Аҟәа. Рашәарамза 14, 2025 шықәса. Аԥсныпресс. Аԥсны адәныҟатәи аусқәа рминистр Олег Барцыц Урыстәылатәи Афедерациа адәныҟатәи аусқәа рминистр ихаҭыԥуаҩ Михаил Галузин ииубилеи идиныҳәалеит.
«Шәара шәзанааҭтә мҩа – ламысцқьала аԥсадгьыл амаҵзуреи адипломатиатә ҟазара иреиҳау астандартқәеи рҿыԥшы хаданы иҟоуп.
Ҷыдала иазгәасҭарц сҭахуп Ареспублика Аԥсни Урыстәылатәи Афедерациеи рыбжьара аиҩызаратәи аимабзиаратәи аизыҟазаашьақәа рыҿиара аус аҿы хаҭала Шәара шәлагала ду.
Ҳҳәынҭқарратә рыдәныҟаполитикатә хылаԥшырҭақәа ирыбжьоу инеиԥынкыланы ганрацәалатәи адиалог анаҩстәи аҩганктәи аусеицура арӷәӷәареи хра злоу аԥшьгарақәа реицынагӡареи алнаршоит», - ҳәа иазгәаҭоуп адныҳәаларатә цҳамҭа аҿы.
Олег Барцыц Михаил Галузин изеиӷьаишьеит агәабзиара, агәамч, аҭакԥхықәра зцу иҳәынҭқарратә дипломатиатә усура аҿы аманшәалареи аихьӡара ҿыцқәеи.
