Аиҿцәажәарақәа аҩбатәи рымш аусура дахцәажәо аԥснытәи аделегациа ахадараҿы иҟаз  адәныҟатәи аусқәа рминистр Олег Барцыц иҳәеит:

«Ареспублика Аԥсны аделегациа Еиду Амилаҭқәа Реиҿкаара, Европатәи атәылақәа Реидгыла, Европатәи атәылақәа Реидгыла Ашәарҭадара Ахеилак рҟынтәи ацхынтәаҩцәеи, иара убас адискуссиақәа ирылахәыз зегьи рҟынӡа  ҳпозициа аартны, инақәырӷәӷәаны иаҳҳәеит. Ҳрылацәажәеит акыр шықәса рыҩныҵҟа арегион аҿы иҟоу аҭагылазаашьақәа. Иҟоуп ихьыԥшым аҳәынҭқаррақәа: Аԥсны Аҳәынҭқарра, Аахыҵ Уаԥстәылатәи Ареспублика. Уи азхаҵатәуп – мрагыларатәи ҳгәылацәа иргәаԥха-иргәамԥха. Урыстәыла адгылара абзоурала, ҳара ҳхатәы ҳәынҭқарратә проект шьақәҳаргылоит, уи анагӡара, арӷәӷәара ҳаҿуп, ари ҳаамҭазтәи иҟаҵәҟьоу аҵабыргқәа иреиуоуп».

Аминистр иажәақәа рыла, аԥснытәи аделегациа агуманитартә зҵаарақәа рзы аҩбатәи агәыԥ аусура активла ахы аланархәуан.

Олег Барцыц аибашьратә мчы ахархәара мап ацәкразы аиқәшаҳаҭра анапаҵыҩра алыршара ҳхықәкы хаданы иҟоуп ҳәа инаҵшьны иазгәеиҭеит.

«Қырҭтәыла арегион аҿы иҟоу аиҭакра ҿыцқәа, ҳаамҭазтәи иҟаҵәҟьоу аҵабыргқәа – аигәыларатә ихьыԥшым ҩ-ҳәынҭқаррак – Аԥсни Аахыҵ Уаԥстәылеи рыҟазаара разхьамԥшразы аҽазышәарақәа лҵшәадахоит. Ари атезис иақәшаҳаҭуп урыстәылатәи аахыҵ-уаԥстәылатәи аделегациақәа. Сара агәра ганы сыҟоуп, ҳара иахьа ари акыр зҵазкуа, хыԥхьаӡара рацәала ауаа рыԥсҭазаара ианыруа аусшәҟәы аԥҵара аганахьала даҽа шьаҟак шыҟаҳҵаз», – ҳәа иазгәеиҭеит Олег Барцыц.