Аҟәа. Цәыббрамза 13, 2023 шықәса. Аԥсныпресс. Аԥсны Ахәаахәҭра-Ааглыхратә Палата анапхгаҩы Ҭамила Мерцхәлаа Аԥсны ҩымштәи усуратә визитла иаҭааз Ставропольтәи атәылаҿацә аҟынтәи имаҷууи ибжьаратәууи аусдкылара асубиектқәа рхаҭарнакцәа дырԥылеит. Абизнес-миссиа икоммерциатә аиҿкаара «Ставропольтәи атәылаҿацә аҟны аусдкылара адгылара аҭара Афонди» Нхыҵ Кавказтәи абизнес Апалатеи иҟарҵаз адгыларала имҩаԥысуеит.

«Ас еиԥш амиссиақәа Урыстәылатәи Афедерациа арегионқеи Аԥсни ирыбжьоу аимабзиаратәи аусуратәи аизыҟазаашьақәа ирылҵшәаны иҟоуп. Ҳара излауа ала ирацәаны аусдкылаҩцәеи аинвесторцәеи ҳреспублика ахь раара ҳазҿлымҳауп», - ҳәа асацәа дырԥыло инаҵшьны иазгәалҭеит Ҭамила Мерцхәлаа.

Лара, аҵыхәтәантәи ашықәсқәа рзы ареспублика акыр аҽеиҭанакит, араҟа аусура ҟалоит иагьахәҭоуп ҳәа иазгәалҭеит.

«Ҳара ҳреспублика ахь аҭыжьреи амаҵзуреи ркультура ҿыц аазго, анаплак ҿыцқәа аазыртуа ауаа иҭабуп ҳәа раҳҳәоит, избан акәзар уи зегьы ҳекономика аҿиаразы акыр ихымԥадатәиуп. Ҳҳәынҭқарра аполитика ахәаахәҭра-економикатә еизыҟазаашьақәа рыҿиареи аганқәа зегьы ирзыфеидоу еиуеиԥшым арегионқәа аус рыцура аҳәаақәа рырҭбаара, аусдкылара азы иманшәалоу аҭагылазаашьақәа раԥҵара иазырхоуп», - ҳәа инаҵшьны иазгәалҭеит Ҭамила Мерхәлаа.

Лара аусуратә мшқәа ҩба ирылагӡаны хра злоу алҵшәақәа раарԥшра шалыршахо, аусдкылаҩцәа зегьы аԥснытәи рколлегацәа феида рзаланы аус рыцура аформа аԥшаара шрылшо азы агәыӷра аалырԥшит.

Аҟәа. Цәыббрамза 12, 2023 шықәса. Аԥсныпресс. Цәыббрамза 12, 2023 шықәсазы Аԥсны Иреиҳаӡоу аӡбарҭа аҿы Аҟәатәи ақалақьтә Еизара ахантәаҩы Дмитри Осиа Аҟәатәи аӡбарҭа рашәарамза 29, 2023 шықәсазы иаднакылаз аӡбамҭа азы иалеиҵаз акассациатә зашшра ала административтә усқәеи административтә зинеилагарақәеи рзы Акассациатә коллегиа аилатәара  мҩаԥысит.   Абри атәы аанацҳауеит Аԥсны Иреиҳаӡоу аӡбарҭа апресс-маҵзура.

Аус ахәаԥшра алҵшәақәа рыла, Тарба О.Р. (ахантәаҩы), аӡбаҩцәа Адлеиба Е.А., Цушба М.С. (Цушба М.С иҷыдоу агәаанагарала) зеилазаараҿы иҟаз Акассациатә коллегиа, актәи аинстанциа аӡбамҭа ԥсахрада иааннажьит.  Иарбоу аӡбамҭа инақәыршәаны, Аҟәа ақалақь Ахадара азыҳәамҭа иақәшаҳаҭхеит, иара убри ала Аҟәатәи ақалақьтә Еизара Аҟәа ақалақь аплан Хада ашьақәырӷәӷәара ҟалаанӡа уи иарбоу аҵакырақәа ирҭагӡаны шьаҭанкылатәи аргыларақәа рзы азин аҭара зырҵабыргуа аршаҳаҭгақәа рыҭара аанкыларазы абҵарамза 12, 2009 рзы иаднакылаз аӡбамҭа  № 126 (369) азинмчы аԥыхразы аӡбамҭа аднакылеит.

Аҟәа. Цәыббрамза 12, 2023 шықәса. Аԥсныпресс.  Аекономика Аминистрра аҿы  Аԥсны абылтәы аџьармыкьаҿы ишьақәгылаз аҭагылазаашьа иахцәажәеит.  

Аекономика Аминистрра аҿы Аԥсни Урыстәылеи абылтәы џьармыкьақәа рҿы иҟоу аҭагылазаашьеи уи аҽыԥсахрақәеи ирыцклаԥшуеит. Уаанӡа ишазгәаҭаз ала, Аԥсны анефтаалыҵқәа рыхәԥса ашьҭыҵра ишиашоу ала Урыстәылатәи Афедерациаҿы имҩаԥысуа апроцессқәа ирыдҳәалуоуп.

«Урыстәыла адунеи аҿы иреиҳаӡоу анефть ҭзыжьуа атәылақәа ишреиуагьы, аҵыхәтәантәи аамҭазы уаҟагьы аџьармыкьа аҿы абылтәы азымхара азҵаара цәырҵит. Аиҳарак ари азҵаара уадаҩны иҟоуп атәыла аладатәи арегионқәа рҿы. Абылтәы азымхара шьақәыргылахеит Астрахантәи, Самаратәи, Саратовтәи, Риазантәи, Ростовтәи, Новосибирктәии Волгоградтәи аобластқәа рҿы, Калмыкиа, Хабаровсктәи атәылаҿацәи Ҟрыми иҟоу абылтәыҭаҭәарҭатә станциақәа жәпакы рҿы абылтәы амарка АИ-95, АИ-92 ахәԥса 10-15 мааҭ ацлеит. Тула ақалақь аҿы ишьақәыргылан абылтәыҭаҭәарҭақәа рҿы абылтәы аиуристтә хаҿқәа мацара ишрызҭарҭәоз,  92 –тәи абылтәы акәзар, уи аталлонқәа рыла ишҭарҭәо шьақәыргылахеит», – ҳәа иаҳәоит аҳәамҭа аҿы.. 

Аҟәа. Цәыббрамза 10, 2023 шықәса. Аԥсныпресс. Традициала ишышьақәгылахьоу еиԥш амҽыша, цәыббрамза  10 рзы, Москва ақалақь аҿы аԥснытәи актәи акурс астудентцәеи Урыстәыла иҟоу Аԥсны Аҳәынҭқарра ацҳаражәҳәаҩи «Москватәи аԥсуа диаспора» анапхгараҭареи есышықәсатәи реиԥылара мҩаԥысит. Абри азы адырра ҟанаҵоит Москва иҟоу Аԥсны Ацҳаражәҳәарҭа.

Ацҳаражәҳәаҩ Алхас Кәыҵниа астудентцәа аҵарашықәс алагара рыдиныҳәалеит, ақәҿиара дуқәа рзеиӷьаишьеит. Уи Аԥсны зҵарадырра ҳараку аспециалистцәа аҭахуп, уажәы актәи акурс аҿы аҵара зҵо, рҵара қәҿиарала иалганы, ус еиԥш аспециалистцәаны ишыҟало азы агәрагара шимоу ааирԥшит.  

Аҟәа. Цәыббрамза 10, 2023 шықәса. Аԥсныпресс. Илиа Колесников аҳәеилышьразы Шәача ақалақь Аԥхьахәгараҿы аиааира игеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.  

Аспортсмен 2013-2015 шықәсазы ииз «амушкетиорцәа» рыбжьара дықәгылеит.

Аҟәа. Цәыббрамза 10, 2023 шықәса. Аԥсныпресс. Беслан Абҳазаа иҽыҩқәа ҩба Краснодар ақалақь аҿы имҩаԥысыз аҽырыҩрақәа рҿы аҩбатәи аҭыԥ ааныркылеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.

Аҟәа. Цәыббрамза 12, 2023 шықәса. Аԥсныпресс. Аԥыза-министр Алеқсандр Анқәаби Аԥсны иҟоу Жәларбжьаратәи Аџьар Ҟаԥшь Акомитет Амиссиа ахада Родриго де Резенде Амиссиа аҭыԥантәи анапхгареи русеицура азҵаарақәа ирылацәажәеит, ҳәа адырра ҟанаҵоит Аԥсны аминистрцәа Реилазаара апресс-маҵзура.  

Родриго де Резенде аԥыза-министр «уаанӡа имҩаԥгаз аиԥылараҿы ишьҭыхыз азҵаарақәа аоперативла рыӡбаразы» иҭабууп ҳәа еиҳәеит. Иара уи иааубаратәы Амиссиа аусура аеффективра ашьҭыхра алнаршеит ҳәа иазгәеиҭеит.

Аҟәа. Цәыббрамза 12, 2023 шықәса. Аԥсныпресс. Традициала ишышьақәгылахьо ала, Аԥсны ачашәара иалагоит. Сынтәа ашәарыцара аамҭахәҭа аатит нанҳәамза 19 рзы. Уи хыркәшахоит иааиуа ашықәс, хәажәкырамза 15 рзы. Убас ала, ашәарыцара аамҭа аамзы ирҭагӡахоит.  

Аекологиа азы аҳәынҭқарратә Еилакы аконтрол-инспекциатә ҟәша аиҳабы Ҭемыр Ӡыба Аԥсныпресс акорреспондент диҿцәажәо ашәарыцаразы ззин ыҟоу анормативқәа, иара убас ишьақәыргылоу азинеилагарақәа дрыхцәажәеит.

«Иахьоуп ҳара Гагра араион аҟынтәи ҳанааз, араҟа имҩаԥаагон аилагарақәа раарԥшра иазку ареидтә гәаҭарақәа. Аԥсаатәқәа рыбжьы аимитациа ҟазҵо афлеш-картақәа рымхра мҩаԥаагеит. Ауаа ирзеиҭаҳҳәеит ззин ыҟам аметодқәа рхархәара шыҟамло, уахь иаҵанакуеит уахынлатәи аамҭазы ақәырԥхагатә приборқәа рхархәарагьы», - ҳәа иазгәеиҭеит иара.

Аҟәа. Цәыббрамза 12, 2023 шықәса. Аԥсныпресс. Цәыббрамза 11 рзы, агастрольқәа раартра амш аҽны, Аԥснытәи адраматә театр   Башкортосҭан аҳҭнықалақь ахәаԥшцәа иднарбеит Аԥсны жәлар рартист Валери Ақаҩба иқәиргылаз аспектакль  «Шьапыла».

Аартра ацеремониа аҿы дықәгылеит акультура аминистр Амина Шафикова. Уи ареспублика Ахада Ради Хабиров ихьӡала адныҳәаларатә шәҟәы  даԥхьеит.

Аԥснытәи адраматә театр адиректор Хада Алхас Ҷолокуа, Аԥсни Башкортосҭани ирыбжьоу иҷыдоу аизыҟазаашьқәа инарымаданы, Башкириатәи атеатр асцена аҿы ақәгылара даара игәырцыхцыхгоуп ҳәа иазгәеиҭеит.

Аҟәа. Цәыббрамза 12, 2023 шықәса. Аԥсныпресс. Гал араион аҿы ихацыркхеит «Амҩаҿы аныҟәара ашәарҭадара» ҳәа хыс измоу акциа.  

Гал араион ала аҩныҵҟатәи аусқәа рыҟәша аҳәынҭқарратә автоинспекциа аиҳабы Заур Џьынџьал Аԥсныпресс акорреспондент диҿцәажәо иарбоу акциа аԥшьызгаз аҩныҵҟатәи аусқәа Рминистрра ауаажәларратә шаарҭадара Аусбарҭа ауп ҳәа иазгәеиҭеит.

«Ари аҳәынҭинспекциа аусзуҩцәа есыҽнытәи русура ауп. Акциа амҩаԥгарахь иадыԥхьалоуп ашколхәыҷқәа, урҭ амҩатә ԥҟарақәа зну абӷьыцқәа ауаа ирзыршон, амашьынарныҟәцаҩцәа амҩатә ԥҟарақәа рықәныҟәаразы ргәырҽанырҵон», - ҳәа иҳәеит иара.