Аҟәа. Рашәарамза 12, 2024 шықәса. Аԥсныпресс. Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа раартра иадҳәалоу аныҳәатә церемониа мҩаԥысит Ҟазан ақалақь аҿы. Урҭ ирылаху апортсменцәа рпарад Аԥсны ала иалагеит.

Ареспублика аҳәынҭқарратә бираҟ кны дықәлеит аԥснытәи алегендартә шьапылампыласҩы Ахра Цәеиба.  

Аҟәа. Рашәарамза 12, 2024 шықәса. Аԥсныпресс. Еицырдыруа Аԥсны жәлар рартистка Нинель Бжьаниеи Аԥсны зҽаԥсазтәыз артистка Гәылиза Аҩӡбеи Аԥсны жәлар рартист, адирижиор, асахьаркыратә напхгаҩы Давид Терзиан напхгара зиҭо Аԥснытәи аҳәынҭқарратә камертә оркестри рдует Шәача ақалақь аҿы, апроект «Урыстәылеи Аԥсни раҟ-ааҟтәи аимдаратә культуратә усмҩаԥгатәқәа» («Обменные культурные мероприятия России и Абхазии») аҳәаақәа ирҭагӡаны аконцерт «Piano Duo & Orchestra»  мҩаԥысит.

Аконцерт Piano Duo & Orchestra апрограмма аҿы иҟан еиуеиԥшым аепохақәеи ажанрқәеи  ирыҵанакуа арҿиамҭақәа, ҳәа адырра ҟанаҵоит Аԥсны акультуура Аминистрра апресс-маҵзура.

Аҟәа. Рашәарамза 12, 2024 шықәса. Аԥсныпресс. Атәыла аԥыза-министр Алеқсандр Анқәаб иҟалаз амшцәгьа иахҟьаны ааха зауз Очамчыра араион ақыҭақәа рҿы  аиҭашьақәыргыларатә усурақәа рзы аусуратә еилатәара мҩаԥигеит. 

Аилатәара рхы аладырхәит аԥыза-министр ихаҭыԥуаҩ, афинансқәа рминистр Владимир Делба, аԥыза-министр ихаҭыԥуаҩ, аекономика аминистр Кристина Озган, шьаҭанкылатәи аиҭашьақәырыгылара Аусбарҭа анапхгаҩы Ҭемыр Агрба, Аҳәынҭқарратә Наплакы «Аԥсны аҟәарахьчара» адиректор Гәырам Ҳаразиа.

Гәырам Ҳаразиа аԥыза-министр адырра ииҭеит Џьгиарда ақыҭан Дӷамшь аӡиас аӡышьҭра аҿы аӡыхкыра ашьақәыргылара шымҩаԥысуа, уи иақәхарџьу аԥаратә хархәагақәа  20 млн. мааҭ рҟынӡа ишынаӡо, иара убас зхарџьынҵа 15,5 млн. мааҭ рҟынӡа инаӡо автомашьынатә цҳа аиҭашьақәыргылареи аӡиас аӡышьҭра арыцқьареи шымҩаԥгоу азы адырра ииҭеит.

Аҟәа. Рашәарамза 13, 2024 шықәса. Аԥсныпресс. Иахьа Апарламент аҿы аекономикатә политикеи ареформақәеи аинформациатә технологиақәеи рзы апарламенттә Еилакы аилатәара мҩаԥысит. Уи мҩаԥигеит Аилак ахантәаҩы ихаҭыԥуаҩ Бадрик Ԥлиа, ҳәа адырра ҟанаҵоит Апарламент апресс-маҵзура. 

Аилатәара рхы аладырхәит Апарламент адепутатцәа, аенергетикеи атранспорти Рминистрреи аилазаара ЗҲәА «Мой зеленый дом» ахаҭарнакцәа.  

Иахәаԥшын еиҭашьақәыргылаз ахыҵхырҭақәа рҟынтәи афымцамч агенерациеи ахархәареи рызҵаара. Ус уҳәар алшозар, аиаҵәара иахылҵуа аенергиа  ахыҵхырҭақәа рахь иаҵанакуеит аԥша, амра ашәахәақәа, аӡымҩасқәа, аӡыршыршәқәа (агеизерқәа), абиофымца. Урҭ рԥыжәара  аекологиа аԥырхагамхара иадҳәалоуп.

Аҟәа. Рашәарамза 13, 2024 шықәса. Аԥсныпресс. Ареспубликатә хәышәтәырҭа Хада аҿы амедицинатә усуҩцәа Ахылаԥшырҭа амедалқәа  «Аҭыԥантәи агәабзиарахьчара аҿы алагала азы», «Агәабзиарахьчараҿы зҽалызкааз», иара убас Амедицинатә усзуҩ Имш азы аҳаҭыртә шәҟәқәа ранашьара ацеремониа мҩаԥысит, ҳәа адырра ҟанаҵоит Аԥсны агәабзиарахьчара Аминистрра апресс-маҵзура.

Аҳамҭақәа ранаршьара мҩаԥыргеит атәыла агәабзиарахьчара аминистр Едуард Быҭәбеи агәабзиарахьчара аусзуҩцәа рзанааҭтә Еидгыла ахантәаҩы Марина Шанааи.

Аҟәа. Рашәарамза 13, 2024 шықәса. Аԥсныпресс. Шьамтәыла иҟоу Аԥсны ацҳаражәҳәаҩ Муҳаммад Али Урыстәылатәи Афедерациеи Шьамтәылатәи Арабтә Республикеи реизыҟазаашьақәа рырҿиара азы аҷыдалкаатә зинмчы змоу Урыстәыла Ахада ихаҭарнак, Шьамтәыла иҟоу Урыстәыла ацҳаражәҳәаҩ Алеқсандр Ефимов диԥылеит.

Аиԥылара аҿы Муҳаммад Али Алеқсандр Ефимов Урыстәыла Амш идиныҳәалеит, урыстәылатәи ажәлар аҭынчреи аҭышәынтәалареи аизҳазыӷьареи, иҿыцу аиааирақәеи аихьӡарақәеи рзеиӷьаишьеит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.

Аҟәа. Рашәарамза 13, 2024 шықәса. Аԥсныпресс.  Рашәарамза 12, 2024 шықәса рзы Аԥсны адәныҟатәи аусқәа рминистр инапынҵақәа назыгӡо Одиссеи Бигәаа Аахыҵ Кавказ аҭынчреи аҭышәынтәалареи рышьақәыгылара азы Жәларбжьаратәи женеватәи аиҿцәажәарақәа Рыцхантәаҩцәа  – Алада Кавказ ала Европатәи атәылақәа Реидгыла аҟынтәи иҷыдоу ахаҭарнак Тоиво Клаар, Еиду Амилаҭқәа Реиҿкаара ахаҭарнак Џьихан Султаноглу, иара убас Алада Кавказ ала Европатәи атәылақәа Реидгыла Ашәарҭадара Ахеилак ахантәаҩы   Виорел Мошану дырԥылеит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура..

Аԥснытәи аган аҟынтәи аиԥылара рхы аладырхәит Аԥсны АШәМ ахантәаҩ ихаҭыԥуаҩ Заал Хәарцкьиа, Женеватәи аиҿцәажәарақәа рлахәылацәа, Аԥсны адәныҟатәи аусқәа Рминистрра Аконсултә департамент анапхгаҩы Лаша Аҩӡбеи Ааигәа Мрагылареи Африкеи рдепартамент анапхгаҩы Артур Гагәылиеи.

Аҟәа. Рашәарамза 13, 2024 шықәса. Аԥсныпресс. Шьамтәыла иҟоу Аԥсны ацҳаражәҳәаҩ Муҳаммад Али Шьамтәыла аиустициа аминистр Ахммад Авад Аль-Саиед диԥылеит.

Аиԥылара аҿы Шьамтәыла аиустициа аминистр ҩ-ҳәынҭқаррак рыбжьара аизыҟазаашьақәа адипломатиатә ҩаӡара аҿы рырҿиареи рырӷәӷәареи иаҵоу аҵакы ахадара ахгәеиҭеит. Уи Шьамтәыла Ахада Башар Асад ажәларқәа ахьыԥшымразы рзинқәа рыхьчареи аҳәынҭқарра аҩныҵҟатәи аполитика аҽаламгалареи дшадгыло атәы далацәажәеит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.  

Аҟәа. Рашәарамза 13, 2024 шықәса. Аԥсныпресс. Атәыла аԥыза-министр Алеқсандр Анқәаби Урыстәылатәи Афедерациа аекономикатә ҿиара аминистр ихаҭыԥуаҩ Дмитри Вольвачи асоциал-економикатә усеицура азы аԥсны-урыстәылатәи Анапхгарабжьаратәи акомиссиа алахәылацәеи Урыстәыла анагӡаратә мчра афедералтә усбарҭақәа – аекономикатә ҿиара Аминистра, афымцамч Аминистрра, атранспорт Аминистрра, агәабзиарахьчара Аминистрра, аџьа Аминистрра, аҵара Аминистрра ахаҭарнакцәеи алархәны   аусуратә еиԥылара мҩаԥыргеит, ҳәа адырра ҟанаҵоит Аԥсны аминистрцәа Реилазаара апресс-маҵзура.

Ари аиԥылара рхы аладырхәит Аԥсны иҟоу Аҷыдалкаатә зинмчы змоу Урыстәылатәи Афедерациа Ацҳаражәҳәаҩ Михаил Шургалини Аԥсны иҟоу Урыстәыла ахәаахәҭратә хаҭарнак Залина Кобесовеи.

Аҟәа. Рашәарамза 13, 2024 шықәса. Аԥсныпресс. Рашәарамза 13 рзы Аԥсны Жәлар Реизара-Апарламент адепутатцәа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа иадҳәалоу аусмҩаԥгатәқәа рылахәхара аҳәаақәа ирҭагӡаны Аԥсны Жәлар Реизара-Апарламент  Аиҳабы  Лаша Ашәбеи Ареспублика Ҭаҭарсҭан Аҳәынҭхеилак ахантәаҩы Фарид Мухаметшини реиԥылара мҩаԥысит.

Аиԥылара рхы аладырхәит Аԥсны Жәлар Реизара-Апарламент Аиҳабы ихаҭыԥуаҩ Асҭамыр Аршба, акультуреи аҿари аспорти русқәақәа рзы апарламенттә Еилакы ахантәаҩы Венори Бебиа, аграртә политикеи аԥсабаратә ресурсқәеи аекологиеи рзы апарламенттә Еилакы ахантәаҩы ихаҭыԥуаҩ Демур Гогиа, Аԥсны Аҳәынҭқарра Амилаҭтә олимпиатә Комитет апрезидент Валери Аршба.