Тамшьтәи ашкол инагӡаны еиҭашьақәыргылоуп. Араҟа иаадыртит аинтерактивтә классқәа, аҵара азы акыр иманшәалоу аҭагылазаашьақәа аԥҵоуп. Аусурақәа зегьы мҩаԥган Жәлар Реизара-Апарламент адепутат Резо Занҭари ихатә харџь ала. Беслан Бигәаа ӡыла аиқәыршәара иадҳәаланы иҟоу ауадаҩрақәа рыӡбара алыршара азы анапынҵақәа ҟаиҵеит.

Аусуратә ҭаара ахыркәшамҭаз араион ахада Маркәыла ақыҭа даҭааит. Араҟа ашкол шьаҭанкыла аиҭашьақәыргылара мҩаԥысуеит.  Аусурақәа зегьы Аԥсны Афырхаҵа Заур Зарандиа ихатә харџь ала имҩаԥысуеит. Ашкол аколлектив араион ахада иахь иҷыдоу атехника аахәара аганахьала ацхыраара аиуразы аҳәара ҟарҵеит. Беслан Бигәаа иарбоу апроблема шыӡбахо иҳәеит, иара убас ашкол аколлективи Заур Чанҭа-иԥеи маркәылатәи ахәыҷқәа аҵаразы иманшәалоу аҭагылазаашьақәа рзаԥҵара ахьалдыршаз азы иҭабуп ҳәа реиҳәеит.