Аҟәа. Жәабранмза 7, 2025 шықәса. Аԥсныпресс. Урыстәылатәи аҳақьымцәа ҿыц ииз аӡҟы Аԥснынтәи Шәачаҟа дыргеит.

Аҷкәын диит жәабранмза 5 рзы аҟәатәи ахшараиурҭа аҿы амгәарҭаҿы ицәырҵыз арԥҳатә патологиа иманы.

Урыстәыла агәабзиарахьчара аминистр Михаил Мурашко иҟаиҵаз адҵа ала анестезиологиа-реанимациатә бригада аӡҟы Аԥснынтәи Шәачаҟа ииагаразы Шәачантәи Аҟәаҟа амҩа иқәлеит.

Аҟәа. Жәабранмза 7, 2025 шықәса. Аԥсныпресс. Аҟәа ақалақь, Аҳабла Ҿыц Кьараз амҩаду ала игылоу жә-еихагыларак змоу аҩны №17 ахыб амца акит ҳәа аанацҳауеит Аԥсны Иҷыдоу аҭагылазаашьақәа рзы Аминистрра апресс-маҵзура.  

Аҟәа. Жәабранмза 7, 2025 шықәса. Аԥсныпресс.  Абарҭ амшқәа рзы 200-ҩык рҟынӡа Аԥснытәи абжьаратәи ашколқәа рҟынтәи арҵаҩцәеи адиректорцәеи Пиатигорск ақалақь аҿы иҟоу адыррақәа Рцентр «Машук» аҿы аҵарадырратә усмҩаԥгатәқәа рхы рыладырхәуеит, ҳәа адырра ҟанаҵоит Аԥсны аҵара Аминистрра.

Адыррақәа Рцентр «Машук» аҵарадырра аусхкы аҿы инагоу аекспертцәа еиднакылеит. Урҭ рметодикатә ԥышәа аҿар ирымардоит.

Аҟәа. Жәабранмза 7, 2025 шықәса. Аԥсныпресс. Урыстәылатәи анаука Амшныҳәеи Урыстәылатәи анаукақәа Ракадемиа 300-шықәса ахыҵреи разгәаҭара аламҭалазы Аҟәа ақалақь иҟоу Урыстәыла аус ацура азы Аофициалтә Хаҭарнакра аресурстә Центр аҿы аҳҭнықалақьи Гал араиони рҟынтәи ашкол аҵаҩцәеи арҵаҩцәеи рзы хықәкылатәи аусмҩаԥгатәқәа мҩаԥысит.

Урыстәылатәи анаука Амш есышықәса иазгәарҭоит жәабранмза 8 рзы. Уи аԥҵан рашәарамза, 1999 шықәса рзы, иагьадҳәалахеит 2024 шықәсазы  300 шықәса зхыҵыз Урыстәыла анаукақәа Ракадемиа аԥҵара.

Аныҳәа амҩаԥгара ахықәкы хаданы иҟоуп ауаажәларратә еилазаара анаукатә прогресс разхьарԥшра.

Ареспублика Аԥсны иҟоу Урыстәыла аус ацуразы Аофициалтә Хаҭарнакра анапхгаҩы Владислав Куликов Ахаҭарнакра аҟәатәи аресурстә Центр аҿы еизаз аусмҩаԥгатәқәа рыпрограмма дирдырит.

Уи иалалеит адокументалтә фильм «Будущее на твоей тарелке». Уи ҳаԥхьаҟа иҟало афатәқәа ирызкуп (аамҭак ала афильм дырбахеит Гал ақалақь аҿы иҟоу Ахаҭарнакра аресурстә Центр аҿы). Иара убас имҩаԥысит Урыстәыла анаукақәа Ракадемиа аҭоурых иазку ажәахә аӡыргара, Урыстәылатәи анаука аихьӡарақәа атема ала  аекспресс-викторина, иара убас амузеи аҭаарала Аексперименталтә патологиеи атерапиеи Ринститут ахь аекскурсиа.

«Ҳара аԥснытәи ҳколлегацәа иҭабуп ҳәа раҳҳәоит иҳауз ас еиԥш алшарақәа рзы. Аԥсны анаукақәа Ракадемиеи ҳареи аимадара бзиа ҳабжьоуп», – ҳәа иҳәеит Владислав Куликов.

Аҟәа. Жәабранмза 7, 2025 шықәса. Аԥсныпресс. Аԥсны аҭыԥантәи ахаланапхгаратә усбарҭақәа рахь алхрақәа мҩаԥысуеит мшаԥымза 6 рзы.

Аҳәынҭқарра Ахада инапынҵақәа назыгӡо Валери Бганба Аԥсны аҭыԥантәи ахаланапхгаратә усбарҭақәа рахь алхрақәа рымҩаԥгара азы Аусԥҟа инапы аҵаиҩит.

Аҟәа. Жәабранмза 7, 2025 шықәса. Аԥсныпресс. Аҳәынҭқарра Ахада инапынҵақәа назыгӡо Валери Бганба «Аҳазалхра-тарифтә еиҿкаара азы ауснагӡатәқәа рзы» Аусԥҟа инапы аҵаиҩит.

Асоциал-економикатә ҭышәынтәалара ашьақәыргыларазы, Ареспублика Аԥсны ахь импорт ҳасабла иаларгало атауарқәа, афатә аалыҵгьы уахь иналаҵаны, егьырҭ зда ԥсыхәа ыҟам атауарҵқәа рыхәԥсақәа иаалырҟьаны рышьҭыҵра алмыршара азы, иара убас амилаҭтә економика аҿиара азы иманшәалоу аҭагылазаашьақәа раԥҵара иазкны, Аԥсны Аҳазалхратә тариф аиҿкаара аҭышәынтәалара азы ажәалагалақәа реиқәыршәара  иазырханы, жәабранмза 10 инаркны мшаԥымза 10, 2025 шықәсанӡа, Аԥсны аминистрцәа Реилазаара лаҵарамза 31, 2024 шықәса рзы иаднакылаз, ажьырныҳәамза  1, 2025 шықәсазы азинмчы зауз Ақәҵара № 68 апункт 3 ала Аԥсны Аҳазалхратә тариф иаланагалаз аиҭакрақәа рынагӡара аамҭала раанкылара азы Ақәҵара инапы аҵаиҩит.   

Аҟәа. Жәабранмза 7, 2025 шықәса. Аԥсныпресс. Аԥсны Аҳәынҭқарратә ҳазалхратә Еилакы аоперативтә ҟәшеиҵа аусзуҩцәа Аҟәа ақалақь, Гәымсҭатәи амҩала игылоу аҩнеихагыла № 27 аҿы ацокольтә еихагыла аҿы афымцацәаҳәа иаҿакыз, аус зуаз акриптовалиута арҳара иазку 90 аппарат рыԥшааит. Аиқәыгшәагақәа зтәу Аԥсны атәылауаҩ С.В.​​​​ Касланӡиа иаоуп.

Аҟәа. Жәабранмза 6, 2025 шықәса. Аԥсныпресс. Бадра Гәынба Урыстәыла аԥыза-министр ихаҭыԥуаҩ Алеқсандр Новак диԥылеит. Урыстәыла аҩ-тәылак рыбжьара аинвестициатә еиқәшаҳаҭра уажәы ишыҟоу анагӡара шалымшо азы Аԥсны иқәнаргыло азԥхьанҵақәа иақәшаҳаҭуп, ҳәа аԥсуа политик диҿцәажәо аҳәамҭа ҟаиҵеит Урыстәыла аԥыза-министр ихаҭыԥуаҩ   Алеқсандр Новак.  

«Ҳара уи ахәаԥшра ҳазыхынхәуеит, жәаҳәарада, уи еиҟараны аҩ-ганк – аҩ-ҳәынҭқаррак руааԥсыреи абизнеси ринтересқәа аныԥшуазар ахәҭоуп,», — ҳәа иазгәеиҭеит иара.  

Аҟәа. Жәабранмза 6, 2025 шықәса. Аԥсныпресс. Урыстәылатәи Афедерациа аԥыза-министр ихаҭыԥуаҩ Александр Новак Бадра Гәынба диԥыло, Аԥсны иалагалаз алашара арцәара аамҭеихша аԥыхразы Урыстәыла Аԥсны афымцамчла аиқәыршәара ахацыркра иазхиоуп ҳәа иазгәеиҭеит.

«Уаҵәы инаркны Аԥсны иалагалаз алашара арцәара аамҭеихша аԥыхразы Урыстәыла аганахьала Аԥсны афымцамчла аиқәыршәара ахацыркразы иҳалшо зегьы аҟаҵара ҳалагоит.  Аԥсны ауааԥсыреи асоциал-економикатә усхкқәа ирыҵанакуа аобиектқәеи уаанӡа иҟаҵаз аҳәарала Урысттәыла Аԥсныҟа идәықәнаҵо афымцамч ахыхь инацҵаны афымцамч роуроуп. Адгылара аҳасабала ҳара иахәҭоу аӡбамҭақәа рыдкылара ҳазхиоуп», - ҳәа иҳәеит Александр Новак.

Аҟәа. Жәабранмза 5, 2025 шықәса. Аԥсныпресс. Аԥсны аҵара аминистр инапынҵақәа назыгӡо Инал Габлиеи Аԥсны ахәыҷы изинқәа рыхьчара азы Азинмчы змоу Мактина Џьынџьалԥҳаи   Аҟәатәи аҳәынҭқарратә коллеџь  аҿы аинвалидцәеи згәабзиара алшара ԥку ауааи рыбжьара азанааҭтә ҟазара азы Амилаҭтә чемпионат «Абилимпикс – 2024» аҿы аиааира згаз аԥснытәи акоманда ахаҭарнакцәа аҳамҭақәа – азеиԥшкомандатә храҿақәа, амедалқәа, аҳаҭыртә шәҟәқәа ранашьара азы ирԥылеит, ҳәа адырра ҟанаҵоит Аԥсны аҵара Аминистрра апресс-маҵзура.

Мактина Џьынџьалԥҳа лажәақәа рыла, аҳамҭақәа Урыстәыла иҟоу Аԥсны Ацҳаражәҳәарҭа ала «Абилимпикс» аиҿкааҩцәа  ирыҭан, избан акәзар, аԥснытәи акоманда аконкурс нҵәаанӡа ихынҳәыр акәхеит, аҳамҭақәа раиура иахьымӡаӡеит.