Аҟәа. Нанҳәамза 21, 2024 шықәса. Аԥсныпресс. Аԥсни Шьамтәылеи рыбжьара анаукатәи академиатәи аусеицура аҳәаақәа рырҭбаара аперспективақәа ирылацәажәеит Шьамтәыла иҟоу Аԥсны ацҳаражәҳәаҩ Муҳаммад Алии Дамассктәи Ауниверситет аректор, апрофессор Маҳаммад Усама Аль-Џьаббани реиԥылараа аҿы, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.
Мухаммад Али Аԥсны Анапхгара Аԥснытәи аҳәынҭқарратә Университетеи Дамассктәи Ауниверситети рыбжьара аусеицуратә еизыҟазаашьақәа рыҿиара иазҿлымҳауп ҳәа аҳәамҭа ҟаиҵеит. Астудентцәа наҟ-ааҟ ремадара иазку апрограмма, иара игәаанагарала, аҩ-тәылак рыбжьара анаукатәи акультуратәии аимадарақәа рыҿиара хра злоу анырра анаҭоит. Аганқәа ҳазҭоу ашықәс азы Аԥсны зымҩаԥгара азԥхьагәаҭоу, аекономикатә, акультуратә, анаукатә усеицура азы Аԥсны-Шьамтәылатәи Анапхгарабжьаратәи акомиссиа аҩбатәи аилатәара аҳәаақәа ирҭагӡаны ауниверситетқәа рыбжьара аусеицура азы Аиқәшаҳаҭра анапаҵыҩра ишазхиоу азгәарҭеит.
Дамассктәи Ауниверситет аректор Аԥснытәи аҳәынҭқарратә Университет аус ацура, анаукатәи астуденттәи аҩаӡарақәа рҿы аԥышәеимадара абжьаҵара, амагистртәи адоктортәи адиссертациақәа азеиԥш напхгара рыҭара, иара убас аҵараиурҭақәа рыбжьара аҭҵаарадырратә еимадара арӷәӷәара азы латәарала еиԥш, аонлаин-форматқәа рыла анаукатә лекциақәа рымҩаԥгара, уҳәа аусмҩаԥгатәқәа рымҩаԥгара иаҵоу аҵакы ахадара инаҵшьны иазгәеиҭеит.
Аиԥылара ихы алаирхәит Шьамтәыла иҟоу Аԥсны Ацҳаражәҳәарҭа абжьгаҩ, аконсултә ҟәша аиҳабы Гаис Аль Харки.
