампаниа аихьӡарақәа анырра арҭеит Аԥсны иҟоу Урыстәыла аус ацура азы Ахаҭарнакра имҩаԥнагаз аусмҩаԥгатәқәа:

«Еиҳа ирацәаны аԥснытәи абитуриентцәа Урыстәылатәи Афедерациа аҵараиурҭақәа рахь адыԥхьалара азы ҳара  аҵарадырратә марафон, ахәыҷтәы технопарк «Кванториум» амастер-классқәа, иара убас  12 ҵараиурҭа злахәыз Жәларбжьаратәи аҵараиурҭабжьаратәи ацәыргақәҵа, уҳәа  реиԥш иҟоу аусмҩаԥгатә дуқәа ҳрызхьаԥшуан», – ҳәа иҳәеит Дмитри Федотов.

Есышықәса Аԥсны иҟоу Урыстәыла аус ацура азы Ахаҭарнакра ареспублика аҿы еиҳа иаҭаху  аҵара ахырхарҭақәа азырбо аминистрцәа Реилазаара иадҵаалоит.

«Урҭ ахырхарҭақәа рхыԥхьаӡараҿы сынтәа иҟан: адгьыл аҭҵаарадырреи абиологиатә наукақәеи, аелектроника, арадиотехникеи аимадара асистемақәеи, ақыҭанхамҩа, абнанхамҩа, аԥсыӡнхамҩа, апсихологиатә наукақәеи арҿиаратә наукақәеи. Иазгәаҭатәуп, абарҭ азанааҭқәа рзы азыдымкылара шыҟаз», - ҳәа иазгәеиҭеит иара.

Дмитри Федотов ишазгәеиҭаз ала, уи адҳәалазар ҟалоит Аԥснытәи аҳәынҭқарратә Университет аҿы иарбоу азанааҭҵара ахьыҟоу, аҿар убри аҟнытә рыԥсадгьыл аҿы аҵараиурҭа иҭалоит. Убас ала аминистрцәа Реилазаара аҭаххрақәа ААУ аҿы ихарҭәаахоит.

Иара убас Аԥсны иҟоу Урыстәыла аус ацуразы Ахаҭарнакра ахаҭарнакцәа ражәақәа рыла, сынтәа иахәҭоу  азхьаԥшра амоуӡакәа иаанхеит «адгьылтә транспорти атехникеи», «аполитикатә наукеи арегионҭҵаареи», «аӷбаргылареи аӡытә транспорти ртехникеи атехнологиақәеи», «мрагылараҭҵаареи африканистикеи», – иарбоу азанааҭқәа рзы зынӡа азыҳәамҭақәа аларымҵаӡеит.