Аҟәа. Лаҵарамза 25, 2024 шықәса. Аԥсныпресс. Аҳәынҭқарра Ахада Аслан Бжьаниа иҟаиҵаз адгылара ала акультура-усуратә платформа «Гәума» аҟны аусура иалагеит ашколҳәыҷқәа рзы ԥшьымз ицо апроект «Акультуратә марафон».

Аҳәынҭқарра Ахада актәи амш азы аусмҩаԥгатә даҭааит, Акультура-усуратә платформа «Гәума» ахаҭарнакцәа, уи иалахәу ахәыҷқәа, иара убас аԥышәеимдаразы аусмҩаԥгатә зҽалазырхәыз аҭҵаарадырреи аҟазареи рхаҭарнакцәа аихьӡарақәа рзеиӷьеишьеит. 

Аҟәа. Лаҵарамза 25, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа аҳҭнықалақь аҟны аиҭашьақәыргыларатә усурақәа ахьцо аобиектқәа жәпакы дырҭааит.

Аҟәа ақалақь амҩаду хадақәа руак – Владилав Арӡынба ихьӡ зху амҩа акаҭран ықәырҵоит. Иазԥхьагәаҭоуп 800 метра амҩа ахҟьара. Аҳҭнықалақь ахада Беслан Ешба аргылартә усура иақәхарџьхо атәы иҳәеит: «Ахарџьқәа  аҭыԥантәи абиуџьет аҟынтә иаагоуп, урҭ ирыцҵоуп Шәара шәҟынтә иҳауз ацхыраара - 10 млн. мааҭ». Иара убас Аҳәынҭқарра Ахада иеиҳәеит Басариеи Титовеи амҩадуқәа иаарласны реиҭашьақәыргылара нап шаркхо.

Анаҩс, Аҳәынҭқарра Ахада ирбахеит Аиааира Апроспект аҟны абетон ақәҵаразы ицо аусурақәа.

Аҳәынҭқарра Ахада иусуратә ныҟәарақәа аҳәаақәа ирҭагӡаны аиҭашьақәыргыларатә усурақәа ахьцо ахәыҷбаҳча  «Аԥра» даҭааит. Амуниципалттә усбарҭа «Ақалақьргыларапроект» адиректор Асҭамыр Ԥиԥиа иҳәеит иԥхоу адашьма   шышьҭаҵоу, иахәҭоу акоммуникациақәа шышьақәыргылоу. «Ахԥатәи акорпус аҟны аусурақәа ахыркәшарахь инеиуеит. Анаҩс нап аҳаркуеит аҩбатәии актәии акорпусқәа»,- ҳәа иазгәеиҭеит иара.

Аҟәа. Лаҵарамза 22, 2024 шықәса. Аԥсныпресс.  Лаҵарамза инаркны нанҳәамзанӡа Аҟәа ақалақь, Акультура-усуратә платформа «Гәыма» аҿы Аҳәынҭқарра Ахада Иусбарҭа ацхыраарала инагӡахоит ашколхәыҷқәа рзы апроект «Акультуратә марафон». Уи иалагалахоит алекциақәа рсериа – аԥснытәи анаукеи акультуреи русзуҩцәа имҩаԥырго амастер-классқәа.

Апроект ахықәкы хаданы иҟоуп  –– еиҵагыло абиԥара Аԥсны акультуреи аҭоурыхи рырдырреи аԥсуа жәлар рытрадициақәа, рмузыка, рнапҟазара атәы еиҳа инарҭбааны рилыркаареи рзы иуникалу аҟазара аусзуҩцәеи дареи реибыдырреи реицыҟазаареи. Иазԥхьагәаҭоуп жәлар рмузыкатә инструментқәа роркестр алархәны амилаҭтә музыка аконцертқәа рымҩаԥгара, иара убас иԥхьагылоу аҵарауаа рлекциақәа, асахьаҭыхыҩцәа, анапҟазара аҟазаҩцәеи рҟынтәи амастер-классқәа рымҩаԥгара.

Аҟәа. Лаҵарамза 22, 2024 шықәса. Аԥсныпресс.  Аҳәынҭқарратә автоинспекциа аҿы амҩа-транспорттә ԥҟарақәа реилагара автофиксациа азы амобилтә комплекс «Рубеж» ахархәаразы иаларгалеит.

Шьҭарнахыс Аҳәынҭқарратә автоинспекциа аусзуҩцәа амҩаҿы аныҟәара аганахьала иҟаҵаз административтә зинеилагарақәа рзы адыррақәа зегьы рбара рылшоит астационартә ԥыԥшырҭақәа рҿы адагьы Амҩа-Ԥыԥшырҭатә Маҵзура амашьынақәа рыҿгьы, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура. Лаҵарамза 20 рзы амобилтә комплекс «Рубеж» ахархәарала   имҩаԥысит раԥхьатәи ареидтә профилактикатә усмҩаԥгатә. Ареид амҩаԥысшьа гәеиҭон аҩныҵҟатәи аусқәа рминистр Роберт Киут.

Аҟәа. Лаҵарамза 21, 2024 шықәса. Аԥсныпресс.  Лаҵарамза 21 рзы Аԥсны зегьы иахьаҵанакуа еиԥш, Гагра ақалақь аҿгьы Кавказтәи аибашьра иалаӡыз – амҳаџьыраа ргәаладыршәеит.

XIX ашәышықәсазы аԥсуаа еидкыланы мчыла Османтәи аимпериа ахь рахгара раԥхьа иахьыҟала амшын иаԥныз аҵакырақәа рҿы ауп. XIX ашәышықәса раԥхьатәи ажәашықәсақәа рзы иҭацәит Гагра, Аҟәа, Гәылрыԥшь араионқәа, анаҩс атәыла егьырҭ араионқәагьы ҭацәуа иалагеит.  Амҳаџьарра иақәшәеит аԥсуа жәлар рыдагьы урҭ хылҵышьҭрала ирзааигәоу  ажәларқәагьы: ачеченцәа, ауаԥсаа, даӷьсҭанаа, уҳәа убас егьырҭгьы. Амҳаџьырра иахҟьаны зынӡа иқәӡааит аубла жәлар.

Кавказтәи аибашьра иалаӡыз ргәалашәара иазкыз аусмҩаԥгатә асааҭ 18:00 рзы Агаҿатә парк аҿы аҿар аԥсуеи адыгеи бираҟқәеи аҵәыџьмцеи кны рықәсрала иалагеит.   Ашколхәыҷқәа Кавказ ашьхарыуа жәларқәа рымаҭәа рышәҵаны амҳаџьыраа рбаҟа аганахьала идәықәлеит.

Аҟәа. Лаҵарамза 21, 2024 шықәса. Аԥсныпресс. Аҟәа ақалақь аҿы Кавказтәи аибашьраан иҭахази амҳаџьырра иагаз ашьхарыуа жәларқәа рхаҭарнакцәеи ргәаладыршәеит. Лаҵарамза 21, 2024 шықәса рзы 160 шықәса ҵит Аурыс-Кавказтәи еибашьра нҵәеижьҭеи. Ари аибашьра иахҟьаны XIX ашәышықәсазы зықьҩыла аԥсуаа Рыԥсадгьыл ааныжьны Ҭырқәтәылеи Ааигәа Мрагылара еиуеиԥшым атәылақәеи рахь ихҵәаны имцар ада ԥсыхәа рмоуит.

Ахәылбыҽха Ҭырқәтәыланӡа изымнаӡази уаҳа зышьҭахьҟа изымхынҳәызи рыхьӡала агәалашәаратә усмҩаԥгатәқәа С.У.Багаԥшь ихьӡ зху аплошьад аҟынтәи Амҳаџьыраа Рыԥшаҳәа аҿы игылоу амҳаџьыраа ргәалашәара абаҟа аҟынӡа аҿар аԥсуеи адыгеи бираҟқәеи аҵәыџьмцеи кны рықәсрала иалагеит.

Аԥснытәи адраматә театр аҿы еизаз идырбан атеатралтә қәгылара.

Аҟәа. Лаҵарамза 21, 2024 шықәса. Аԥсныпресс.  С.Ҷанба ихьӡ зху Аԥснытәи адраматә театр аҿы Кавказтәи аибашьра иалаӡыз ргәалашәара иазкыз ахәылԥаз мҩаԥысит.

Уи рхы аладырхәит еиуеиԥшым ажанрқәа рартистцәеи арҿиаратә коллективқәеи. Амҳаџьыраа рытрагедиа иқәгылара азикит Аԥснытәи адраматә театр актиор  Даур Арухаа. Иара Рушьбеи Смыр ипоема «Семра» ацыԥҵәахеи Баграҭ Шьынқәба аԥсуа бызшәахьы еиҭеигаз Гьаргь Чачба ԥсра зқәым иажәеинраалеи «Уарада» даԥхьеит.  

Сариа Аиба ашәа «Атәым жәҩан аҵаҟа» налыгӡеит.

Еизаз минуҭктәи аҿымҭрала Кавказтәи аибашьра иалаӡыз ргәаладыршәеит.

Авокалтәии ахореогафиатәи аномерқәеи Оҭар Хәынцаиа ихьӡ зху жәлар ринструментқәа роркетр инанагӡоз амузыкатә композициақәеи ахәаԥшцәа идырбан.

Амҳаџьырааи аԥсадгьыли ирызку ашәақәа наигӡеит Омар Сангәлиа.

Баграҭ Шьынқәба иажәеинраала ала  акомпозитор Иван Лакрба ииҩыз  амҳаџьыраа ргарашәа «Шьышь нани» нарыгӡеит Аԥсны жәлар ратистцәа Виолетта Маани Лиудмила Гәымбеи.     

Ильда Кәычбериа Дырмит Гәлиа изкны Миха Лакрба иажәеинраалала иҩыз  ашәа налыгӡеит. Ари ашәа сынтәа ҷыдала амҳаџьыраа ргәалашәара ахәылԥаз азы иҩын.

Аԥсны Ауаажәларратә Палата Амаӡаныҟәгаҩ Гәыли Кьычба амҳаџьыраа ргәалашәара иазкны Аԥснытәи адраматә театр аҿы 1990 шықәсазы имҩаԥгаз ахәылԥаз лгәалалыршәеит.

Аҟәа. Лаҵарамза 21, 2024 шықәса. Аԥсныпресс. Атәыла аԥыза-министр Алеқсандр Анқәаб Аԥсны иҟоу Жәларбжьаратәи Аџьар Ҟаԥшь Акомитет амиссиа ахада Чынгыз Раиымбековеи Кавказ иахьаҵанакуа хабарда ибжьаӡыз рыԥшаара азҵаарақәа рзы Жәларбжьаратәи Аџьар Ҟаԥшь Акомитет ахаҭарнак  Аниес Котуи идикылеит, ҳәа адырра ҟаҵоуп Аԥсны аминистрцәа Реилазаара аофициалтә саит аҿы.

Амиссиа ахада лаҵарамза 29 рзы Сҭампыл ақалақь аҿы имҩаԥысраны иҟоу хганктәи акоординациатә механизм изаамҭанытәиу аилатәара аламҭалазы имҩаԥысуа ари аиԥылара иаҵоу аҵакы ахадара инаҵшьны иазгәеиҭеит.

Аниес Коту аԥыза-министр аҵыхәтәантәи жәымз рыҩныҵҟа 1992-1993шш. Аԥсны жәлар Рџьынџьтәылатәи еибашьра аҿы хабарда ибжьаӡыз рыԥшаара аганахьала имҩаԥгаз аусура атәы изеиҭалҳәеит.

Лара иазгәалҭеит хабарда ибжьаӡыз анышә иамадахар ахьалшо аҭыԥқәа рыԥшаара аганахьала аихьӡарақәак шыҟоу азгәалҭеит.  Уи азы аинформациа зегьы Аԥсны аҭыԥантәи амчра аусбарҭақәа рахь инашьҭуп. Ҭыԥқәак рҿы аусурақәа  ирылагахьеит.

Аниес Коту аԥыза-министр диҿцәажәо, Жәларбжьаратәи Аџьар Ҟаԥшь Акомитет хабарда ибжьаӡыз рҭаацәа зегьы аԥшаара апроцесс иадыԥхьалазарц азы иалшо зегьы шыҟанаҵо, насгьы иконкрету алҵшәақәа шыҟало азы  агәыӷра шрымоу азгәалҭеит.  

Аҟәа. Лаҵарамза 21, 2024 шықәса. Аԥсныпресс.  Алада Урыстәылатәи Апарламенттә Ассоциациа (ЮРПА) аилазаара иалоу Апарламентқәа рхаҭарнакцәа аҩаша, лаҵарамза 21 рзы, Ареспублика Калмыкиа аҳҭнықалақь Елиста имҩаԥысуа Ассоциациа акомитетқәеи акомиссиақәеи реилатәарақәа рхы аладырхәуеит.  

Аԥсны Жәлар Реизара-Апарламент аофициалтә саит аҿы иҟоу адыррақәа рыла, Алада Урыстәылатәи Апарламенттә Ассоциациа амилаҭбжьаратәи аизыҟазаашьақәеи апарламентбжьаратәи аимадарақәеи абаҩарҵәыреи аспорти атуризми аҿар русқәеи рзы акомитет аусура ихы алаирхәит уи аилазаара ахь Аԥсны Жәлар Реизара-Апарламент ахьӡала идәықәҵаз Аԥсны Апарламент адепутат Венори Бебиа. Акомитет алахәылацәа акурорттә инфраструтура аҿиара азы аексперимент амҩаԥгара иадҳәалоу азакәанԥҵаратә  инициатива иахәаԥшит, иалацәажәеит ашколтә кружокқәеи атеатрқәеи русура адгылара аҭареи аҩыҭаҭәаратә туризм аҿиареи рызҵаара.  

Аҟәа. Лаҵарамза 21, 2024 шықәса. Аԥсныпресс. Аԥсны агәабзиарахьчара аминистр Едуард Быҭәба атәыла араионтәи ақалақьтәии ахәышәтәырҭақәа рҳақьым хадацәа алархәны аусуратә еилатәара мҩаԥигеит. Аилатәара иара убас лхы алалырхәит агәабзиарахьчара аминистр ихаҭыԥуаҩ Ирма Воуԥҳа.  

Аԥхынтәи акурорттә аамҭахәҭа аламҭалазы агәабзиарахьчара аминистр традициала ишышьақәгылахьоу еиԥш, ахәышәтәырҭақәа рҿы иҟоу аҭагылазаашьеи аԥсшьараамҭа азы апациентцәа рхыԥхьаӡара аизырҳара ишазыҟаҵоу азы аилкаареи рзы аҳақьымцәа раҳасабырбақәа разыӡырҩреи аҳақьымцәа рыҿцәажәарақәеи мҩаԥигоит, ҳәа адырра ҟанаҵоит атәыла агәабзиарахьчара Аминистрра апресс-маҵзура. 

Ихадоу апроблемақәа иреиуоуп – акадрқәа разымхара. Лаҵарамза анҵәамҭазы аԥхынтәи аԥсшьараамҭазы рколлегацәа ирыцхраац Аԥсныҟа иаауеит урыстәылатәи амедусзуҩцәа жәаҩык.

Аԥсны агәабзиарахьчара Аминистрра ахәшәтәра-профилактикатә цхыраара Аусбарҭа аиҳабы Баҭал Кациа иажәақәа рыла, Аԥсни Урыстәылеи ргәабзиарахьчара Аминистррақәа уаанӡа ирыбжьарҵаз аиқәшаҳаҭрақәа инарықәыршәаны, аԥснытәи рколлегацәа ирыцхраарц иаауеит урыстәылатәи амедусзуҩцәа: ахәыҷыҳақьымцәа, аинфекционистцәа, ареаниматологцәа, аԥҟаҩцәа, атерапевтцәа.