Аконференциа алахәылацәа рахь аофициалла адныҳәаларатә цҳамҭақәа дәықәырҵеит Урыстәылатәи Афедерациа Ахада Владимир Путин, Афедерациа хеилак ахантәаҩы Валентина Матвиенко, Аҳәынҭқарратә Дума ахантәаҩы Виачеслав Володин, Урыстәыла адәныҟатәи аусқәа рминистр Сергеи Лавров, Ихьыԥшым Аҳәынҭқаррақәа Реиҩызара амаӡаныҟәгаҩ Хада ихаҭыԥуаҩ Ильхом Нематов, Жәларбжьаратәи Аџьар Ҟаԥшь Акомитет апрезидент Мириана Сполиарич.

Аконференциа иалаху ацифровизациа иҿыцу алшаарақәа шаанартуа, аха убри аан ашәарҭарақәакгьы шацу, убри инамаданы хаҭалатәи адыррақәа рыхьчареи ауаҩы изинқәа аонлаин ҵакыраҿы рыхьчареи ихадоу зҵаарақәаны иҟалароуп ҳәа иазгәарҭоит.

Аԥсны аомбудсмен Анас Кьышьмариа егьырҭ атәылақәа рҟынтәи ауаҩы изинқәа рыхьчаҩцәа дырԥылеит. Лара иазгәалҭеит азинхьчаратә усхк аҿы жәларбжьаратәи аимадарақәа атәылауаа рзинқәа аҳәаанырцә рыхьчаразы аҳәынҭқарратә политика ахәҭак ахьаку адагьы, уи аԥышәа аимдаразы ихәарҭоу хырхарҭаны ишыҟоу.

Анас Кьышьмариа  60 тәыла рҟынтәи ахаҭарнакцәа злахәыз ари аконференциа аҿы дықәгыло иазгәалҭеит:

«Алахәылацәа реиҳараҩык иазгәарҭеит ацифраркра аамҭазы ауаҩы хаҭалатәи идыррақәа рыхьчара азҵаара ҵарны ишықәгылоу, лассы-лассы ицәырҵуа акибершәарҭарақәа, аҩнуҵҟатәи агхақәеи афишинги рымшала аинформациа ацәцара ахьыҟало иахҟьаны. Иԥсабаратәым аинтелекти ацифратә технологиақәеи рыҿиара ҳанашьҭало иаҳхамышҭуазароуп  зегьы ирыцку – ауаҩы ауаҩы диҭахуп», — ҳәа инаҵшьны иазгәалҭеит Анас Қьышьмариаԥҳа.

Афорум алахәылацәа апрактикатә ԥышәа еимырдеит, азакәанԥҵаратә усура иалацәажәеит.