Аҟәа. Нанҳәамза 9, 2024 шықәса. Аԥсныпресс. XXI Жәларбжьаратәи ашахматтә фестиваль «Аԥсны Open 2024» аҿы аиааира згаз еилкаахеит. Афестиваль аҳәаақәа ирҭагӡаны имҩаԥган ашахматтә турнирқәа хԥа: аиҳабацәа ртурнир (атурнир А), иара убас ахәыҷтәы турнирқәа ҩба  (9 шықәса зхымҵӡаци  13 шықәса зхымҵӡаци рықәратә категориақәа ирыҵанакуаз рыбжьара).

Афестиваль зынӡа рхы аладырхәит Аԥсны арегионқәа зегьы рҟынтәи, ақәратә категориақәа зегьы ирыҵанакуаз 130-ҩык ашахматистцәа, иара убас Урыстәылантәи иааз асасцәагьы.

Атурнир А аҿы аиааира игеит ФИДЕ азҟаза Нефедов Сергеи, аҩбатәи аҭыԥ ааниклеит ФИДЕ азҟаза Сафин Роберт (ақ. Набережные Челны), иара убас ахԥатәи аҭыԥ ааникылеит – Ивашьенко Вадим (ақ. Ростов-на-Дону).

Аԥхьахәтә ҭыԥқәа абарҭ аноминациақәа рыла еихшахеит:

Аҟәа. Нанҳәамза 9, 2024 шықәса. Аԥсныпресс. Аԥсны адәныҟатәи аусқәа рминистрра ахҳәаа анаҭеит Урыстәыла, Курсктәи аобласт аҟны иҟалаз ахҭысқәа.

Украина арбџьар мчқәа Курсктәи аобласт аҳәаа иахьаԥну иҟарҵаз ақәылара инадҳәаланы Урыстәыла, Курсктәи аобласт аҟны аҭыԥ змоу аҭагылазаашьа ахшыҩзышьҭра ду аҳҭоит. Игәыхьуп иҭахази ахәрақәа заузи ахьыҟоу.

Киевтәи арежим аҽазныкгьы, мраҭашәаратәи апартниорцәа рыбжьы аныдмырга, аграждантә обиектқәеи аҭынч уааԥсыреи ахымца рылаҵо иаанарԥшит ауаҩымдара, аламысдара, амҽыӷра.

Аҟәа. Нанҳәамза 9, 2024 шықәса. Аԥсныпресс. Аԥсны адәныҟатәи аусқәа рминистр Сергеи Шамба Максим Ӷәынџьиеи Даур Ақаҩбеи адәныҟатәи аусқәа Рминистрра  анапынҵа  ҷыдақәа змоу  ацҳаражәҳәаҩцәаны иҟаиҵеит.

Максим Ӷәынџьиа Аԥсны адәныҟатәи аусқәа Рминистрра дахагылан 2010 шықәса инаркны 2011 шықәсанӡа.  

Аҟәа. Нанҳәамза 9, 2024 шықәса. Аԥсныпресс. Очамчыра ақалақь аҿы урыстәылатәи арратә база ашьақәыргылара азԥхьагәаҭаны иҟаӡам. Очамчыратәи амшынбаӷәаза аҿы урыстәылатәи арратә база  аҿы аҳәаахьчаратә катерқәа мацара гылоуп, ҳәа ТАСС ахь адырра ҟаиҵеит Аԥсны адәныҟатәи аусқәа рминистр Сергеи Шамба.  

«Очамчыра изакузаалак арра-мшынтә база ҳәа акгьы ыҟаӡам, аҟаҵарагьы азԥхьагәаҭаӡам, иҟоу аҳәаахьчаратә ҭыԥ мацара заҵәык ауп, уаҟа аҳәаахьчаратә катерқәа гылоуп. Ҳара ахҭысқәа еиуеиԥшым ала рыҿиара ҳазхиоуп», -ҳәа иҳәеит иара.  

Аминистр Амшын Еиқәа ҩаԥхьа аибарххара ахьыҟоу регионны ишыҟало азгәеиҭеит, араҟа аҵыхәтәантәи аамҭазы лассы-лассы ицәырҵуа иалагеит  НАТО аӷбақәа, америкатәии НАТО иатәууи аԥшыхәратә ҳаирпланқәа ахаԥыруеит.  

«Уи зегьы ҳара агәҭынчымра ҳазцәырнагоит. Аибашьратә хҭысқәа Амшын Еиқәа аӡеизакыра аҿы иахьымҩаԥысуагьы агәҭынчымра узцәырнамгар залшаӡом» , - ҳәа иҳәеит иара.  

Аҟәа. Нанҳәамза 9, 2024 шықәса. Аԥсныпресс. Сандро Цымцба 13-14 шықәса зхыҵуа арԥарцәа рыбжьара абокс азы Европа Аԥхьахәгара афинал аҟынӡа днаӡеит.  

Афиналбжа аҿы иара Болгариатәи аспортсмен Николас Николов диааит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы. Аԥснытәи аспортсмен Урыстәыла еизгоу акоманда аилазаараҿы зыкапантә категориа 63 кьыла рҟынӡа инаӡо рыбжьара дықәгылоит.  Аԥхьахәгара мҩаԥысуеит Боснииеи Герцоговинеи ақалақь Баниа-Лука аҿы.  

Аԥснытәи аспортсмен аицлабрақәа рҿы дицуп уи иазыҟаҵаҩ Едгар Қриа.

Аҟәа. Нанаҳәамза 9, 2024 шықәса. Аԥсныпресс. 2024 шықәса нанҳәамза 9 азы аԥсуа-аахыҵуаԥстәылатәии аԥсуа-приднестровиатәии аизыҟазаашьақәа ирылацәажәеит Аԥсны Адәныҟатәи аусқәа рминистр Сергеи Шамбеи Аԥсны иҟоу Аахыҵ Уаԥстәыла ацҳаражәҳәаҩ Олег Боциеви Аԥсны иҟоу Приднестровие ахаҭарнак ҷыда Гарри Купалбеи.

Олег Боциеви Гарри Купалбеи Сергеи Шамба идырныҳәалеит адәныҟаполитикатә усбарҭа дахьахагылаз.

Аҟәа. Нанҳәамза 8, 2024 шықәса. Аԥсныпресс.  Аԥсны адәныҟатәи аусқәа Рминистрра Аахыҵ Уаԥстәыла адәныҟатәи аусқәа Рминистрра адышшыларатә шәҟәы азынанашьҭит.

Aдышшыларатә шәҟәы атекст аҿы ахәҭакахьала иазгәаҭоуп:

«2008 шықәса нанҳәа 8 ахааназгьы Аахыҵ Уаԥстәыла аҭоурых адаҟьаҿы игәыҭшьаагоу рыцхәны иаанхоит.

Аҟәа. Нанҳәамза 8, 2024 шықәса. Аԥсныпресс. Имҩаԥысит Аслан Бжьаниеи Алан Гаглоеви ҭелла реиҿцәажәара.

Ҭелла аиҿцәажәараан Аԥсны Ахада Аахыҵ Уаԥстәыла Ахада 16 шықәса раԥхьа, нанҳәамза 8, 2008 шықәсазы ауаԥс ажәлар рзы иҟалаз арыцҳара ду инамаданы дидышшылеит, аԥсуа жәлар ауаԥс жәлар рхьаа ргәалашәареи шрыцеиҩыршо азгәеиҭеит. 

Аҟәа. Нанҳәамза 8, 2024 шықәса. Аԥсныпресс. Нанҳәамза 4 инаркны нанҳәамза 11-нӡа Нижни Новгород аҿы аҳәаанырцә инхо урытәылатәи аџьынџьуаа  иреиуоу аурыс бызшәеи алитературеи рырҵаҩцәа рзы азанааҭтә дырра аҩаӡара ашьҭыхразы акурсқәа мҩаԥысуеит.  

Аусмҩаԥгатә аҿы еизеит 10-тәылак рҟынтәи аурыс бызшәа арҵаҩцәа. Аԥсны ахьӡала уи лхы алалырхәуеит Очамчыра араион Гәыԥтәи абжьаратәи ашкол аурыс бызшәеи алитературеи рырҵаҩы Ирма Коӷониа. Уи ари аусмҩаԥгатә лылахәра алыршахеит Урыстәыла аус ацура азы Аԥсны иҟоу Ахаҭарнакра абзоурала.