Аҟәа. Ԥхынгәымза 27, 2023 шықәса. Аԥсныпресс. Донбасс аҿы иҷыдоу арратә операциа аҿы хатәгәаԥхарала еибашьуаз, иҭахаз аибашьцәа Едуард Шьакаеи Олег Бебиеи рҭаацәа  1 млн. мааҭ рҟынӡа инаӡо аԥаратә цхыраара рызшәахоит.

Уи азы ақәҵара рыдыркылеит иахьа, ԥхынгәымза 27 рзы имҩаԥысыз аминистрцәа Реилазаара аилатәара аҿы.

Аҟәа. Ԥхынгәымза 27, 2023 шықәса. Аԥсныпресс. Аминистрцәа Реилазаара аҿы «Ачашылеи ачеи рыхәԥса аҳәынҭқарратә ҭышәынтәалара азы» ақәҵара ҿыц рыдыркылеит.

Ишьақәыргылоуп иреиҳауи аҩбатәии асорт ачашыла иалху хык ача азы иҿыцу аизыкылаҭиратә хәыԥсеи азаҵәылаҭиратә хәыԥсеи. Уажәшьҭарнахыс иреиҳау асорт ачашыла иалху кьылак ача 50 мааҭ иреиҳахаӡом,  0,6 кг - 30 мааҭ иреиҳахаӡом;  

Аҟәа. Ԥхынгәымза 27, 2023 шықәса. Аԥсныпресс. Аҳәынҭқарра Ахада Аслан Бжьаниа Аҟәа ақалақь аҿы имҩаԥигоз аинспекциатә гәаҭара аҳәаақәа ирҭагӡаны Аҟәатәи ашьха аҿы аԥшырҭатә плошьадкеи ацҳа Ҟаԥшьи рҿы аиҭашьақәыргыларатә усурақәа рымҩаԥысшьа гәеиҭеит.   

Аҟәа ақалақь ахада Беслан Ешба Аҳәынҭқарра Ахада иарбоу аобиектқәа рҿы иҩаԥысуа аусурақәа зегьы цәыббрамза  30 – Аԥсны жәлар Рџьынџьтәылатәи еибашьра  аҿы Аиааира агара Амш  30 - шықәса ахыҵра аҟынӡа ишхыркәшахо азы адырра ииҭеит.  

Аҳҭнықалақь ахада ацҳа Ҟаԥшь ақалақь аҿы асимволра зҵоу ҭыԥны иҟоуп ҳәа иазгәеиҭеит.

Аҟәа. Ԥхынҷкәынза 27, 2023 шықәса.  Аԥсныпресс. Аминистрцәа Реилазаара ақәҵарала Ранета Биџьева аҳәынҭқарратә нхаратә фонд аҟынтәи ахатәра аҳасабала илыҭахо анхарҭа ахәԥса ашәаразы азинҷыда лыҭахоит.

Ранета  Биџьева – Урыстәылатәи Афедерациа Лугансктәи Жәлартә Республика ицо аибашьра аҿы иҭахаз арепатриант Казбек Биџьев иԥшәмаԥҳәыс лоуп. Лара аҳәынҭқарратә нхаратә фонд аҟынтәи ахатәра аҳасабала илыҭахо, Гәылрыԥшь араион, Маҷаоа ақыҭа, Далтәи амҩа, аҩны № 2, ауада №2 ала иҟоу  анхарҭа ахәԥса ашәара аҟынтәи зынӡа лхы дақәыиҭхоит.

Аҟәа. Ԥхынгәымза 27, 2023 шықәса. Аԥсныпресс. Аминистрцәа Реилазаараҿы «Аԥсны аҩныҵҟатәи аусқәа Рминистрра аусбарҭақәа Адисциплинатә ԥҟаԥҵәа» ашьақәырӷәӷәаразы азы ақәҵара аиҭакрақәа аларгалеит.  

Алеишәатә лахьыҭара аусбарҭа анапхгаҩы аиакәымура  азы адырра аниоу инаркны жәамш ирылагӡаны имҩагазароуп, амаҵуратә гәаҭара амҩаԥгараан, мамзаргьы ашьаусеилыргара ахацыркраан акәзар, усҟан – аамаҵуратә гәаҭара, мамзаргьы ашьаусеилыргара  рхыркәшара ашьҭахь мызкы иахымгакәа, ахара зду ичымазара аамҭа, мамзаргьы иԥсшьараамҭа уахь иналамҵакәа.  

Аҟәа. Ԥхынгәымза 27, 2023 шықәса. Аԥсныпресс. Аҳәынҭқарра Ахада Аслан Бжьаниа Аҟәа ақалақь Тарас Шамба ихьӡ зху апарк аҿы аиҭашьақәыргыларатә усурақәа рымҩаԥысшьа гәеиҭеит.

Аҳҭнықалақь ахада Беслан Ешба Аҳәынҭқарра Ахада адырра ииҭеит уажәазы имҩаԥысуа аусурақәа рзы. Уи иажәақәа рыла, иажәхьаз адренажтә система рыԥсахит, адгьыл риашаны ахаҳәцәыла ирчаԥеит.

«Аӡыршә еиҭашьақәыргылоуп, Индоевропатәи ателеграф 13 ҭоурыхтә шьаҟақәа шьақәыргылахоит. Урҭ аамҭак азы иқәган, уажәы еиҭашьақәыргылахоит», - ҳәа иҳәеит Беслан Ешба.

Гагра. Ԥхынгәымза 26, 2023 шықәса. Аԥсныпресс. Аԥсны Ахада Аслан Бжьаниа Агәаҭара-аужьҭратә Пункт «Ԥсоу» аҟны аусуратә еилацәажәара мҩаԥигеит. Уи рхы аладырхәит аԥыза-министр Алеқсандр Анқәаб, Аҳәынҭқарра Ахада Иусбарҭа анапхгаҩы Џьансыхә Нанба, аҩныҵҟатәи аусқәа рминистр Роберт Киут, Гагра араион Администрациа ахада Иури Хагәышь, Аҳәынҭқарратә ҳазалхратә еилакы ахантәаҩы Оҭар Хьециа, Аҳәынҭқарратә шәарҭадара амаҵзура ахантәаҩы ихаҭыԥуаҩ Рустам Латипов.

Рустам Латипов адырра ҟаиҵеит аҵыхәтәантәи аамҭазы аинфраструктура аҿиараҟны,  Агәаҭара-аужьратә пункт «Ԥсоу» аҟны аҳәаахәчаратә нариадқәа аррмаҵзура рахысразы алшарақәа раԥҵаразы рзы акыр аихьӡарақәа шыҟоу. «Ҳазҭагылоу аамҭазы амаҵзура ахысразы изызрыцҳау ҳәа акгьы ыҟаӡам», - Латипов.

Аслан Бжьаниа иаҵшьны иҳәеит аҳәааҟны амаҵзура иахысуа зегьы рзы аҭагылазаашьа бзиақәа шаԥҵоу, ари аҳәаахьчаратә проблемақәа рыӡбараҟны ацхыраара ҟазҵаз абизнесуаа ишрыбзоуроу.

Аҟәа. Ԥхынгәымза 26, 2023 шықәса. Аԥсныпресс.  Краснодартәи аҳазылхыҩцәа амашьыналас агьежь аԥсахга аҭра иҭартәаны шамахамзар џьара иуԥымло ахьшьқәа изакәанымкәа Аԥсныҟа раагара аҽазышәара аԥхьырҟәҟәаара рылшеит.   

Урыстәылатәи Афедерациа Афедералтә ҳазылхратә Маҵзура Аладатәи аҳазылхратә усбарҭа апресс-маҵзура иҟанаҵо адыррақәа рыла, аҳазылхыҩцәа аужьҭра-гәаҭаратә ԥыԥшырҭа Адлер ала иаауаз амашьына агәаҭараан рылаԥш аахеит аштә ба илаҳәаны иҭаз абнатә ԥстәқәа.  

Амашьына арныҟәцаҩ аинспекторцәа дрыҿцәажәо арҭ абнатә ԥстәқәа ихазы ишааигоз, адекларациа зхаимырҭәаазгьы дахьыццакуаз азы ауп ҳәа иазгәеиҭеит. Ахьшьқәа рыиагаразы азин узҭо ақьаад ахаҵа имаӡамызт.

Аекспертиза ишышьақәнаргылаз ала, арҭ аԥсаатәқәа шықәсык зхыҵуа акәытрыхьшьԥшқақәа роуп. Урҭ рыҭира  ақәӡаара ашәарҭара иҭагылоу абнатә ԥстәқәеи аԥсаатәқәеи аҵиаақәеи рыла жәларбжьаратәи ахәҳаахәҭра азы Аконвенциа (СИТЕС) ала иҳәаақәҵахоит.

Аҟәа. Ԥхынгәымза 26, 2023 шықәса. Аԥсныпресс. Константин Ахба 13-14 шықәса зхыҵуа арԥарцәа рыбжьара абокс азы Урыстәыла Аԥхьахәгара аҿы аџьаз медал ианашьахеит. Аицлабрақәа мҩаԥысуан ԥхынҷкәынмза 19 – 25 рзы Владикавказ ақалақь аҿы имҩаԥысуан.  

Константин Ахба 48 кьыла иҟоу рыбжьара Краснодартәи атәылаҿацә ахьӡала дықәгылон. Зынӡа амедалқәа раиуразы еицлабуан Урыстәылатәи Афедерациа 69 регион аҟынтәи  309 –ҩык абоксиорцәа.

Аҟәа. Ԥхынгәымза 25, 2023 шықәса. Апсныпресс. Аҳәынҭқарра Ахада Гәдоуҭа апансионат «Черноморец» аҟны аиҭашьақәыргыларатә усурақәа шцо гәеиҭеит

Агәаҭаратә усурақәа раан Аԥсны Аҳәынҭқарра Ахада Аслан Бжьаниа Гәдоуҭа апансионат даҭааит. Ари аобиект анапхгаҩы Елена Клименко имҩаԥсыуа аиҭашьақәыргыларатә усурақәа ртәы лҳәеит.