Аҟәа. Жәабранмза 29, 2024 шықәса. Аԥсныпресс. Аҳәынҭқарра Ахада Аслан Бжьаниа Гагра араион администрациа ахада иҟнытә 2023 шықәсаантәи аусура аихшьалазы аҳасабырба идикылеит.

2023 шықәсаантәи абиуџьет анагӡара иазкыз аҳсабырбаҟны иазгәаҭоуп афинанстә усураҟны аихьӡара дуқәа шыҟоу. Гагра араион ахада иаҵшьны иҳәеит иҳаҩсыз ашықәс азы ауадаҩрақәа шыҟазгьы, администрациа аҿаԥхьа иқәгылаз ауснагӡатәқәа рынагӡара шалшаз.   

Иури Хагәышь иажәақәа рыла, ахашәалақәа ирызҳаит 893 млн мааҭ рҟынӡа, ахарџьқәа 1 млрдки 201 млн мааҭ рҟынӡа инаӡеит (2022 шықәсаҟнытә ииасуа ацәынхеи (147,9 млн мааҭ)  еизырҳау асубсидиақәеи  рыла (45,4 млн мааҭ).

Аплан аҟны иарбаз 893,8 млн мааҭ раан ааимҭақәа идыртәеит 1 млрд 063 млн мааҭ, ари иартәеит аплан аҟнытә 119%  (+169,9 млн мааҭ). Абиуџьет ахарџьтә хәҭа нагӡоуп 98,8%, ҷыдала урҭ рзынархан шьаҭанкылатәи арҽеиратә усурақәеи араион аиҿкаареи. 

«Иара убас аџьаԥса иазоужьуп 386, 3 млн мааҭ. Ара иазгәасҭарц сҭахуп 2023 шықәсазы ахатәы хархәагақәа рыла абиуџьетуаа ркатегориа иаҵанакуа, Урыстәылатәи Афедерациа аицфинансзоужьра иаҵанамкуа рзы ауалафахәқәа 50% ишрыцҵоу.  2024 шықәсазы иазԥхьагәаҳҭеит урҭ абас еиԥш 50 % рыла рышьҭыхра», - адырра ҟаиҵеит Иури Хагәышь.

2023 шықәсазы қәҿиарала инагӡан апроект дуқәа Гагра ақалакь ахәыҷбаҳча шьаҭанкылатәи арҽеира, амҩақәа акаҭран рықәҵара, иара убас Асанитартә-епидемиологиатә станциа ахыбра арҽеира иазкыз. Имҩаԥган шьаҭанкылатәи арҽеира ахәшәтәырҭа аҟәшаҟны, ауааԥсыра ацхыраара рыҭан. 

«Гагратәи Ахәышәтәырҭа хадаҟны 2023 шықәсазы шьаҭанкылатәи арҽеира мҩаԥган    агинекологиа аҟәшеи ацхыраара ласы ахыбреи рзы, нап аркуп ахирургиатә ҟәша, иааизакны арҽеиратә усурақәа ирықәхарџьын 57 млн мааҭ, урҭ рахьтә 3,9 млн мааҭ  артәоит ҳнаплакҩцәа рыцхыраара, уи азы иҭабуп ҳәа раҳҳәоит», -  ҳәа азгәеиҭеит араион ахада.

Иури Хагәыш иҳәеит иара убас Пицунда амҩақәа ашьаҟауаа рныҟәарҭақәа реиҿкааразы имҩаԥгаз аусура ишартәаз 14 млн мааҭ инареиҳаны. «Ҵыԥхтәи ашықәс азы иара убас ихацыркын акультура ахан шьаҭанкылатәи арҽеира, ара ахыб аԥсахра иақәхарџьуп 5,4 млн мааҭ. Аобиект азеиԥш харџьынҵатә хәыԥса иартәоит - 62 млн мааҭ», - ҳәа иҳәеит араион ахада.

Аҳасабырбаҟны иазгәаҭоуп иара убас аԥсабаратә рыцҳара иахҟьаны аԥхасҭа зауыз ауааԥсыра ацхыраара рыҭара ишазоужьу 54,4 млн мааҭ. «Иара убас ҳраион анаплакҩцәа ацхыраара ҟарҵеит 11,5 млн мааҭ рҟынӡа, аԥсабаратә рыцҳара ахҟьа-ԥҟьақәа раԥыхразы 40 млн мааҭ рҟынӡа», - иацҵаны иазгәеиҭеит Иури Хагәышь. 

Администрации анапхгара ҷыдала хылаԥшра рырҭеит социалла иуашәшәыроу атәылауаа, ацхыраара иаҳәоз убас ирзынархан 21,8 млн мааҭ.

«2023 шықәсазы аусура хацҳаркит ақыҭанхамҩа ацхыраара аҭара апрограмма, 23 проект ҳадаҳкылеит, араион абиуџьет аҟнытә ирзоужьу афинанс иартәеит 11 млн мааҭ», - иҳәеит Иури Хагәышь. Иара убас араион аҟны аус ауеит ақыҭанхамҩа ацхыраара аҭара иазку ареспубликатә программа, уи аҳәаақәа ирҭагӡаны 2021 шықәса раахыс ақыҭанхамҩа аминистрра иаднакылеит аԥарагьы рзоунажьит 20 проект 7 млн мааҭ. 

Гагра араион ахада адырра ҟаиҵеит иара убас акриминогентә ҭагылазаашьеи амҩатә транспорттә хҭысқәеи рзы. «2023 шықәса аҩныҵҟала ашәҟәы иҭагалоуп ацәгьоурақәа 130, иаарԥшуп 117.  2023 шықәсазы амҩаҟны иҟалаз ахҭысқәа рхыԥхьаӡара наӡоит 60 рҟынӡа, иҭахеит 13-ҩык», - ҳәа иазгәеиҭеит Иури Хагәышь.

«Гагра араион аҟны хархәара змоу афымцамч ахәԥса ашәаразы иҟоу аҭагылазаашьа атәы ҳҳәозар, 2023 шықәсазы ишәоуп 302 млн 658 нызқь мааҭ (51, 8%). Иаанхаз ауал иартәеит 281 млн 417 нызқь мааҭ, урҭ рахьтә аиуристтә хаҿқәа рыҟнытә  – 17, 5 млн мааҭ, ауааԥсыра рыҟнытә  – 263,8 млн мааҭ», - иҳәеит араион ахада.

Аҳәынҭқарра Ахада дазҵааит араион аҟны атуризми уи инамаданы аинфраструктуреи рыҿиара шымҩаԥысуа атәы. Араион ахада иажәақәа рыла, ҵыԥхтәи ашықәс азы ахархәарахь ирыҭоуп асасааирҭатә, акурорттә ҵакы змоу аобиектқәа хыԥхьаӡара рацәала.

«Ҵыԥхтәи ашықәс азы ахархәарахь ирыҭоуп асасааирҭақәа 6, агәабзиарачаԥарҭа-курорттә комплексқәа 3, коттеџьтә комплексқәа 3, ауаажәларратә крыфарҭатә обиектқәа 5, адәқьанқәа 9, аҭыжьырҭатә цехқәа 2. 

Аҟәа. Жәабранмза 27, 2024 шықәса. Аԥсныпресс. Аԥсны Жәлар Реизара - Апарламент Аиҳабы Ашәба Лаша Аԥсны Аҳәынҭқарра амассатә информациа ахархәагақәа русзуҩцәа рзанааҭтә ныҳәа рыдиныҳәалеит.

Адныҳәалараҟны иҳәоуп:

«Ҳаҭыр зқәу Аԥсны Аҳәынҭқарра амассатә информациа ахархәагақәа русзуҩцәа! 

Аԥсны Жәлар Реизара - Апарламент ахьӡала ишәыдысныҳәалоит Аԥсны Аҳәынҭқарра амассатә информациа ахархәагақәа рымш!

105 шықәса раԥхьа иҭыҵит аԥсуа газеҭ «Аԥсны» актәи аномер. Абри арыцхә   – 2019 шықәса жәабранмза 27 Аԥсны Жәлар Реизара - Апарламент  ҳҳәынҭқарратәи ихьыԥшыми амассатә информациа ахархәагақәа русзуҩцәа рзанааҭтә ныҳәаны ирыланаҳәеит.  Агазеҭ «Аԥсны» раԥхьатәи редактор хаданы дҟалеит аԥсуа ҩыратә литература ашьаҭаркҩы, арккаҩ ду Дырмит Иасыф-иԥа Гәлиа. Дырмит Гәлиеи уи идгыланы аус ицызуаз иҩызцәеи 1919 шықәсазы ауасхыр ззышьҭарҵаз аԥсуа журналистика анаҩс ҳҳәынҭқарра аԥхьаҟатәи ашьақәгылараан қәҿиарала аҿиара аиуит. Агазеҭ хықәкыс иаиуит аԥсуа бызшәа, жәлар рытрадициа, ркультура арҿиара, аҵас бзиақәа реиқәырхара, ареспублика иқәынхоз ажәлар рзы аҵакы змаз ахҭысқәа, апроблемақәа рцәыргара.

Аҟәа. Жәабранмза 27, 2024 шықәса. Аԥсныпресс. Анапхгарабжьаратәи аизыҟазаашьақәа рырӷәӷәареи атәылақәа рыбжьара азинтә усхкы аҿы аусеицура арҿиареи хықәкыс иҟаҵаны, Аԥсны аиустициа Аминистрреи Шьамтәылатәи Арабтә Республика аиустициа Аминистрреи аусеицуразы аиқәшаҳаҭра апроект активла аус адырулоит, ҳәа адырра ҟанаҵоит Аԥсны аиустициа Аминистрра апресс-маҵзура.  

Аҟәа. Жәабранмза 27, 2024 шықәса. Аԥсныпресс. Аԥсны аҩныҵҟатәи аусқәа Рминистрра апресс-маҵзура Аԥсны амассатә информациа ахархәагақәа русзуҩцәа рзанааҭтә ныҳәа инамаданы ирыдныҳәалеит, ирзеиӷьаршьеит арҿиаратә еихьӡарақәа, агәазҭазаара, ауаажәларра рҟынтәи дара ирбо аџьабаа аилкаара,  ажәабжь бзиақәа! 

Аҟәа. Жәабранмза 27, 2024 шықәса. Аԥсныпресс.  Жәабранмза 27 рзы Аԥсны иазгәарҭоит амассатә информациа ахархәагақәа русзуҩцәа рзанааҭтә ныҳәа. 105 шықәса раԥхьа, 1919 шықәса жәабран 27 рзы раԥхьаӡа акәны - аԥсышәала икьыԥхьыз агазеҭ «Аԥсны» аҭыҵра иалагеит.

Агазеҭ аредактор хадас дҟалеит аԥсуа литература ашьаҭаркҩы Дырмит Иасыф-иԥа Гәлиа.

Агазеҭ «Аԥсны» ркьыԥхьуан Aндреи Ҷоҷуа 1909 шықәсазы иаԥиҵаз, Санкт-Петербургтәи Академиа алахәыла-акорреспондент Пиотр Услар аус здиулаз алфавит ала. Ҩышықәа рыҩныҵҟа иҭыжьын агазеҭ «Аԥсны» 85 номер. 

1921 шықәсазы Аԥсны асовет мчра анышьақәгыла ашьҭахь «Аԥсны ҟапшь» ҳәа ахьӡ еиҭакхеит. 1991 шықәсазы иазыргьежьхеит раԥхьатәи ахьӡ.

Агазеҭ аҭыжьра аԥсуа сахьаркыратә литература ацәырҵра иауасхырхеит.

Аҟәа. Жәабранмза 27, 2024 шықәса. Аԥсныпресс. Аҩбатәи аԥсуа медицинатә форум аатуеит мшаԥымза 22 рзы. Аусмҩаԥгатә аиҿкааҩцәа  - Аԥсны агәабзиарахьчара Аминистрреи Зҭакԥхықәра ҳәаақәҵоу Аилазаара «Урыстәылатәи амедицинатә Еилазаареи» (Урыстәылатәи).

Иҟоу заанаҵтәи аинформациа ала, афорум ацхантәаҩцәаны иқәгылоит Аԥсны агәабзиарахьчара аминистр Едуард Быҭәбеи Урыстәылатәи амдицинатә Еилазаара апрезидент Евгени Ачкасови.

Аҟәа. Жәабранмза 27, 2024 шықәса. Аԥсныпресс. Дырмит Гәлиа ипиеса «Аԥҳәызбеи арԥызбеи рышәҟәы» ала иқәыргылаз аспектакль «Иареи лареи» аԥхьарбара мҩаԥысит ашәахьа, жәабранмза  27 рзы, С. Ҷанба ихьӡ зху Аԥснытәи аҳәынҭқарратә драматә театр аҿы.  Аспектакль ақәыргылара аԥсуа литература ашьаҭаркҩы Дырмит Галиа диижьҭеи 150-шықәса аҵра азгәаҭара  иадҳәалахеит.

Аспектакль арежиссиор – Аԥсны зҽаԥсазтәыз артистка Мадина Аргәынԥҳа Аԥсныпресс акорреспондент диҿцәажәо аспектакль ақәыргылара атема хаданы иҟоу абзиабара ауп ҳәа иазгәалҭеит.

«Аспектакль асиужет аҿы ишьҭоу арԥызбеи аԥҳәызбеи ирыбжьоу асаламшәҟәқәа рыла аимадара ауп.  Зынӡа зхыԥхьаӡара ааба рҟынӡа инаӡоз ашәҟәқәа, иуадаҩугьы уахь иналаҵаны,  еиуеиԥшым аҭагылазаашьақәа раан афырхацәа реизҟазаашьақәа зеиӷьаҟам ала иаадырԥшуеит.  Асиужет аклассикатә ҟазшьа амоуп. Уи иаанарԥшуеит абзиабара цқьа амч, уи иабзоураны иарбан уадаҩразаалакгьы изықәшәо ириааины арԥызбеи аԥҳәызбеи еицаанхоит, насыԥла иҭәу аԥсҭазааратә мҩа ду еицанылоит», – ҳәа инаҵшьны иазгәалҭеит лара.

Аҟәа. Жәабранмза 24, 2024 шықәса. Аԥсныпресс. Тҟәарчал араион ахада Исидор Дочиа Аҳәынҭқарра Ахада иҿаԥхьа  иҳаҩсыз 2023 шықәсазтәи аусура  аихшьаалақәа рыҳасабырба ҟаиҵеит, ҳәа адырра ҟанаҵоит Аҳәынҭқарра Ахада ипресс-маҵзура.

Ҭҟәарчал араион ахада Исидор Дочиа, Атәыла Ахада Аслан Бжьаниеи иареи реиԥылараан ишазгәеиҭаз ала, 2023 шықәсазы Тҟәарчал араион абиуџьет ахашәалахәытә хәҭа 2,5% инацны инагӡоуп.

Ауснагӡала ахашәалахәы ҳәа иарбан 311,8 миллион мааҭ, иалалеит — 319,7 миллион мааҭ.

Исидор Дочиа иажәақәа рыла, Тҟәарчал араион абиуџьет аныхтәии ахашәалахәытәии хәҭа еизҳаит Риҵатәи амилаҭтә парки Афонҿыцтәи аҳаԥи рҟынтәи ҵыԥх иазоужьыз аԥара иабзоураны.

Ақыҭанхамҩа аҿиаразы апрограмма инақәыршәаны аа-проектк нагӡан Ҭҟәарчал араион 2023 шықәсазы, урҭ ирықәхарџьын 2,7 миллион мааҭ иҳәеит Исидор Дочиа.

Урҭ иреиуоуп:

- арахәааӡаразы х-проектк, 1,5 миллион мааҭ;

- ақыҭанхамҩатә аалыҵқәа аус рыдулареи рыҵәахреи рзы ҩ-проектк, 700 нызқь мааҭ; амеханизациа маҷ аахәаразы ҩ-проектк, 295 нызқь мааҭ;

- аԥсаатәааӡаразы-проектк, 290 нызқь мааҭ.

Аҟәа. Жәабранмза 27,2024 шықәса. Аԥсныпресс.  Аԥсны аҿари апорти русқәа рзы аҳәынҭқарратә Еилакы Адунеизегьтәи аҿар Рфестиваль зхы алазырхәаны иҟоу аԥснытәи аделегациа рԥылара еиҿнакааит.   Аделегациа аилазаараҿы иҟоуп шә-ҩкк ауаа инарзынаԥшуа.

Аҿар ирыҿцәажәарац арахь имҩахыҵит Аҳәынҭқарра Ахада Аслан Бжьаниа, Жәлар Реизара-Апарламент Аиҳабы Лаша Ашәба, аԥыза-министр ихаҭыԥуаҩ, афинансқәа рминистр Владимир Делба, адәныҟатәи аусқәа рминистр Инал Арӡынба.

Аиԥылара аартуа, аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба хәажәкырамза 1 инаркны 7-нӡа Афедералтә ҵакыра «Сириус» имҩаԥысло Адунеизегьтәи аҿар Рфестиваль алахәхараз алшара зауз аҿар дрыдныҳәалеит. 

Иара ишазгәеиҭаз ала, иҟоу азгәаҭарақәа рыла ари ашықәс  аҿартә политика адагьы, идуу аспорттә жәларбжьаратәи аицлабрақәа  русхкқәа рылагьы акыр игәылҭәаахар алшоит.

Аҟәа. Жәабранмза 27, 2024 шықәса. Аԥсныпресс.  Аҳәынҭқарра Ахада Аслан Бжьаниа Аԥсны Аҳәынҭқарра амассатә информациа ахархәагақәа рзанааҭтә ныҳәа рыдиныҳәалеит.

Адныҳәалараҟны иҳәоуп:

«Ҳаҭыр зқәу Аԥсны Аҳәынҭқарра амассатә информациа ахархәагақәа русзуҩцәа!

Гәык-ԥсык ала ишәыдысныҳәалоит шәзанааҭтә ныҳәа - Аԥсны Аҳәынҭқарра Амилаҭтә кьыԥхь, амассатә информациа ахархәагақәа, агазеҭ «Аԥсны» 105 шықәса рхыҵра амш!

Ихьыԥшым ҳҳәынҭкарра аргылараҟны ахаангьы аԥхьатәи апозициақәа аанызкылоз аԥснытәи ажурналистика ароль ахә ашьара уадаҩуп. Шәара ҳтәылаҟнеиԥш, уи анҭыҵгьы имҩаԥысуа ахҭысқәа аашәырԥшуеит, инашәыгӡоит актуалра злоу ауаажәларра-политикатә, асоциал-економикатә, арҿиаратә проектқәа, аполитикатә культуреи ауаажәларратә гәаанагареи раԥҵара шәацхраауеит, акыр анырра аҭара шәылшоит атәылаҟны аполитикатәи ауаажәларратәи процессқәа.

Шәара шәыҩныҵҟа есқьынгьы иҟан арҿиаратә уаа, абаҩхатәра змоу, ауаажәларра рҿаԥхьа ирыду аҭакԥхықәра атәы бзианы еилызкаауа, зыԥсадгьыл гәыкала бзиа избо,  згәы азыбылуа. Шәара иахьа шәнапы злаку аус ауасхыр азышьҭазҵаз Дырмит Иасыф-иԥа Гәлиа редакторс даман 2105 шықәса раԥхьа иҭыҵыз агазеҭ «Аԥсны» актәи аномер.