Аҟәа. Жәабранмза 17, 2025 шықәса. Аԥсныпресс. Апрокурор Хада инапынҵақәа назыгӡо Дамир Кәыҵниа азакәанԥҵаратә аԥшьгара асубиект азинқәа змоу иаҳасабала Апарламент ахь инеигеит «Ареспублика Аԥсны административтә зинеилагарақәа Рзакәанеидкыла аҿы Ахәҭаҷқәа 117, 119 аиҭакрақәа ралагалареи иҿыцу  ахәҭаҷ 119.2 аԥҵареи рзы», иара убас Аԥсны Ашьаустә Закәанеидкыла ахәҭаҷқәа   53, 263 аиҭакрақәа ралагалареи рзы азакәан апроект.

Аҟәа. Жәабранмза 17, 2025 шықәса. Аԥсныпресс. Апрокуратура Хада Аԥсны иқәынхо аерманцәа Рхеилак ахантәаҩы А.А. Миносиан аинернет иаларҵәаз, атәылауаа  Бганба Е.З.,  Ванаба Иу. аерман уааԥсыра рполитикатә дгылара азы урҭ рганахаьла иҟарҵаз ақәмақарра зныԥшыз аҳәамҭақәа рзы  аиалеиҵаз арзаҳал ала агәаҭара хацнаркит.

Аҟәа. Жәабранмза 17, 2025 шықәса. Аԥсныпресс. Аԥсны Ахада инапынҵақәа назыгӡо Валери Бганба азинхьчаҩцәа алархәны аилацәажәара мҩаԥигеит.

Аилатәара хықәкы хадас иаман атәыла аҿы ишьақәгылаз аҭагылазаашьеи Аԥсны иқәынхо аерманцәа Рхеилак ахантәаҩы иҟаиҵаз аҳәамҭеи рылацәажәара.

Валери Бганба амчратә структурақәа алхратә кампаниа аан имҩаԥыргаз аусура азы иҭабуп иҳәеит.

«Алхрақәа актәи атур иҭышәынтәаланы имҩаԥысит. Аха, уи ашьҭахь, иаразнак аибарххарақәа цәырҵит. Зыӡбахә сымоу бжьыла иҭаҩҩу ааԥхьарақәеи, уи иашьҭанеиз Аерманцәа Рхеилак ахантәаҩы иааԥхьареи роуп. Аерманцәа Рхеилак атәыла амчра ргәырҽанаҵоит аҭыԥ шамаз аиҳарак аерманцәа ахьынхо ақыҭақәа рхадацәа рыршәара иадҳәалоу афактқәа. Ҳара иҟалаз еилырганы ари аибарххара аанаҳкылароуп, мап анакәха уи ҽеи алҵуам», – ҳәа иҳәеит Валери Бганба.

Иара ажәалагала ҟаиҵеит аоперативтә гәыԥ аиҿкаразы.

«Сгәы иаанагоит ҳара апрокуратура Хада ахылаԥшрала аоперативтә гәыԥ аԥаҳҵароуп, убри аан уи, жәаҳәарада, иалахәхароуп  Аҳәынҭқарратә шәарҭадара Амаҵзуреи аҩныҵҟатәи аусқәа Рминистрреи, еилыргатәуп абжьҭаҩрақәа рҿы иаҳәоз, аҳәамҭа аҿы иаҳәоз, иара убас аԥҟара аҵыхәала иалаҵаз арзаҳал иаҳәоз. Зегьы аҭыԥ иқәаҳҵароуп иаарласны, аҭагылазаашьа ҭышәынтәалатәуп», – ҳәа инаҵшьны иазгәеиҭеит Валери Бганба.

Аҟәа. Жәабранмза 17, 2025 шықәса. Аԥсныпресс. Аҳәынҭқарра Ахада инапынҵақәа назыгӡо Валери Бганба иҭижьыз Аусԥҟа ала аполковник Кәычбериа Дмитри Гарри-иԥа Аҳәынҭқарратә шәарҭадара Амаҵзура ахантәаҩы имаҵура аҟынтәи ихы дақәиҭтәуп.

Аҟәа. Жәабранмза 17, 2025 шықәса. Аԥсныпресс. Риҵатәи ареликтә милаҭтә парк аҿы асы зықәнауз ашәаԥыџьаԥ аԥшӡара убла хнакуеит. Аха инеиԥынкыланы асоура иахҟьаны апарк ахь анеира аамҭала иаанкылоуп.

Риҵатәи ареликттә милаҭтә парк абнахылаԥшҩы хада Ҭенгиз Џьергениа иҟоу аҭагылазаашьа зеиԥшроу далацәажәеит. Иацы ауп иара жәабранмза 18 – 19 рзы ашьхарахь амшцәгьақәа ирыхҟьаны апарк ахь анеира аркхар алшоит ҳәа аҳәамҭа аныҟаиҵоз.

Аҟәа. Жәабранмза 17, 2025 шықәса. Аԥсныпресс. Урыстәылатәи Афедерациа Ашьаусеилыргаратә Еилакы Александр Бастрыкин Аԥсны иҟоу урыстәылауаа рзинқәа реилагаразы агәаҭара еиҿкаазарц адҵа ҟаиҵеит.  

«Иҟоу азакәанԥҵара инақәыршәаны, Урыстәылатәи Афедерациа Ашьаусеилыргаратә Еилакы ахантәаҩы Александр Бастрыкин Ашьаусеилыргаратә Усбарҭа Хада Аԥсны иҟоу Урыстәыла атәылауаа рықәмақарреи рзинқәа реилагареи афакт ала ашьаусԥшааратә гәаҭара аиҿкаара азы адҵа ҟаиҵеит. Алеқсандр Бастрыкин агәаҭара амҩаԥысра хаҭала азылаԥшра аиҭалоит, ҳәа РИА Новости адырра алҭеит Урыстәыла Ашьаусеилыргаратә Еилакы аофициалтә хаҭарнак Светлана Петренко. (https://ria.ru/20250217/abkhaziya-1999912351.html)

Аҟәа. Жәабранмза 17, 2025 шықәса. Аԥсныпресс. Б.У. Шьынқәба ихьӡ зху Аҟәатәи абжьаратәи ашкол №1 аҿы аусура иалагеит жәларбжьаратәи аӡынтәи ашкол “Ашықәс арҵаҩы”. Уи аҳәаақәа ирҭагӡаны 12-ҩык Урыстәыла зҽаԥсазтәыз арҵаҩцәа аԥснытәи арҵаҩцәа рзы аҟазара-аклассқәа мҩаԥыргалоит.

Апроект рхы аладырхәуеит Аԥсны араионқәа зегьы рҟынтәи  100-ҩык инарзынаԥшуа арҵаҩцәа.

Аҟәа. Жәабранмза 17, 2025 шықәса. Аԥсныпресс. Апартиақәеи ауаажәларратә еиҿкаарақәеи Реидгыла Аҳәынҭқарра Ахада инапынҵақәа назыгӡо атәыла анапхгареи аоппозициеи рхаҭарнакцәа атәыла аҿы ишьақәгылаз ауаажәларра-политикатә кризис аҭышәынтәлара азы абҵарамза  19, 2024 шықәсазы ирыбжьарҵаз аиқәшаҳаҭра ӷәӷәала еилеигеит ҳәа аҳәамҭа ҟарҵеит.  

«Иарбоу Аиқәшаҳаҭра аҭагылазаашьа аконституциа аҳәаақәа ирҭагӡаны аанкылареи ҽҳәараанӡатәи Аҳәынҭқарра Ахада иалхрақәа жәабранмза 15, 2025 шықәсазы  рымҩаԥгаразы аӡбамҭа адкылареи алнаршеит. Аиқәшаҳаҭра апункт 5 инақәыршәаны, «иҟоу аминистрцәа рмаҵуратә уалԥшьа нарыгӡалоит ҿыц иалырхраны иҟоу Аҳәынҭқарра Ахада имаҵура дахагылаанӡа», – ҳәа иазгәаҭоуп Аидгылара иаланарҵәаз ааԥхьара аҿы.

Аҟәа. Жәабранмза 17, 2025 шықәса. Аԥсныпресс.  Аԥсны Аҳәынҭқарра адәныҟатәи аусқәа рминистрра Европатәи адәныҟатә еимадарақәа рзы Амаҵзура иҟанаҵаз аҳәамҭа иадҳәаланы иҟанаҵаз ахҳәаа:

Ҳара ҳхы азышьҭны азхьаԥшра аҳҭеит Европатәи адәныҟатә еимадарақәа рзы Амаҵзура апресс-маӡаныҟәгаҩ иҟаиҵаз аҳәамҭа, уа иаҳәоит: «Европатәи Аидгыла жәларбжьаратәи азин ала иазхаҵоу Қырҭтәыла аҵакыратә акзаареи асуверенитети ирыдгылоит. 2025 шықәса жәабранмза 15 азы иоккупациа зызуу Аԥсны арегион ҳәа изышьҭоу аҿы имҩаԥысыз Аҳәынҭқарра ахада иалхрақәа ирызкны иаҳгәалаҳаршәоит Европатәи Аидгыла урҭ зламҩаԥысыз аконституциатәи азинтәи ҳәаақәа ирықәшаҳаҭым. Европатәи Аидгыла азхамҵаратәи аинтеграциатәи политика амҩаԥгара иацнаҵоит».

Аҟәа. Жәабранмза 16, 2025 шықәса. Аԥсныпресс. Жәларбжьаратәи анаԥшыҩ иаҳасабала Аԥсны Аҳәынҭқарра Ахадарахь алхрақәа ирылахәыз урыстәылатәи аполитик, азиндырратә наукақәа рдоктор Сергеи Бабурин ареспублика аҿы 2025 шықәсазы имҩԥгаз алхрақәа реиҿкаара ахәшьара ҳаракы аиҭеит. 

«Сара сызлахәаԥшуа ала, аиашазы зегьы иахәҭоу аҩаӡараҿы имҩаԥысит, еиҿкааны, аҳаҭыреиқәара аарԥшны. Сара абри атәы сҳәеит сколлегацәа – жәларбжьаратәи анаԥшыҩцәеи Аҳәынҭқарра ахадарахь акандидатцәа рҟынтәи анаԥшыҩцәеи санрыҿцәажәозгьы.  Арҭ амшқәа рыҩныҵҟа сара Аҳәынҭқарра ахадарахь акандидатцәа реиҳараҩык сырԥылеит, срыҿцәажәеит иналукааша ауаажәларратәии аполитикатәи аусзуҩцәа, – ҳәа иҳәеит иара. – Сара зегьы аидеализациа азура сҭахӡам. Ҳәарада, зны-зынла аполитикатә аппонентцәа  рыбжьара аибарххара анцәырҵуазгьы ыҟан, аха акандидатцәа аамсҭашәара аарԥшны уи аҭышәынтәалара иақәшәон».  

Сергеи Бабурин иажәақәа рыла, иацтәи абжьыҭира алҵшәа аԥсуа уаажәларратә еилазаара аҿы аиҿагылара шыҟоу шаанарԥшуагьы, уи аиҳарак аибарххара хнаҽыроуп».