Аҟәа. Нанҳәамза 26, 2025 шықәса. Аԥсныпресс. Атәыла анапхгара алахәылацәа 1992-1993 шш. Аԥсны жәлар Рџьынџьтәылатәи еибашьра аҿы иҭахаз ҳаҭырла иргәаладыршәеит.  

Аҟәа ақалақь, Ахьӡ-Аԥша апарк аҿы, Урыстәылатәи Афедерациала Аԥсны ахьыԥшымреи аҳәынҭқарратә суверенитети разхаҵара ҟалеижьҭеи 17-шықәса аҵра инамаданы, 1992-1993 шш. Аԥсны жәлар Рџьынџьтәылатәи еибашьра аҿы иҭахаз аибашьцәа Рмемориал амҵан ашәҭшьыҵәрақәа рышьҭаҵара ацеремониа мҩаԥысит.  

Аҟәа. Нанҳәамза 26, 2025 шықәса. Аԥсныпресс.  Нанҳәамза 26 рзы Аԥсны Ахьыԥшымра Жәларбжьаратәи азхаҵара Амшныҳәа азгәарҭоит.  

Иахьа 17 шыџқәса ҵуеит Урыстәыла Аԥсны ахьыԥшмыра азханаҵеижьҭеи. Нанҳәамза 26, 2008 шықәса рзы Урыстәылатәи Афедерациа Ахада Дмитри Медвелев иқәҵарала Урыстәыла Ареспублика Аԥсныи Аахыҵ Уаԥстәыла Ареспубликеи официалла иазханаҵеит.

Ареспублика ахьыԥшымра жәларбжьаратәи азхаҵара Амш Аԥсны ныҳәатә мшны иҟоуп. Есышықәса ари амш аҽны ареспублика зегьы иахьҵанакуа аныҳәатә усмҩаԥгатәқәа мҩаԥысуеит. Убас:

Асааҭ 10:00 рзы –  Ахьӡ-Аԥша апарк аҿы иҟоу 1992 – 1993 шш. Аԥсны жәлар Рџьынџьтәылатәи еибашьра аҿы иҭахаз афырхацәа Рмемориал амҵан ашәҭ шьыҵәрақәа рышьҭаҵара ацеремониа мҩаԥысуеит.

Асааҭ  11:30  рзы – Аҟәа араион, Алада Ешыра ақыҭан  Аԥсны Раԥхьатәи Ахада Владислав Арӡынба анышә дахьамадоу Амемориал амҵан ашәҭ шьыҵәрақәа рышьҭаҵара ацеремониа мҩаԥысуеит.

Асааҭ 12:30 рзы – Очамчыра араиорн Џьгьиарда ақыҭан Аԥсны Аҩбатәи Ахада Сергеи Багаԥшь анышә дахьамадоу ашәҭ шьыҵәрақәа рышьҭаҵара ацеремониа ҩаԥгахоит.

Асааҭ 18:00 рзы – Фазиль Искандер ихьӡ зху Аҳәынҭқарратә аурс драматә театр амузеи аартра мҩаԥгахоит.

Асааҭ 20:00 рзы –  Амҳаџьыраа Рыԥшаҳәа, Аԥсуа драматә театр аҿаԥхьа Урыстәылатәи Афедерациа ала Аԥсны ахьыԥшымра азхаҵара ҟалеижьҭеи 17- шықәса аҵра иазку аԥснытәи аестрада артистцәа злаху аныҳәатә концерт мҩаԥгахоит. Амш ахыркәшамҭаз иҟалоит аныҳәатә салиут.

Аҟәа. Нанҳәамза 23, 2025 шықәса. Аԥсныпресс. Аҳәынҭқарра Ахада Идҵа инақәыршәаны иаԥҵоуп Иавтономтәу икоммерциатәым аиҿкаара «Аԥсны Акоманда».

Аиҿкаара астратегиатә хықәкыс иамоуп ауаҩытәҩсатә капитал арҿиареи арӷәӷәареи, атәыла аизҳазыӷьареи, аицлабрақәа реиҿкаареи аицлабра «Аԥсны акоманда» афиналистцәеи аиааира згази иаԥырҵаз апроектқәа рынагӡареи рыҟны ацхыраара аҟаҵара иацхраауа Аԥсны Аҳәынҭқарра атәылауаа ганрацәала рыҿиареи реизҳареи рзы аҭагылазаашьақәа раԥҵара.

Аҟәа. Нанҳәамза 25, 2025 шықәса. Аԥсныпресс.  Пушкин имҩа ала – Аиааира апроспекти Лакоба имҩеи рыбжьара ашьаҟамҩатә зонақәа реиқәыршәазаара иадҳәалоу аусурақәа мҩаԥысуеит, ҳәа адырра ҟанаҵоит Аҟәа ақалақь Ахадара апресс-маҵзура.  Анаҩс Арӡынбеи Гәлиеи рымҩадуқәа рыбжьара (Аботаникатә баҳча аҟынӡа) иҟоу ашьаҟамҩа аиқәыршәазаара азԥхьагәаҭаны иҟоуп.  Убас ала, Пушкин имҩала иҟоу ашьаҟамҩатә зонақәа зегьы рҭеиҭыԥш рҽеихоит.

Аҟәа. Нанҳәамза 25, 2025 шықәса. Аԥсныпресс. Аҳәынҭқарра Ахада Бадра Гәынба аԥснытәи аԥкьаҭмпыласҩы қәыԥш Нестор Цужба ааигәа иоуз аихьӡарақәа идиныҳәаларц диԥылеит. Уи Нестор Цужба Австриеи Лиуксембурги имҩаԥысуаз жәларбжьаратәи атурнирқәа рҿы иигаз аиааирақәа идиныҳәалеит. Иара уаҟа аӡәаӡәалатәи аразриади ҩыџьа-ҩыџьалатәи аразриади рҿы чемпион наӡас дҟалеит, ҳәа иаанацҳауеит Аҳәынҭқарра Ахада ипресс-маҵзура.

Аҟәа. Нанҳәамза 22, 2025 шықәса. Аԥсныпресс. Аҟәа ақалақь иҟоу Жәларбжьаратәи акультура-усуратә Центр «Москва Аҩны» аҿы нанҳәамза 22 рзы иазгәарҭо Урыстәылатәи Афедерациа Аҳәынҭқарратә бираҟ Амшныҳәа иазкны иаатит афотоцәыргақәҵа «Мариуполь 2022-2025».

Афотопроект автор – ажурнал «Новые регионы России» аредактор хада, Урыстәыла ажурналистцәа Реидгыла  алахәыла, афотоҭыхҩы-адокументалист Сергеи Вениавски. Ацәыргақәҵа аматериалқәа иалоуп хы-шықәса рыбжьаны Мариуполь иҟаҵаз афотоҭыхымҭақәа, урҭ лабҿаба иудырбоит украинатәи анеонацисттә архәҭақәа рҟынтәи ахақәиҭтәра ашьҭахь ақалақь аҭынч ԥсҭазаарахь ишиасуа, аҭагылазаашьа аҭышәынтәалара шымҩаԥысуа атәы.

Асасцәа бзиала шәаабеит ҳәа раҳәо, Аԥсны иҟоу Урыстәыла ацҳаражәҳәаҩ Михаил Шургалин иҳәеит:

«Афотоцәыргақәҵа автор – ажурнал «Новые регионы России» аредактор хада, Урыстәыла ажурналистцәа Реидгыла алахәыла, афотоҭыхыҩ-адокументалист Сергеи Вениавски иоуп.

Аиҳарак иахьатәи аусмҩаԥгатә асимволтә ҵакы азҭо иахьа иазгәаҳҭо Урыстәылатәи Афедерациа Аҳәынҭқарратә бираҟ Амш ауп. 2022 шықәсазы Мариуполь ақалақь иахашәыршәырыз ари абираҟ анацисттә-бандератә гыгшәыгқәа рҟынтәи ақалақь аиҭашьақәыргылара иасимволны иҟалеит.

Афотоцәыргақәҵа аиҿкаара ҳтәылақәа рыбжьара акультура-гуманитартә усхкы аҿы қәҿиара  имҩаԥысуа, аидгылареи астратегиатә партниорреи рыла ишьаҭарку аусеицура арҵабыргуеит».

Михаил Шургалин ҷыдала иазгәеиҭеит ацәыргақәҵа аиҿкаараҿы Урыстәылатәи Афедерациа Ахада Иусбарҭа, Урыстәылатәи Афедерациа адәныҟатәи аусқәа Рминистрреи Урыстәыла аус ацуразы аофициалтә Хаҭарнакреи  рлагала.

Ацәыргақәҵа иаҭааит атәыла аԥыза-министр Владимир Делба, Жәлар Реизара-Апарламент Аиҳабы Лаша Ашәба, Аҳәынҭқарра Ахада Иусбарҭа аиҳабы Беслан Ешба, Аҳәынҭқарратә шәарҭадара Ахеилак амаӡаныҟәгаҩ Рауль Лолуа, аԥыза-министр  ихаҭыԥуаҩ, аҿари аспорти русқәа рзы Аилак ахантәаҩы инапынҵақәа назыгӡо Ҭарашь Ҳагба, акультура аминистр Даур Ақаҩба.  

Аҟәа. Нанҳәамза 21, 2025 шықәса. Аԥсныпресс. Аԥсны Аминистрцәа реилазаараҿы ажәҩан аҵаҟа иҟоу Аҟәатәи абааш ахь абилеҭқәа рыхәқәа шьақәдырӷәӷәеит.

Аҳәынҭқарратә аҭоурых-архитектуратә музеи-ҳәырԥсарра «Аҟәатәи абааш» аҭаара ҳәаақәҵахоит абарҭ ахәԥсақәа рыла:

Аҟәа. Нанҳәамза 21, 2025 шықәса. Аԥсныпресс. Аминистрцәа Реилазаара аҿы абылтәы аџьармыкьа аҳәаақәҵара иадҳәалоу аамҭалатәи аусмҩаԥгатәқәа рыҿҳәара нанҳәамза 31, 2026 шықәсанӡа ацҵаразы Ақәҵара рыдыркылеит. Ахылаԥшра Аенергетика аминистрра анапы ианҵоуп.

Иарбоу аӡбамҭа абылтәы аџьармыкьаҿы аҭышәынтәалареи, ари ахырхарҭаҿ аҳәынҭқарратә хылаԥшра арӷәӷәареи ирзырхоуп.

Атәыла аԥыза-министр Владимир Делба иажәақәа рыла, иҟоу адыррақәа рыла, абылтәы Аԥсныҟа уаанӡа еиԥш иааргалоит.

«Шәара ииашаны иазгәашәҭеит абылтәыҭирҭақәак рҿы аиԥҟьарақәа шыҟоу. Аԥсны абылтәы азымхараз шәарҭара ыҟаӡам, аха убри аан ареспубликахь аагаразы асезонтә проблемақәа ыҟоуп, аха уи алогистикатә проблемақәа ирыдҳәалоуп. Акурорттә аамҭаан аихамҩа аидара ду иаҵоуп, апассаџьыртә дәыӷбақәа рацәаны аладаҟа ицоит, урҭ аныҟәараан аԥыжәара рымоуп».

Аҟәа. Нанҳәамза 21, 2025 шықәса. Аԥсныпресс.  Аминистрцәа реилазаараҿы аурыс бызшәеи аԥсуа бызшәеи рырҵаҩцәа руалафахәы ацҵаразы ақәҵара рыдыркылеит.  Убас:

• Аԥсны аҳәынҭқарратә азеиԥшҵараиурҭақәа рҿы аус зуа аԥсуа бызшәеи алитературеи рырҵаҩцәа цәыббрамза 1, 2025 шықәса инаркны есымза 6000 мааҭ рзацҵахоит.
• Аԥсны аҳәынҭқарратә азеиԥшҵараиурҭақәа рҿы аус зуа аурыс бызшәеи алитературеи рырҵаҩцәа цәыббрамза 1, 2025 шықәса инаркны есымза 5 000 мааҭ рзацҵахоит.
• Аԥсны аҳәынҭқарратә азеиԥшҵараиурҭақәа рҿы аус зуа аклассқәа напхгара азҭо арҵаҩцәа ракәзар, 1, 2025 шықәса инаркны есымза 1800 мааҭ рызшәалахоит.

Аҟәа. Нанҳәамза 21, 2025 шықәса. Аԥсныпресс. Аԥсны Аҳәынҭқарра адәныҟатәи аусқәа рминистр ихаҭыԥуаҩ инапынҵақәа назыгӡо Иракли Ҭыжәба ахҳәаа ҟаиҵеит.

2025 шықәса нанҳәа 19 азы Еиду Амилаҭқәа Реидгыла аштаб-квартираҿ Ашәарҭадаратә Хеилак алахәылацәа реилатәара мҩаԥысит, уи 2008 шықәсазы иҟалаз ахҭысқәа ирызкын. Аилатәара аихшьаалақәа рыла мраҭашәаратәи тәылақәак рхаҭарнакцәа аицҳәамҭа ҟарҵеит Қырҭтәыла аҵакыратә акзаара иадгыланы, Аԥсни Аахыҵ Уаԥстәылеи рырратә базақәа ахьыҟоу иаҿагылани.