Аҟәа. Нанҳәамза 23, 2024 шықәса. Аԥсныпресс. Аԥсны аҩныҵҟатәи аусқәа рминистр Роберт Киут Аџьынџьтәылатәи еибашьра Дуӡӡа аветеран, аҩныҵҟатәи аусқәа Рминистрра ԥыхьатәи аусзуҩ Анна Панасенко лиубилеи лыдиныҳәалеит. Лара иахьа 100-шықәса лхыҵит.

Аҟәа. Нанҳәамза 23, 2024 шықәса. Аԥсныпресс. Москваҟа иусуратә ҭаара аҳәаақәа ирҭагӡаны, Аԥсны Аҳәынҭқарра Ахада Аслан Бжьаниа Урыстәылатәи Афедерациа Анапхгара ахантәаҩы ихаҭыԥуаҩ Алеқандр Новак диԥылеит.    

Аганқәа Аԥсны асоциал-економикатә ҿиара, аинвестициатә усеицура,  Аԥсны аенергетикатә шәарҭадара алыршара, уҳәа ирыдҳәалоу азҵаарақәа жәпакы ирылацәажәеит, ҳәа адырра ҟанаҵоит Аҳәынҭқарра Ахада ипресс-маҵзура.

Аҟәа. Нанҳәамза 23, 2024 шықәса. Аԥсныпресс. Асоциалтә еиқәыршәареи адемографиатә политикеи рминистр Руслан Аџьба 1941-1945 шш. Аџьынџьтәылатәи еибашьра Дуӡӡа аветеран Анна Панасенко  100-шықәса лхыҵра лыдиныҳәалеит.

Атәыла анапхгара ахьӡала аминистр Анна Николаи-иԥҳа аҳамҭақәа лиҭеит, илзеиӷьаишьеит агәабзиара, агәамч, лыуацәеи лҭынхацәеи рыгәҭа ашықәснҵыра ду.

Аҟәа. Нанҳәамза 25, 2024 шықәса. Аԥсныпресс.  «Ақыҭанхамҩеи атуризми еидкыло» ҳәа хыс измаз ацәыргақәҵатә хәаахәҭра нанҳәамза  24 рзы Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис иҟанаҵаз адгыларала Афон Ҿыц ақалақь аҿы имҩаԥысит. Уи мҩаԥысуан Симон Канттәи изку аныхабаа иаду аҵакыра аҿы, аҭааҩцәа рганахьала ақәҿиарагьы аман.

«Ацәыргақәҵатә хәаахәҭра аҭыԥантәи ауааԥсыреи атуристцәеи рыбжьара афермертә нхамҩақәа иаадрыхуа хкы-хкыла еиуеиԥшым аҽаҩра беиа аӡыргара азы платформаны иҟалеит. Уи рхы аладырхәит 13-ҩык афермерцәа, урҭ зегьы уи аԥхьа  Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис еиҿнакааз атренингқәа рҿы рдыррақәа аҩаӡара шьҭырхит», – ҳәа иазгәаҭоуп Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис апост-релиз аҿы.

Аҟәа. Нанҳәамза 24, 2024 шықәса. Аԥсныпресс.  Дауҭ Гәыблиa «ММА» азы Жәларбжьаратәи атурнир «Санкт-Петербуург ақалақь агубернатор Ихраҿа» аҿы аиааира игеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Аспортсмен  иҿазыҟаиҵоит шәачатәи аиқәԥаратә клуб «Левша» аҿы. Напхгаҩцәас имоуп  Ашот Пашиани Арсен Хамалиани. Атурнир аҿы иара Ареспублика Аԥсны, Аԥсны «MMA» Аидгылара Афедерациа ахьӡала дықәгылон.

Аҟәа. Нанҳәамза 24, 2024 шықәса. Аԥсныпресс. Нанҳәамза 23 рзы имҩаԥгаз ареидтә усмҩаԥгатәқәа рыла иаарԥшхеит  13-ҩык зқьаф ҟаҵаз амашьынарныҟәцаҩцәа, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.

Ҩыџьа амашьынарныҟәцаҩцәа анаркотикатә маҭәашьарқәа рыдкыланы иҟан, 11-ҩык – иџьбароу арыжәтә ыжәны. Хҩык амедицианатә гәаҭара ахысра мап ацәыркит.

Аҟәа. Нанҳәамза 24, 2024 шықәса. Аԥсныпресс. 2016 шықәса рзы ииз ахәыҷқәа рыбжьара ашьапылампыл азы Ареспубликатә ахәыҷтәы-қәыԥштә турнир алагеит Аҟәа. Уи ашьапылампыл азы Аԥсны зҽаԥсазтәыз азыҟаҵаҩ, Аԥсны абаҩарҵәыратә культуреи аспорти зҽаԥсазтәыз аусзуҩ Иури Логәуа игәалашәара иазкуп.

Атурнир рхы аладырхәуеит Очамчыра араион Ахәыҷтәы-қәыԥштә спорттә школ акоманда, Гәдоуҭа араион Ахәыҷтәы-қәыԥштә спорттә школ акомандақәа ҩба,  ахәмаррақәа рзы Ареспубликатә Ахәыҷтәы-қәыԥштә спорттә школ акоманда, Ашьапылампылтә Клуб «Динамо» Аҟәа, Академиа «Unity» акоманда.

Аҟәа. Нанҳәамза 28, 2024 шықәса. Аԥсныпресс. Нанҳәамза 28 рзы Аԥсны иқәынхо аиашахаҵаратә дин ныҟәызго ақьырсианцәа Анцәа дзыхшаз Ицқьаӡоу Мариа Лылацәеиқәыԥсара Амш азгәарҭоит. Ари аиашахаҵаратә ныҳәа дуқәа иреиуоу ныҳәоуп, уи Ицқьаӡоу Анцәа Иан Мариа цәеижьла жәҩан ахь лхалара  иадҳәалоуп. Ари ахҭыс «аԥсҭазаара алҵра» ҳәа акәӡам ишашьҭоу, уи Анцәа дзыхшаз «лылацәеиқәыԥсара» ауп, ауахәамаславиантә бызшәа аҟынтәи еиҭаганы «ацәара», мамзаргьы «ҭынч аԥсра» ҳәа иаанагоит. Ари аныҳәа символс иамоуи, ақьырсианцәа уи шазгәарҭоуи ртәы Аԥсныпресс акорреспондент диҿцәажәо еиҭеиҳәеит Ацқьа Иоанн Ахьҿы ихьӡ зхоу Камантәи аберҭыԥ ахылаԥшҩы, Аԥснытәи Аиашахаҵаратә Уахәама адәныҟатәи ауахәаматә еимадарақәа рыҟәша ахантәаҩы, аигумен Игнати (Киут).

Аигумен Игнати иажәақәа рыла, Ауахәама адинҵара инақәыршәаны, Анцәа дзыхшаз Ацқьаӡа Мариа  дымԥсӡеит.  «Лара аԥсра лкьымсӡеит. Лара аамҭала ацәа дынҭанагалеит, уи азы ауп ари Амш Алацәеиқыԥсара ҳәагьы изашьҭоу», - ҳәа иазгәеиҭеит иара. Ари иҷыдоу аҟазшьа змоу мшуп Аиашахаҵаратә Уахәамеи Жәҩан раҳкәажәи рыԥсҭазаара азы.

Ари аныҳәа азгәаҭара зызку Анцәа Иан лыԥсҭазаара лалҵреи анышә ламадареи рзы адырраҭара иашаны ишьақәыргылаӡам. Ауахәаматә ҵарақәа атекстқәа реиҳарак рыҟны иаагоуп абас иҟоу асиужет: Иаса Қьырса жәҩан ахь ихалара анаҩс Зегь реиҳа иԥшьоу Анцәа Иан Аҭыԥҳа Мариа зны Ефес дыҟан, нас лыԥсҭазаара аҵыхәтәантәи ашықәсқәа рзы Иерусалимҟа дыиасит, ацқьа цҳаражәҳәаҩ Иоан дагьылхылаԥшуан. Ус уасиаҭ ажәаны изаанижьхьан иара Анцәа, иан гәакьа леиԥшҟьа ахылаԥшра лиҭаларц азы. Лԥеи Лареи реиԥылара дазыԥшны лара есымша Голгофа аҳаракыраҿы дныҳәон. Аҭыԥҳа Мариа лыԥсҭазаара лалҵра хымыш шыбжьаз, аԥаимбар Гавриил дылҭаан, лассы лыԥхазмоу алацәеиқәыԥсарахь дшиасуа атәы леиҳәеит. Ацқьаӡа Аҭыԥҳа Мариа лзы ари лыԥха змоу жәабжьны иҟалеит. Лара ацҳаражәҳәаҩцәа зегьы даарыԥхьеит, лцара атәы ралҳәарц азы. Анцәа дзыхшаз лҳәатәала лцәеижь Иерусалим азааигәара, Гефсиманиа, лани лаби, рнышәынҭрақәа рыбжьара анышә иамадан. Хымыш рышьҭахь анышәынҭраҟны дааит ацҳаражәҳәаҩ Фома, иара лыԥсҭазаара даналҵ аҽны дыҟамызт азы, аха Ацқьа Мариа лцәеижь аҭыԥан адамраҟны ашәҭқәа ҭаԥсаны ибеит.

Аигумен Игнати иажәақәа рыла, ауаа абжьааԥны ус акәӡам аԥсразы ажәабжь шрыдыркыло. «Ҳара зегьы ҳгәы ҳахьуаеит, ҳгәырҩоит, ҳҵәыуоит, амыткәыма ҳҳәоит, избан акәзар аԥсра ҳацәшәоит. Ҳәара аҭахума, уи зегьы зыхҟьо ҳагәрагара амаҷра ауп. Аха, аиашазы, иҭҵаам акы аҿаԥхьа ашәара ԥсабараны иҳалоу ҟазшьоуп», - ҳәа инацҵаны иазгәеиҭеит иара.

Аҟәа. Нанҳәамза 27, 2024 шықәса. Аԥсныпресс. Зметраж нагӡоу арежиссиор Наур Гармелиа иҭихыз асахьаркыратә фильм «Аҵыхәтәантәи ахәԥса» XIII Москватәи Жәларбжьаратәи акинофестиваль «Будем жить» аноминациа «иреиӷьу арежиссура» аҿы аиааира агеит.

Аҟәа. Нанҳәамза 27, 2024 шықәса. Аԥсныпресс.  Амилаҭтә сахьатә галереиа ацәыӡра, апсевдоним ГенЕрген ала аус зуа асахьаҭыхыҩ Геннади Рамин-Гамгьиа иблыз аусумҭақәа рсеириа аиҭаҿиара азы аидеиа изцәырнагеит.  Аԥсныпресс акорреспондент диҿцәажәо иара игәҭакқәа дрылацәажәеит.

Геннади Ромин-Гамгьиа абылраан амца иалаблит хыԥхьаӡара рацәала иуникалу арҿиамҭақәа, аха иара изы ҷыдала акыр аанагоит Николаи Писарчук (1923 – 1997 шш.) исахьақәа реиҭарҿиара ҳәа иазгәеиҭеит. Николаи Писарчук иусумҭақәа аудиториа ду аҿы мыцхәы еицырдыруа иҟаӡам. Урҭ рыхәдура раԥхьаӡа иргыланы, Аԥсны амилаҭтә бзазара иазку асиужетқәа роуп изыдҳәалоу.  

Николаи Писарчук диит 1923 шықәсазы Каменецк-Подолск ақалақь аҿы. Аԥсныҟа нхара ҳәа диасит 1955 шықәсазы.  

Раԥхьа иара Гагра ақалақь аҿы дынхон, нас Аҟәаҟа диасит. Асахьаҭыхыҩ раԥхьатәи ицәыргақәҵа мҩаԥысит 1958 шықәса рзы, акинотеатр «Аԥсны» афоие аҿы.

«Иара даҽаџьарантәи иааз уаҩын, аха «аетнографиатә аԥсуа натиурморт» ҳәа хыс измаз асахьақәа рсериа аԥиҵеит. Иарбоу асахьақәа аҩнымаҭәахәқәа рыла XVIII – XX ашәышықәсақәа рзы аԥсуаа рыбзазашьа зеиӷьаҟам ала иаадырԥшуан», – ҳәа еиҭеиҳәеит  ГенЕрген.