Аҟәа. Хәажәкырамза 29, 2024 шықәса. Аԥсныпресс.  Аҟәа ақалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа аҳҭнықалақь аџьармыкьа Хада иахьаҵанакуаз иааныркылеит анаркотикатә маҭәашьарқәа рыҭира азы игәҩароу Урыстәылатәи Афедерациа ҩыџьа атәылауаа – 1979 шықәсазы ииз Казань ақалақь аҿы инхо Орлов Алеқсеи Владимир-иԥеи  1985 шықәсазы ииз Москватәи аобласт аҿы инхо Сорокина Евгениа Андреи-иԥҳаи.

Аԥсны аҩныҵҟатәи аусқәа Рминистрра апресс-маҵзура иҟанаҵо адыррақәа рыла, хаҭала игәаҭараан Орлов Алеқсеи иеиқәа аџьыба аҿы ирыԥшааит иагьимырхит ишкәкәоу, аххыраԥшра змоу, икристаллрку амаҭәашьар згәылаз 23 еилаҳәара, Сорокина Евгениа илыдырбалеит  – аиԥш-зеиԥшу амаҭәашьар згәылаз 19 еилаҳәара.

Анаҩс иаанкылаз ауаа алархәны уаанӡа иҟаҵаз имаӡоу аҭаҵәахтә ҭыԥқәа ахьыҟаз аҵакыра аҿы агәаҭарақәа мҩаԥган. Аҟәа ақалақь, Инал-иԥа имҩала, Орлов Алеқсеи иаирбаз аҭыԥқәа рҿы ирыԥшааит ишкәакәоу, икристаллрку амаҭәашьар згәылаз х-еилаҳәарак. Аиԥш-зеиԥшу амаҭәашьар згәылаз даҽа х-еилаҳәарак амилициа аусзуҩцәа ирыԥшааит Сорокина Евгениа Аиааиа апроспект ала уаанӡа иҟалҵахьаз имаӡоу аҭаҵәахтә ҭыԥқәа рҿы.   

Аҟәа. Хәажәкырамза 29, 2024 шықәса. Аԥсныпресс. Атәылахьчара Аминистрра аҿы хәажәкырамза 2024 шықәсазы арбџьармчқәа разыҟаҵара аихшьаалақәа рыҟаҵара иазкыз аилатәара мҩаԥыргеит, ҳәа адырра ҟанаҵоит атәылахьчара Аминистрра апресс-маҵзура.  

Аиалатәара мҩаԥысуан атәылахьчара аминистр, аинрал-полковник Владимир Ануа ихантәаҩрала.

Аихшьаалақәа рыҟаҵараан аоперативтә, амобилизациатә, арратә зыҟаҵара рылҵшәақәа ирыхәаԥшит. Ҷыдала ахшыҩзышьҭра аҭан арратәи амобилизациатәи зыҟаҵара, арратә дисциплина, иара убас архәҭақәа рҿы азинеиҿкаара ашьақәыргылара.  

Аԥсны Аҳәынҭқарра Арбџьармчқәа Рыштаб Хада аиҳабы, аинрал-летенант Владимир Савченко арратәи аморал-психологиатәи  ҽазыҟаҵара  иазкны еффективла, аҩаӡара ҳаракы аҿы имҩаԥгаз ауснагӡатәқәа, архәҭақәа рҿы арратә ԥыԥшра анагӡара аиҿкаара ҷыдала дазааҭгылеит, иара убас архәҭақәа рхыдҵақәа азгәеиҭеит, урҭ рынагӡареи реишьҭагылашьеи аликааит.  

Аҟәа. Хәажәкырамза 29, 2024 шықәса. Аԥсныпресс. Гагра араионтә хәышәтәырҭа Хада анапхгараҭара Гагра араион Ахадара ацхыраарала ззанааҭдырра ҳараку аспециалистцәа разымхара иадҳәалоу апроблема аӡбара азы ауснагӡатәқәа мҩаԥнагоит.  

Ахәышәтәырҭа аҿы ареаниматологцәа, атравмотологцәа, ахирургцәа, апедиатрцәа, атерапевтцәа, агинекологцәа ӷәӷәала разымхара ыҟоуп. Даара имаҷуп иалкаау ачымазарақәа иазку аҳақьымцәа, иара убас иазхом амедиаҳәшьцәеи асанитаркацәеи.  

Ас еиԥш араион азы ихымԥадатәиу акадрқәа радыԥхьалара азы, араион Ахадара урҭ нхарҭаҭыԥла реиқәыршәареи уи ахәԥса ашәареи, иара убас егьырҭ азҵаарақәа рҿы адгылара рыҭареи иазхиоуп.  Убас, 2023 шықәсазы, иарбоу ауснагӡатәқәа ирыбзоураны, аԥхынтәи аамҭахәҭа зегьы иалагӡаны Гагратәи араионтә хәышәтәырҭа Хада аҿы аус иуан Ҭҟәаԥстәи ахирург қәыԥш.  2024 шықәсазы Аԥсны агәабзиарахьчара Аминистрра инанагӡо ауснагӡатәқәа рганахьала  мшаԥымза инаркны аусура иалагароуп Уфантәи иаауа ареаниматологцәа.

Иара убас араион Ахадара акушер-генеколог Урыстәыла иҵара ахәԥса ашәара ахахьы иагеит. Уи Ахадареи иареи ирыбжьарҵаз аиқәшаҳаҭра инақәыршәаны иҵара даналгалак ашьҭахь усура ҳәа Гагратәи ахәышәтәырҭахь даауеит.

2023 шықәсазы амҩа-танспорттә машәыртә хҭысқәа рышьҭахь ахәышәтәырҭахь инаган 221-ҩык апациентцәа. Урҭ рахьынтә 18-ҩык анеирохирургиатә хәрақәа рыман. Актәи амедицинатә цхыраара анрыҭаха ашьҭахь, урҭ ироуз ахәрақәа рыпрофиль иаҵанакуаз ахәышәтәырҭақәа рахь ииаган.    Х-ҩык ироуз ахәрақәа ирыхҟьаны рыԥсҭазаара иалҵит. Егьырҭ, зҭаагылазаашьа акыр иуадаҩны ахәышәтәырҭахь инагаз   16-ҩык апациентцәа ахәышәтәырҭа аҿы астационартә хәышәтәратә цхыраара роуит.

Аҳақьым хада иажәақәа рыла, зынӡа иҳаҩсыз ашықәс азы араионтә хәышәтәырҭа Хада иадҵаалеит 60-нызықьҩык инареиҳаны.  

«Аҳақьымцәа ирымоу ақәыӷәӷәара атәы унарбоит абарҭ арбагақәа: аԥхынтәи аамҭахәҭа азы, ақалақь иаҭаауа асасцәа рыла ауааԥсыра рхыԥхьаӡара акыр ианазҳауа аамҭа азы, есыҽны ахәышәтәырҭахь инеиуеит 200-ҩык инарзынаԥшуа апациентцәа, убри аан иазгәаҭатәуп, ҳара ишҳамоу хҩык ахирургцәеи х-ҩык атерапевцәеи мацара.  Урҭ аиашазы, аҳақьым-универсалцәа роуп», – ҳәа еиҭалҳәеит Индира  Арсалиа.

Сухум. 29 марта 2029. Апсныпресс. Аслан Бжьаниа Аурыс драматә театр актиорцәа  Абыхәба Осман Олег-иԥа, Депелиан Рубен Аркади-иԥа, Спафопуло Серафима Харлампи-иԥҳа, Шишкин  Кирилл Алеқсандр-иԥа «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы рхиҵеит.

Аҟәа. Хәажәкырамза 29, 2024 шықәса. Аԥсныпресс. Аԥсны аҿари аспорти русқәа рзы Аҳәынҭқарратә Еилакы аҿы (БРИКС) атәылақәа Рыхәмаррақәа Аԥсны ахьӡала иалахәхо азыҟаҵаҩ хадацәа, аспорт хкқәа рыла Афедерациақәа рхаҭарнакцәа рԥылара мҩаԥысит.

Аиԥылара мҩаԥигон Аҳәынҭеилакы ахантәаҩы ихаҭыԥуаҩ, Аԥсны амилаҭтә еизгоу аделегациа ахада Беслан Карчаа.

Аҟәа. Хәажәкырамза 29, 2024 шықәса. Аԥсныпресс. Атуристтә аамҭахәҭа алагара аламҭалазы Аҳәынҭқарратә ҳазалхратә Еилакы аҿы атуризм аминистр ихаҭыԥуаҩ  Дмитри Занҭариеи Аԥсны аенергетикеи атранспорти Рминистрра ахаҭарнак Асҭамыр Бганбеи рԥылара мҩаԥысит, ҳәа адырра ҟанаҵоит Аҳәынҭқаратә ҳазалхратә Еилакы аофициалтә саит.

Аиԥылара аҿы ирзааҭгылеит аԥсны-урыстәылатәи аҳәынҭқарратә ҳәаа атауарқәеи атранспорттә хархәагақәеи рыиасра  иадҳәалоу актуалра злоу апроблемақәа.

Ахәҭакахьала, ирылацәажәеит аекскурсиатә автобусқәа аҳәаа рахысра иаго аамҭа аеиҳа рмаҷразы иҟаҵатәу, иарбоу атранспорт ахкы аганахьала аҳазалхратә шәҟәҭагалареи аҳазалхратә гәаҭареи рзы априоритеттә режим аиҿкаара ахархәара, иара убас жәларбжьаратәи аидарамҩангарақәа рынагӡара иадҳәалоу апроблемақәакгьы ирылацәажәеит.   

Аҟәа. Хәажәкырамза 29, 2024 шықәса. Аԥсныпресс.  Аҳәынҭқарра Ахада Будкеев С.М. «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ихҵаразы Аусԥҟа инапы аҵаиҩит.

Аусԥҟа атекст аҟны иҳәоуп:

«Аԥсны аклассикатә музыкатә ҟазара арҿиареи аларҵәареи рыҟны илагаламҭазы «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ихҵазааит аорӷанрҳәаҩы,   Алтаитәи аҳәынҭқарратә университет апрофессор Будкеев  Сергеи Михаил-иԥа».

Аҟәа. Хәжәкырамза 29, 2024 шықәса. Аԥсныпресс.  Гагратәи араионтә хәышәтәырҭа Хада аҿы шьаҭанкыла аиҭашьақәыргылара-рҽеиратә усурақәа мҩаԥысуеит. Ари амедицинатә усбарҭа аҿы 30 – шықәса раахыс изеиԥшразаалак аиҭашьақәыргыларатә усурақәа мҩаԥгаӡамызт. Аусурақәа ралагара акоронавирус апандемиа иақәшәеит, убри аҟнытә аиҭашьақәыгыларатә усурақәа шымҩаԥысуазгьы 2021 шықәсазы 50 шьҭаларҭа ҭыԥ азоужьын ари аҿкы чымазара злаҽыз рыхәышәтәра азы.

Ахәышәтәырҭа аҳақьым хада Индира Арсалиа усҟан аусура шаҟа имариамыз атәы далацәажәеит.

«Аҳақьымцәа  русура аҿы инхон ҳәа уҳәаратәы иҟоуп.  Усҟан аҭыԥантәи Ахадара иҟанаҵаз ацхыраара ахә ашьара уадаҩуп. Уи ахәышәтәырҭа акырӡа ихымԥадатәииз аҵәыҵәритә станциа ала аиқәыршәара алнаршеит. Иаахәан агазификатор, уи иабзоураны апалатақәа зегьы рахь аҵәыҵәри анагаразы еизаку асистема аԥҵара алыршахеит, уаанӡа еиԥш акыр иуадаҩу аҵәыҵәритә балонқәа рырҳәазара аҭахны иҟамлаӡеит», – ҳәа еиҭалҳәеит лара.

Аҟәа. Хәажәкырамза 29, 2024 шықәса. Аԥсныпресс.  Аҳәынҭқарра Ахада Иусԥҟала Стилиди И.С. «Ахьӡ-Аԥша» аорден III аҩаӡара ианашьоуп.

«Иҳараку апофессионалтә ҟазаразы, агәабзиарахьчара аҿиараҟны илагаламҭазы, Аԥсны Аҳәынҭқарра атәылауаа амедицинатә цхыраара рыҭара аиҿкааразы «Ахьӡ-Аԥша» аорден III аҩаӡара ианашьазааит Н.Н. Блохин ихьӡ зху Аонкологиазы амилаҭтә медицинатә ҭҵааратә центр адиректор, апрофессор, УА Амедицинатә наукақәа Ркадемиа алахәҩыла-акорреспондент, УАР академик Стилиди Иван Сократ-иԥа».

Аҟәа. Хәажәкырамза 29, 2024 шықәса. Аԥсныпресс. Аҳәынҭқарра Ахада 2024 шықәса мшаԥымза-рашәарамзазы Аԥсны Аҳәынҭқарра атәылауаа арратә маҵзурахьы рааԥхьареи ааԥхьарала арратә маҵзура иахысуа арратә маҵзураҟнытә рхы рақәиҭтәразы Аусԥҟа инапы аҵаиҩит.

Аусԥҟа атекст аҟны иҳәоуп:

«Арратә ԥхықәреи арратә маҵзуреи рзы» 2014 шықәса лаҵарамза 06 аҟнытә Nº 3498-c-V Азакәани «Атәылахьчаразы» 2006 шықәса ажьырныҳәамза 04 аҟнытә Nº 1224-c-XIV Аԥсны Аҳәынҭқарра Азакәани шьаҭас иаҭаны: