Аҟәа. Ԥхынгәымза 2, 2024 шықәса. Аԥсныпресс. Ԥхынгәымза 2 рзы Одиссеи Бигәааи Приднестровтәи Молдавтәи Ареспублика аофициалтә хаҭарнак Гарри Кәпалбеи реиԥылара мҩаԥысит, ҳәа адырра ҟанаҵоит Аԥсны адәныҟатәи аусқәа Рминистрра аофициалтә саит.

Аиԥылара аҳәаақәа ирҭагӡаны Одиссеи Бигәааи Гарри Кәпалбеи Кавказнҭыҵ аҭынчреи аҭышәынтәалареи рзы Жәларбжьаратәи  Женеватәи аилацәажәарақәа 61-тәи араунд алҵшәақәа ирылацәажәеит, Урыстәыла иҟанаҵаз адгылара ҷыдала иазааҭгылеит.

Аҟәа. Ԥхынгәымза 2,  2024 шықәса. Аԥсныпресс. Очамчыра араион Мықә ақыҭан иҿыцу аӡеизгарҭатә  бааш аргылара иаҿуп. Уи аҭыԥантәи ашколи 28 ҭаацәареи аӡрыжәтә ала реиқәыршәара алнаршоит.

58-ҩык ахәыҷқәа ахьҭоу аҭыԥантәи ашкол аҿы акыр ауадаҩрақәа ыҟан аӡы амамзаара иадҳәаланы. Ашкол адиректор инапынҵақәа назыгӡо Изольда Ҭарба ашықәсҿцтәи аныҳәақәа раламҭалазы уаанӡа иҟаз аӡыҭра (абак) анкаҳа ашьҭахь, ашкол ӡыла аиқәыршәара зынӡа иаанкылеит ҳәа иазгәалҭеит.

«Ааигәа иҟаз аҵеиџь аҟынтәи аӡы изеиԥшразаалак асанитартә нормақәа ирықәшәомызт. Убри аан иазгәаҭатәуп ашкол аҿы ишаҭаху атехникатә ӡы адагьы аӡрыжәтәгьы. Ҳара дҳацхрааит ақыҭа ахада, иара ашкол ҳамҭас иаиҭеит аӡшьарҭра. Уи егьи ақыҭа аҟынтәи иааргоз аӡы ала идырҭәуан. Ҳара даара ҳаигәырӷьоит цәыббрамзазы, аҵарашықәс ҿыц аламҭалазы ашкол ӡыла аиқәыршәара ахьеиҭашьақәыргылахо», – ҳәа илҳәеит Изольда Ҭарба.

Аҟәа. Ԥхынгәымза 2, 2024 шықәса. Аԥсныпресс. Аԥснытәи аҳәынҭқарратә Университет аҿы абитуриентцәа рҟынтәи аҵараиурҭа аҭаларазы аусшәҟәқәа рыдкылара иалагеит.

Аусшәҟәқәа рыдыркылалоит ԥхынгәымза 14 аҟынӡа.

ААУ адкыларатә комиссиа аҭакзыԥхықә маӡанаыҟәгаҩ  Адгәыр Каоба иҟаиҵаз адыррақәа рыла, сынтәа ишьақәырӷәӷәоуп абитуриентцәа рыдкылара аплан: 374 абиуџьеттә ҭыԥқәа, иара убас 590 зыхә ршәо аҭыԥқәа.  Ашколхәыҷқәа ролимпиада «Аҳаракырақәа рахь амҩа» аихшьаалақәа рыла, 109-ҩык абитуриентцәа ауниверситет ахыԥхьаӡаларазы рыдгалара мҩаԥгоуп, урҭ мацара адкыларатә комиссиа ахь аусшәҟәқәа аларҵароуп.

«Сынтәа абиуџьеттә ҭыԥқәа 39 рыла еиҳауп иҳаҩсыз ашықәс азы аасҭа. Есышықәса абиуџьеттә ҭыԥқәа рхыԥхьаӡара иацлоит.  Ари аҟара абиутуриентцәа ҳара уажәраанӡа иҳадҳамкылаӡацызт», – ҳәа иҳәеит Адгәыр Какоба.

Аҟәа. Ԥхынгәымза 1, 2024 шықәса. Аԥсныпресс.  Ԥхынгәыза 30, 2024 шықәса рзы Аҟәа ақалақь Апрокуратура аҳәарала Аҟәатәи ақалақьтә ӡбарҭа аӡбарала, Аҟәа ақалақь амилициа актәи аҟәша ахь амаҵуратә уалԥшьа анагӡаразы инашьҭыз Аҟәа ақалақь аҩныҵҟатәи аусқәа Русбарҭа амилициа апункт «Алашарбага» аусҭҵааразы азинмчы змоу амилициа алеитенант Манча Иасон-иԥа Кьихьба ҩымз ҳәа дырбаандаҩуп.

Аҟәа. Ԥхынгәымза 2, 2024 шықәса. Аԥсныпресс. Аӡиудо азы XVI Жәларбжьаратәи атурнир  «Аԥсны Ахраҿа» аартра иазку аныҳәатә церемониа мҩаԥысит Аҟәа ақалақь, Сергеи Багаԥшь ихьӡ зху аспорт Ахан аҿы.

Аицлабрақәа рхы аладырхәуеит Аԥсны, Белоруссиа, Урыстәыла (Адыгеиа,  ДЖәР, Камчатка, Ростовтәи аобласт) рҟынтәи хышәҩык инареиҳаны 2008-2010, 2011-2012, 2013-2014 шш. рзы ииз арԥарцәеи аҭыԥҳацәеи.   Атурнир аҳәаақәа ирҭагӡаны 2015-2016  шықәсазы ииз арԥарцәа рзы еиҵаӡоу аразриадқәа ирыҵанакуа рыбжьаратәи аицлабрақәа мҩаԥгахоит.

Аицлабрақәа ирылахәхо ирыдныҳәалеит ақәҿиарақәагьы рзеиӷьаршьеит атурнир аӡбаҩ Хада Мекзум Алимови Аҟәа ақалақь Ахадара аҿари аспорти русқәа рзы Аусбарҭа анапхгаҩы Ельза Ҳагбеи.

Аҟәа. Ԥхынгәымза 1, 2024 шықәса. Аԥсныпресс.  Ԥхынгәымза 2 инаркны ԥхынгәымза 6 аҟынӡа  Аҟәа ақалақь аҿы имҩаԥыслоит «Сергеи Уасил-иԥа Багаԥшь игәалашәара Ахраҿа агара азы» ахацәа ркомандақәа рыбжьара амҵәышәмпыл азы Жәларбжьаратәи атурнир, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Атурнир иалахәхоит аа-командак:  Аԥсны Урыстәылеи (Ҟарачы-Черқьесстәи Ареспублика, Краснодартәи атәылаҿацә, Лугансктәи Жәлартә Республика, Волгоград, Владикавказ, Ростовтәи аобласт аҟынтәи акомандақәа ҩба).

Аҟәа. Ԥхынгәымза  2,  2024 шықәса. Аԥсныпресс. 2024 шықәса фымз рыла 23 222-ҩык апассаџьырцәа  афымцадәыӷба «Ласточка» ала рыиагара алыршахеит.

Зегь реиҳа апассаџьырцәа Аԥсныҟа иааит рашәарамзазы - 7 890-ҩык, мшаԥымзазы - 5 861-ҩык, лаҵарамзазы - 4 032-ҩык, хәажәкырамзазы - 2 400-ҩык, ажьырныҳәамзазы - 1 719-ҩык, жәабранмзазы – 1 320 –ҩык.

Афымцадәыӷба «Ласточка» рашәарамза 8, 2023 шықәса инаркны Шәачеи Гагреи ирыбжьоуп.

Аҟәа. Ԥхынгәымза 2, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Тамшь ақыҭаҟны 31 шықәса раԥхьа Тамшьтәи адесант аӡхыҵра амш аҽны Ахьӡ-Аԥша Абаҟаҟны ашәҭшьыҵәрақәа шьҭеиҵеит.

Ашәҭшьҭаҵара ацеремониа иалахәын 1992-1993 шш. Аԥсны Аџьынџьтәылатә еибашьра аветеранцәа, Аҳәынҭқарра Ахада Иусбарҭа анапхгаҩы Абесалом Кәарҷиа, Жәлар Реизара-Апарламент Аиҳабы Лаша Ашәба, аиҳабыра алахәцәа, Администрациақәеи ақыҭақәеи рхадацәа, ауаажәларра рхаҭарнакцәа.

Аҟәа. Ԥхынгәымза 2, 2024 шықәса. Аԥсныпресс. Ԥхынгәымза 2 рзы 1992-1993 шықәсқәа раантәи Аԥсны жәлар Рџьынџьтәылатә еибашьра иналукааша адаҟьақәа иреиуоу, «Тамшьтәи аоперациа» ҳәа хьӡыс изауыз арра-мшынтә десант аӡхыҵра ҟалеижьҭеи 31 шықәса ҵуеит.

Рашәарамза анҵәамҭазы, 1993 шықәса рзы Аԥсны Арбџьармчқәа анапхгара аҳҭнықалақь ахақәиҭтәра азы ажәыларатә операциа амҩаԥгара алзыршоз Аҟәа араион Шрома ақыҭеи астратегиатә ҵакы змоу Аҟәа ақалақь аҩада-мрагыларатәи аганахьала аҳаракырақәеи   ргара азы аӡбамҭа аднакылеит.

Ԥхынгәымза 2, 1993 шықәса рзы ақырҭуа ар иназыцҵоу  архәҭақәа Аҟәа ақалақь ахь рыиагара аԥхьырҟәҟәаареи уаҟа иҟоу ақырҭуа архәҭақәа аблокада азуреи рзы, Тамшь ақыҭан   300-ҩык инарзынаԥшуа рыла ишьақәгылаз арра-мшынтә десант ӡхыҵит.  Адесант хыдҵас иаман амҩаду хада «Очамчыра–Аҟәа» аанкылареи жәамз инареиҳаны амацәаз иҭакыз Ҭҟәарчал ақалақь ахьчараз игылаз арууаа алархәны ажәыларатә операциа амҩаԥгареи.

Аҟәа. Рашәарамза 26, 2024 шықәса. Аԥсныпресс. Аԥсны зҽаԥсазтәыз азыҟаҵаҩ А. М. Седов игәалашәара иазку ахацәа ркомандақәа рыбжьара амҵәышәмпыл азы  I Жәларбжьаратәи атурнир Аҟәа ақалақь аҿы иалагеит.

Аԥснытәи ԥшь-командаки Ҟарачы-Черқьесиатә Ареспублика аҳҭнықалақь Черқьесскынтәи акомандеи атурнир ачемпион ҳәа ахьӡ азы еицлаблоит.

Урыстәыла аус ацуразы Аԥсны иҟоу Ахаҭарнакра анапхгаҩы Дмитри Федотов аспортсменцәа атурнир аартра рыдиныҳәалеит: