Аилатәара аартуа, Владимир Делба инаҵшьны иазгәеиҭеит: имаҷуи ибжьаратәуи абизнес адгылара аҭара апрограмма – аекономика аҿиаразы зегьы реиҳа аеффективра злоу аинструментқәа иреиуоуп.

«Ҳара ибзианы иаабоит ари амодель Урыстәыла аус шауа. Иахьа акыр ихадоуп шьаҿа-шьаҿала ахырхарҭақәа рыструктура, апроценттә қәҵақәеи егьырҭ акыр зҵазкуа апараметрқәеи рыҭҵаара», — ҳәа иазгәеиҭеит аԥыза-министр.

Сергеи Назаров аԥснытәи аусдкылаҩцәа рзы альготатә кредитҭара аиҿкааразы аӡбамҭа урыстәылатәи аган аҿы ирыдыркылахьеит ҳәа адырра ирҵабыргит. Уи иажәақәа рыла, амеханизмқәа еиқәшаҳаҭуп, мацара апроектқәа ралкаареи абанкқәа рылахәхареи азҵаарақәа  аанханы иҟоуп.

«Ҳара иазԥхьагәаҭаны иҳамоуп имаҷууи ибжьаратәуи абизнес адгылара аҭара ишиашоу асубсидиақәа разоужьрала адагьы абанкттә капитал адыԥхьаларалагьы анагӡара», - ҳәа иҳәеит иара.

Хазы аилатәара иалахәыз глемпинг ҳәа изышьҭоу – Аԥсны еиҳа аперспектива злоу атуристтә хырхарҭақәа иреиуоу аҿиара иалацәажәеит. Урыстәыла 2026 шықәсазы иарбоу ахықәкқәа рзы 150 млн. мааҭ азоужьра азԥхьагәанаҭоит.

«Уажәы хымԥада еилкаатәуп, афинансыркреи аицфинансыркреи злашьақәгылало апринципқәа. Ҳара аԥышәа ҳамоуп, шәара шәакәзар ишәымоу аҷыдарақәа ҳасаб азуны аӡбамҭақәа рыдгалара шәылшоит», - ҳәа инаҵшьны иазгәеиҭеит Сергеи Назаров.

Аилатәара аҩганк ишазыԥшу ала, Аԥсны атуристтә инфраструктура аҿиареи аинвестициақәа иҿыцу аимпульс азҭо имаҷуи ибжьаратәуи аусдкылара адгылара аҭаразы аҩганктәи  апрограмма ашьақәыргыларазы даҽа хра злоу шьҿакны иҟалеит.