Аҟәа. Ԥхынгәымза 3, 2024 шықәса. Аԥсныпресс. Ԥхынгәымза  1 инаркны жьҭаарамза 30, 2024 шықәсанӡа имҩаԥыслоит Урыстәылеи Аԥсни рҟынтәи абаҩхатәра злоу анагӡаҩцәа еидызкыло, Алиса Гыцԥҳа иаԥшьылгаз lII Жәларбжьаратәи амузыкатә еицлабра.

Аконкурстә номинациақәа: академиатә авокалтә нагӡареи ансамбль аҟазареи (акамертә, аинструменталтә, авокалтә ансамбльқәа)

Афестиваль Агран-при азы аицлабра аԥхьахәтә фонд 200 000 мааҭ ыҟоуп.

Иара убас аноминациақәа зегьы рҿы I, II, III аҩаӡарақәа зауа аԥаратә ҳамҭақәа ранаршьоит.

Аԥхьахә ҷыдақәа рырҭоит Урыстәыла иналукааша акультуратә институтқәа.

Аҟәа. Ԥхынгәымза 3, 2024 шықәса. Аԥсныпресс. Археологиатә практика амҩаԥгараан Аҟәатәи абааш аҵакыраҿы ААУ астудентцәа анышәаԥшь иалху ажәытәӡатәи, инықәырԥшшәа иуҳәозар, ҳера V–VI ашәышықәсақәа  иаҵанакуа аҳаԥшьақәа (амфорақәа) рыԥшааит.

Астуденттә практика анапхгаҩы, ААУ аҭоурыхтә факультет адекан Алик Габелиа иажәақәа рыла, иҟалар алшоит архиологиатә жрақәа ахьымҩаԥысуа аҭыԥ аҿы ахәыҷтәы ԥсыжырҭақәа ирыдҳәалоу аиԥш-зеиԥшу егьырҭ амфорақәагьы ыҟазар.

Аҟәа. Ԥхынгәымза 3, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа «Ахьӡ-Аԥша» аорден II , III аҩаӡара ранашьара азы Аусԥҟақәа инапы рыҵаиҩит.  

Хьиба Рауль Тамшьыгә-иԥа ианашьоуп иреиҳау аҳәынҭқарратә ҳамҭа «Ахьӡ-Аԥша» аорден II аҩаӡара Аԥсны Аҳәынҭқарра ауаажәларра-политикатә ԥсҭазаара активла иҽалархәреи Очамчыра ақалақь аҿиара аус аҿы илагала дууи рзы.

Аҟәа. Ԥхынгәымза 3, 2024 шықәса. Аԥсныпресс.  Аԥсны адәныҟатәи аусқәа рминистр инапынҵақәа назыгӡо Одиссеи Бигәаа атәыла аԥыза-министр Алеқсандр Анқәаб  Кавказнҭыҵ аҭынчреи аҭышәынтәалареи рышьақәыргылара азы Жәларбжьаратәи Женеватәи аиҿцәажәарақәа 61-тәи араунд алҵшәақәа рзы адырра иҭеит. Аконсультациақәа рхы аладырхәит Аԥсны, Аахыҵ Уаԥстәыла, Урыстәылатәи Афедерациа, Қырҭтәыла, Еиду Америкатәи Аштатқәа рхаҭарнакцәа. Аиҿцәажәарақәа рҿы аицхантәаҩра нарыгӡон Еиду Амилаҭқәа Реиҿкаара (ООН), Европатәи атәылақәа Реидгыла Ашәарҭадара азы Аиҿкаара (ОБСЕ), Европатәи атәылақәа Реидгыла (ЕС).

Одиссеи Бигәаа ишазгәеиҭаз ала, аиҿцәажәарақәа рҿы ҩаԥхьа иалацәажәон аҳәаа иаԥну араионқәа рҿы аҭагылазаашьа. Аԥсны, Аахыҵ Уаԥстәыла, Урыстәыла еиҭахгьы инаҵшьны ирҳәеит Қырҭтәыла амч ахамырхәаразы аиқәшаҳаҭра анапаҵаҩреи Гал Аидысларақәа рызхьаԥшреи раԥырҟәҟәаареи рзы амеханизм (МПРИ) арҿыцреи шаҭаху. Ақырҭуа ган акәзар, аҳәынҭқарратә ҳәаа изакәанымкәа ахысра ахҭысқәеи иара убас Аԥсны аӡбарҭа аӡбарала иҭаку Қырҭтәыла атәылауаа рызҵаареи ракәын изызхьаԥшуаз. Қарҭ уаанӡеиԥш уажәгьы атермин «аоккупациа зызу аҵакыра» ахы ианархәон, амч ахамырхәаразы аҭакԥхықәра Москва ахахьы иагар шакәу аҳәон. «Аганқәа рыбжьара амч ахархәара  мап ацәкра азы аганқәа зегьы рзы аҭакԥхықәра зцу аусшәҟәы анапаҵыҩра азы аилибакаара залмыршахеит», - ҳәа иҳәеит Одиссеи Бигәаа.

Аҟәа. Ԥхынгәымза 3, 2024 шықәса. Аԥсныпресс. Аԥсны Аҳәынҭқарратә камертә оркестр ԥхынгәымзазы Пицундатәи аныхабаа аҿы иқәгылалоит.

Аконцертқәа мҩаԥыслоит есԥшьаша, асааҭ 17:00 рзы. Раԥхьатәи аконцерт мҩаԥгахоит ԥхынгәымза 4 рзы.   

Аоркестр асахьаркыратә напхгаҩи адирижиор Хадеи  – Аԥсны жәлар рартист Давид Терзиан.

Аҟәа. Ԥхынгәымза 2, 2024 шықәса. Аԥсныпресс. Иахьа Аҟәа ақалақь, Ареспубликатә ахәыҷтәы-қәԥштә спорттә хәмаррақәа рышкол аҿы «Сергеи Уасил-иԥа Багаԥшь игәалашәара Ахраҿа агара азы» амҵәышәмпыл азы Жәларбжьаратәи атурнир аартра иазкны аныҳәатә церемониа мҩаԥысит.  

Шьыжьы инаркны атурнир алахәылацәа Очамчыра араион Џьгьиарда ақыҭа иаҭааит. Урҭ Аԥсны Аҳәынҭқарра Аҩбатәи Ахада, Аԥсны Афырхаҵа, Аԥсны амҵәышәмпыл Афедерациа раԥхьатәи апрезидент, «Ахьӡ-Аԥша» аорден I аҩаӡара занашьаз Сергеи Багаԥшь анышә дахьамадоу ашәҭ шьыҵәрақәа шьҭарҵеит.

Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба атурнир алахәылацәа дрыдныҳәалеит, ақәҿиарақәагьы рзеиӷьаишьеит.

Аԥсны амҵәышәмпыл апрезидент Ераст Агәмаа атурнир аԥснытәи амҵәышәмпыл шәы-шықәса ахыҵра азгәаҭара ашықәс азы имҩаԥысуеит ҳәа иазгәеиҭеит.  Сынтәа амҵәышәмпыл азы Аԥсны еизгоу акоманда Краснодартәи атәылаҿыцә ачемпионат аԥхьахә агара алшеит.

Аҟәа. Ԥхынгәымза 1, 2024 шықәса. Аԥсныпресс.  Атәыла аҩныҵҟатәи аусқәа Рминистрра аекономикатә шәарҭадара аусбарҭа аусзуҩцәеи Гәылрыԥшь араион аҩныҵҟатәи Аусбарҭеи Аҳәынҭстандарти русзуҩцәеи Уарча ақыҭа, ԥыхьатәи ашәҭааӡарҭатә совхоз аҵакыраҿы аус зуаз акриптофера рыԥшааит.

Аҟәа. Ԥхынгәымза 1, 2024 шықәса. Аԥсныпресс. Одиссеи Бигәаа Приднестровиатәи Молдавиатәи Ареспублика адәныҟатәи аусқәа рминистр Витали Игнатиев дидныҳәалеит.

Аԥсны Аҳәынҭқарра Адәныҟатәи аусқәа рминистр инапынҵақәа назыгӡо Одиссеи Бигәаа Приднестровиатәи Молдавиатәи Ареспублика адәныҟатәи аусқәа Рминистр Витали Игнатьев идиныҳәалеит ПМР ААР ашьаҭаркра 32 шықәса ахыҵра.

Адныҳәалараҿы иаҳәоит:

Аҟәа. Ԥхынгәымза 2, 2024 шықәса. Аԥсныпресс. Ԥхынгәымза 2 рзы Одиссеи Бигәааи Приднестровтәи Молдавтәи Ареспублика аофициалтә хаҭарнак Гарри Кәпалбеи реиԥылара мҩаԥысит, ҳәа адырра ҟанаҵоит Аԥсны адәныҟатәи аусқәа Рминистрра аофициалтә саит.

Аиԥылара аҳәаақәа ирҭагӡаны Одиссеи Бигәааи Гарри Кәпалбеи Кавказнҭыҵ аҭынчреи аҭышәынтәалареи рзы Жәларбжьаратәи  Женеватәи аилацәажәарақәа 61-тәи араунд алҵшәақәа ирылацәажәеит, Урыстәыла иҟанаҵаз адгылара ҷыдала иазааҭгылеит.

Аҟәа. Ԥхынгәымза 2,  2024 шықәса. Аԥсныпресс. Очамчыра араион Мықә ақыҭан иҿыцу аӡеизгарҭатә  бааш аргылара иаҿуп. Уи аҭыԥантәи ашколи 28 ҭаацәареи аӡрыжәтә ала реиқәыршәара алнаршоит.

58-ҩык ахәыҷқәа ахьҭоу аҭыԥантәи ашкол аҿы акыр ауадаҩрақәа ыҟан аӡы амамзаара иадҳәаланы. Ашкол адиректор инапынҵақәа назыгӡо Изольда Ҭарба ашықәсҿцтәи аныҳәақәа раламҭалазы уаанӡа иҟаз аӡыҭра (абак) анкаҳа ашьҭахь, ашкол ӡыла аиқәыршәара зынӡа иаанкылеит ҳәа иазгәалҭеит.

«Ааигәа иҟаз аҵеиџь аҟынтәи аӡы изеиԥшразаалак асанитартә нормақәа ирықәшәомызт. Убри аан иазгәаҭатәуп ашкол аҿы ишаҭаху атехникатә ӡы адагьы аӡрыжәтәгьы. Ҳара дҳацхрааит ақыҭа ахада, иара ашкол ҳамҭас иаиҭеит аӡшьарҭра. Уи егьи ақыҭа аҟынтәи иааргоз аӡы ала идырҭәуан. Ҳара даара ҳаигәырӷьоит цәыббрамзазы, аҵарашықәс ҿыц аламҭалазы ашкол ӡыла аиқәыршәара ахьеиҭашьақәыргылахо», – ҳәа илҳәеит Изольда Ҭарба.