Аҟәа. Рашәарамза 28, 2024 шықәса. Аԥсныпресс. Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аиааирақәеи аԥхьахәқәеи згаз аспортсменцәа рыдкылара иадҳәалоу аныҳәатә церемониа мҩаԥысит Аҟәа ақалақь Аминистрцәа Реилазаара аконференц-зал аҿы.

Аспортсменцәа ирыдныҳәаларц арахь имҩахыҵит Аҳәынҭқарра Ахада Аслан Бжьаниа, Аҳәынҭқарра Ахада Иусбарҭа анапхгаҩы Абесалом Кәарҷиа, Жәлар Реизара-Апарламент Аиҳабы Лаша Ашәба, Аԥсны иҟоу Урыстәылатәи Афедерациа Ацҳаражәҳәаҩ Михаил Шургаин, атәыла Анапхгара алахәылацәа, адепутатцәа, апортсменцәа разыҟаҵаҩцәа.

Аусмҩаԥгатә алагаанӡа игеит Аԥсны Аҳәынҭқарратә гимн.

Аҳәынҭқарра Ахада Аслан Бжьаниа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа ирылахәыз аԥсуа спортсменцәа дрыдныҳәалеит.

«Ахада иқәгылараҿы иҳәеит: 

"Акыр иаԥсоу аҩызцәа!

Гәык-ԥсык ала ишәыдысныҳәалоит аԥсуа спорт аҭоурых аҟны иҟалаз ахҭыс ду   - ҳмилаҭтә еизгоу акоманда Ҟазан имҩаԥысуаз Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рылахәра. Раԥхьаӡакәны Аԥсны Аҳәынҭқарра аспортсменцәа рбираҟ иаҵагыланы жәларбжьаратәи аҵакы змоу аицлабрақәа рылахәразы аҭагылазаашьа роуит. Ари алыршахеит Аԥсны Аҳәынҭқарра Анапхгареи Урыстәылатәи Афедерациеи Анапхгареи ирыбзоураны.

Аԥсны акоманда Ҟазан иқәгылеит иаԥсаны, шьҭахьҟа ахьамҵра, агәаӷьра, аиааиразы ахамеигӡареиԥш иҟоу ҳажәлар иреиӷьу рҟазшьа аҷыдарақәа аарԥшны. Ари раԥхьаӡакәны абас еиԥш аҩаӡара змоу ахәмаррақәа ирылахәхаз ҳкоманда 91 тәыла рыбжьара 13-тәи аҭыԥ аанкылареи, 7 медалк риуреи, ахьтәы, араӡны медали, аџьазтә медалқәа 5 - еи риураҟны ирыцхрааит», – ҳәа иҳәеит Аслан Бжьаниа.   

Аҟәа. Рашәарамза 28, 2024 шықәса. Аԥсныпресс.  Аԥсны Аконституциатә Ӡбарҭа ахантәаҩы Диана Ԥлиеи Аконституциатә Ӡбарҭа аӡбаҩ Алиса Бигәааи ХII Петербургтәи жәларбжьаратәи азиндырратә форум аусура рхы аладырхәуеит.

Афорум атема хада – «Аглобалтә еибакапанра – азин ашьаҭа аҳасабалеи азинеиҟарара ашьаҭала ишьақәгылоу адунеи аҿы  аҳәынҭқаррақәа рыбжьара аусеицуреи».  

Петербургтәи жәларбжьаратәи азиндырратә форум – азиндырратә, аусдкыларатә, аполитикатә, азинхьчаратә еилазаарақәа рхаҭарнакцәа рыбжьара атәылауаа ринтересқәа рыхьчаразы азин, азинрхчаратә ԥышәеи аусуреи реиӷьтәра, азинтә культура аҿиареи ҳаамҭазтәи аҭагылазаашьақәа рҿы асоциал-економикатә усхкы аҭышәынтәалареи ралыршара, уҳәа азҵаарақәа рылацәажәара хықәыс иҟаҵаны адиалог амҩаԥгаразы иреиҳау плошьадканы иҟоуп.

Афорум аусутә программа иалагалоуп 120 инареиҳаны аусмҩаԥгатәқәа – аконференциақәа, астол гьежьқәа, аусуратә сессиақәа.  

Аԥсны Аконституциатә Ӡбарҭа ахантәаҩы Диана Ԥлиа азинқәа рыхьчареи аконституциатә хылаԥшреи  ирызкны имҩаԥгаз аконференциа аҿы «Аконституциатә хылаԥшра – Ареспублика Аԥсны аҳәнҭқарратә шьақәгылара аҿиара азы ихадоу факторны иҟоуп» ҳәа атема ала ажәахә ҟаҵо дықәгылеит.

Аҟәа. Рашәарамза 28, 2024 шықәса. Аԥсныпресс. Аԥсны аиустициа аминистр Анри Барцыц XII Петербургтәи жәларбжьаратәи азиндырратә форум аҳәаақәа ирҭагӡаны имҩаԥысыз аиустициа аминистрцәа  иаарту реилатәара ихы алаирхәит.

Урыстәылатәи Афедерациа аиустициа аминистр Контантин Чуиченко ихантәаҩрала имҩаԥысуаз аилатәара рхы аладырхәит адунеи  20 тәыла рҟынтәи аиустициа аминистрцәа.

Аусмҩаԥгатә иаарту аилатәара аформат ала имҩаԥысит. Араҟа аминистрцәа азакәанԥҵара асистематизациеи аиӷьтәреи, аиашаӡбара алыршара, аимак-аиҿакқәа рҭышәынтәалара амеханизқәа рыҿиара, азиндырра  ацифратә формат ахь аиагара, даҽакала иуҳәозар аԥхьаӡацыркра, ашьаус-нагӡаратә система арҿиара,  зус ӡбоу рсоциалтә адаптациеи дара рзы иҿыцу аҭагылазаашьақәа ранраалареи, уҳәа ирыдҳәалоу азҵаарақәа жәпакы инарҭбааны ирылацәажәеит.

Ареспублика Аԥсны Аконституциа иарбоу ифундаменталу азинқәа дырзааҭгыло, Анри Барцыц инаҵшьны иазгәеиҭеит: «30 шықәса раԥхьа ҳаамҭазтәи аԥсныти Аконституциа аԥҵаҩцәа-ашьаҭаркыҩцәа даара имариамыз аибашьрашьҭахьтәи аамҭазтәи аҭагылазаашьақәа раан ихадоу анорматә усшәҟәы еиқәдыршәеит, уи иахьа уажәраанӡагьы актуалра шамац иаанхоит.

Аԥсны ажәлар насыԥ рыман ари акыр зҵазкуаз аиҭашәаратә аҭоурыхтә аамҭа азы амилаҭтә хақәиҭратә қәԥара ахадараҿы амилаҭтә ԥыза ду Владислав Григори-иԥа Арӡынба аԥхьа днаргыланы, аԥышәа ду змаз, ахара ихәыцуаз аҳәынҭқарратә усзуҩцәа ахьыҟаз».

Рашәарамза 27 рзы иара убас имҩаԥысит афорум апленартә еилатәарагьы. Уи, шьҭа традициала ишышьақәгылахьоу еиԥш, ихы алаирхәит Урыстәылатәи Афедерациа Ашәарҭадара Ахеилак ахантәаҩы ихаҭыԥуаҩ Дмитри Медведев.

Аҟәа. Рашәарамза 28, 2024 шықәса. Аԥсныпресс. Рашәарамза    27, 2024 шықәса рзы Аҟәа ақалақь Апрокуратура Аҟәа ақалақь аҩныҵҟатәи аусқәа Русбарҭа амилициа апункт «Алашарбага» аусҭҵааразы азинмчы змоу амилициа алеитенант Манча Иасон-иԥа Кьихьба иганахьала Аԥсны Аҳәынҭқарра Ашьаустә Заканеидкыла ахәҭаҷ 288, ахәҭа З, апункт «а» иазԥхьагәанаҭо ацәгьоура аҟазшьақәа рыла аусеилыргара хацнаркит.    

Аҟәа. Рашәарамза 22, 2024 шықәса. Аԥсныпресс. Аԥсны Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рыҟны раԥхьатәи ахьтәы медал аиуит. 

Аԥсны аизакырҭаҿ раԥхьатәи ахьтәы медал ҭаиршәит абоксиор қәыԥш Герман Арџьениа. Абри атәы аанацҳауеит Аԥсны аҿари аспорти рзы Аҳәынҭқарратә Еилакы. Афиналтә еиндаҭлара аҿы уи Узбекьысҭантәи аспортсмент дииааит.

Герман Арџьениа дықәгылон зыкапан 60 кьыла иҟоу рыбжьара. Афинал аҟны иара Узбекьысҭантәи аспортсмен дииааит.

Ииааира атәы дазааҭгыло абоксиор иҳәеит: «Сара сзы гәахәара дууп сыԥсадгьыл ахьӡала сахьықәгыло, Аԥсны абираҟ сахьаҵагылоу. Ҳтәыла раԥхьаӡа акәны ас еиԥш аҩаӡара ҳаракы змоу  аспорттә усмҩаԥгатә ахь ааԥхьара аиуит. Сара даара сызгәдууп среспублика азы ахьтәы медал аиура ахьсылшаз», - ҳәа аиндаҭлара ашьҭахь иҳәеит Герман Арџьениа.

Аҟәа. Рашәарамза 22, 2024 шықәса. Аԥсныпресс. Рашәарамза 22 рзы  Аҟәа ақалақь аҿы Аџьынџьтәылатә еибашьра Дуӡӡа аналагаз амш инамаданы агәаларшәареи алахьеиқәреи иазкыз аусмҩаԥгатә мҩаԥысит.

83 шықәса раԥхьа, рашәара 22, 1941 шықәсазы, ашырԥазы, асааҭ ԥшьба инарзынаԥшуа афашисттә Германиа Асовет Еидгыла иақәлеит. Иалагеит 1941 – 1945 шш. Аџьынџьтәылатә еибашьра Дуӡӡа. Усҟан Аԥсадгьыл ду ахьчаразы иҩагылеит 55,5 нызқьҩык Аԥсны аԥацәеи аԥҳацәеи, урҭ рахьынтә 17,5 нызқьҩык рышьҭахьҟа изыхнымҳәӡеит, аибашьра адәаҿы иаанхеит.

Иахьа, Аҟәа ақалақь аҿы агәаларшәареи алахьеиқәреи рымш азы Аҟәа, Диаскураа рыԥшаҳәа аҿы игылоу Идырым асолдаҭ ибаҟа амҵан ашәҭқәа шьҭарҵеит.

Идырым асолдаҭ ибаҟа амҵан ашәҭшьыҵәрақәа шьҭарҵеит Аԥсны Аҳәынҭқарра Ахада Иусбарҭа анапхгаҩы Абесалом Кәарҷиа, аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанба, аԥыза-министр ихаҭыԥуаҩ, афинансқәа рминистр Владимир Делба, аминистрцәа Реилазаара алахәылацәа, Аԥсны иҟоу Урыстәыла ацҳаражәаҩ Михаил Шургалин, Ацҳаражәҳәарҭеи Аԥсны иҟоу Урыстәыла аус ацура азы Ахаҭаранакреи русзуҩцәа, Аԥсни Урыстәылеи рыруаа, ауаажәларра.

Араҟа имҩаԥган амитинг, игеит Аԥсни Асовет Еидгылеии ргимнқәа.

Аҟәа. Рашәарамза 23, 2024 шықәса. Аԥсныпресс.  Атәыла аҩныҵҟатәи аусқәа Рминистрра Аушьҭра-гәаҭаратә Ҭыԥ «Ԥсоу» аҿы иҟалаз аиҿахысра иалахәыз рхаҭара ашьақәыргылареи раанкылареи иазку аоператив-ԥшааратә усмҩаԥгатәқәа мҩаԥыргоит, ҳәа адырра ҟанаҵоит Аминистрра апресс-маҵзура.

Аушьҭра-гәаҭаратә Ҭыԥ «Ԥсоу» иахьаҵанакуа аиҿахысра шыҟалаз азы аҩныҵҟатәи аусқәа Рминистрра аҷаԥшьаратә ҟәша ахь адырра ҟалеит рашәарамза  23, 16 сааҭи 55 минуҭи инарзынаԥшуа рзы.

Аԥсны аҩныҵҟатәи аусқәа Рминистрра ашьаусԥшааратә ҟәша аусзуҩцәа иарбоу ацәгьоура аҿы игәҩароу ахаҿқәа рхаҭара шьақәдыргылеит.

Иҟалаз аиҿахысра иахҟьаны ахәрақәа роуит ԥшьҩык Аԥсны атәылауаа.

Аҟәа. Рашәарамза 23, 2024 шықәса. Аԥсныпресс.  Урыстәыла аспорт аминистр Михаил Дегтиариов Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рымҩаԥгара аҳәаақәа ирҭагӡаны, Ҟазан ақалақь, Поволжтәи аҳәынҭқарратә абҩарҵәыреи аспорти атуризми руниверситет аҵакыра аҿы  Ахәмаррақәа ирылаху атәылақәа рҟынтәи аспорт аминистрцәа дырԥылеит. Имҩаԥысит иара убас Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагбеи иареи реиԥыларагьы.

Урыстәыла аспорт аминистр аԥснытәи иколлега раԥхьатәи ахьтәы медал аиуреи иааизакны аԥснытәи акоманда Ахәмаррақәа рҿы иамоу аихьӡарақәеи идиныҳәалеит.

«Аԥсны жәлар зегьы, аспорттә еилазаара ахаҭарнакцәа, Аҳәынҭқарра Ахада  срыдныҳәалоит» – ҳәа иҳәеит Михаил Дегтиариов.

Иара Аԥсни Урыстәылеи аспорт аганахьала аимадара бзиа шрыбжьоу, аԥснытәи аспортсменцәа Урыстәыла имҩаԥысуа еиуеиԥшым атурнирқәа рҿы қәҿиарала ишықәгыло азгәеиҭеит.

«Ҳара есымша гәахәарыла иҳадаҳкылоит аԥсуа спортсменцәа ҳара имҩаԥааго аицлабрақәа рҿы рылахәхара. Ҳара ҳганахьала иҳалшо ала адгылара ҟаҳҵалоит. Ахырхарҭақәа зегьы рыла аиҩызареи аидгылареи ҳшазхиоу азгәаҳҭоит», -ҳәа иҳәеит Михаил Дектиариов.

Ҭарашь Ҳагба Михаил Дегтиариов идиныҳәалеит иара аспорт аминистрс иҟаҵара.  

Аҟәа. Рашәарамза 26, 2024 шықәса. Аԥсныпресс.  Аԥсны Ахада Аслан Бжьаниа Ашәарҭадара ахеилак изаамҭанытәиу аилатәара мҩаԥигеит.

Ашәарҭадара амаҵзура алахәцәа аҳәынҭқарра аҩныҵҟатәии адәныҟатәии аполитиказы иактуалтәу азҵаарақәа ирылацәажәеит. Адискуссиа аҳәаақәа ирҭагӡаны иазааҭгылеит Аԥсны Аҳәынҭқарраҟны арратә ԥхықәреи арратә маҵзуреи рзы азакәанԥҵара аиӷьтәра азҵаара. Ирыхәаԥшит арратә маҵзурахьы аԥхьара аҩаӡара ашьҭыхра азҵаарагьы. 

Аҟәа. Рашәарамза 24, 2024 шықәса. Аԥсныпресс. Аԥсны ААР анаркотикқәа рхылаԥшреи реикәыршареи рзы Аусбарҭа аусзуҩцәа ҩаԥхьа мҿхакы ҭбаала анаркотикатә маҭәашьарқәа рыларҵәара назыгӡоз дааныркылеит. Уажәазы анарктикқәа рхылаԥшреи реикәыршареи рзы Аусбарҭа аусзуҩцәа аларҵәара аканал аиҿкааҩ ихаҭа иаанкылара рылшеит. Уи Гәымсҭа аӡиас аԥшаҳәа иахьҵанакуа абнараҿы ицәыҵаҵәахны имаз зыкапан рацәоу анаркотикатә маҭәашьар идырбалеит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.