Аҟәа. Цәыббрамза 15, 2022 шықәса. Аԥсныпресс. Аԥсны Ахәаахәҭра-Ааглыхратә Палата ацхыраарала Аҟәа ақалақь архитектор хада Светлана Шаменкова лнапхгарала Аԥснытәи аделегациа Ҟрым атерриториа акомплекстә ҿиара азы жәларбжьаратәи аконференциа «Крым Урбан Форум» рхы аладырхәуеит.

Аусмҩаԥгатә цәыббрамза  15 – 17 рзы Аԥсны Аҳәынҭқарреи Ареспублика Ҟрыми рыбжьара ахәаахәҭра-економикатә, анаука-техникатә, агуманитартә усеицура азы акомплекстә план анагӡара аҳәаақәа ирҭагӡаны   имҩаԥыслоит.

Аԥсны аделегациа аилазаараҿы иҟоуп: Ахәаахәҭра-Ааглыхратә Палата аусзуҩ, аинформациатә технологиақәа, аӡыргареи ацәыргақәҵатә усуреи рзы Аусбарҭа анапхгаҩы инапынҵақәа назыгӡо Ната Амҷба, архитекторцәа Ҭемыр Касланӡиеи Кама Кациеи.

Аҟәа. Цәыббрамза 15, 2022 шықәса. Аԥсныпресс.  Аԥсныҟа агастрольқәа рыманы иаауеит нхыҵуаԥстәылатәи ахәаԥшыҩ қәыԥш итеатр «Саби».

Цәыббрамза 20 – 21 рзы С.Ҷанба ихьӡ зху Аԥснытәи аҳәынҭқарратә драматә театр аҿы ахәаԥшцәа идырбахоит Нарҭтәи аепос амотивқәа рыла иқәыргылоу аспектакль «Нарҭ Сасрыҟәеи ацәмаакҩи».   

Аспектакль арежиссиор-ақәыргылаҩ – Адгәыр Ақаҩба, асахьаҭыхыҩ-ақәыргылаҩ –  Баҭал  Џьапуа.

Аԥслымӡтә анимациа асахьаҭыхҩы -  Викториа Володина (ақ. Москва), асахьаҭыхыҩцәа –  Светлана Ситоховеи Ирина Кулкинеи,  акостиумқәа  равтор Светлана  Хударова, апластиографиа - Џьамболат Сланов, амузыкатә еиқәыршәара - Габреил Габараев.

Аҟәа. Цәыббрамза 15, 2022 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра аусзуҩцәа аминистр Лев Кәыҵниа инапхгарала агуманитартә цхыраара изаамҭанытәиу апартиа анагара ашьҭахь Донецкынтәи Аԥсныҟа ихынҳәит. 17 тонн  рҟынӡа инаӡо агуманитартә еидара аиҳарак аԥаҭлыкақәа ирҭаҭәоу аӡрыжәтәи афатә аалыҵқәеи рыла ишьақәгылоуп. Уи хатәгәаԥхаралатәи аҟәшеиҵа аилазаараҿы Донецктәи Жәлартә Республика ахьчаразы еибашьуа ҳаибашьцәа ирызнаган. Агуманитартә цхыраара аҟынтәи быжь тоннак Очамчыра араион Ахадареи ауааԥсыреи рыла еизган. Аԥснытәи аԥсеиқәырхаҩцәа хатәгәаԥхарала еибашьуа ҳаԥсуа еибашьцәа ирԥылеит.

Аҟәа. Цәыббрамза 14, 2022 шықәса. Аԥсныпресс. Цәыббрамза 14, 2022  шықәса рзы Аԥсны адәныҟатәи аусқәа Рминистрра аҿы атәыла адәныҟатәи аусқәа рминистр ихаҭыԥуаҩ Ирахли Ҭыжәбеи Кавказнҭыҵ аҭынчреи аҭышәынтәалареи рзы Жәларбжьаратәи женеватәи адискуссиақәа рыҟны ацхантәаҩы – Еиду Амилаҭқәа Реиҿкаарақәа рхаҭарнак Џьихан Султаноглу, Европатәи атәылақәа Реидгыла ашәарҭадара Ахеилак аҟынтәи Жәларбжьаратәи женеватәи адискуссиақәа рыҟны  ацхантәаҩы Виорел Мошану, Аахыҵ Кавказ ала Европатәи атәылақәа Реидгыла Аҷыдалкаатә хаҭарнак  Биорн Киуне реиԥылара мҩаԥысит. 

Аԥсуа ган аҟынтәи ари аиԥылара рхы аладырхәит иара убас Аԥсны аҳәынҭқарратә шәарҭадара азы Амаҵзура ахантәаҩы ихаҭыԥуаҩ Заал Хәарҵкьиа, Аԥсны адәныҟатәи аусқәа Рминистрра аусзуҩцәа, Женеватәи адискуссиақәа ирылаху Лаша Аҩӡба, Артур Гагәылиа, Мадина Шамба. 

Аконсультациақәа ртема хаданы иҟан Женеватәи адискуссиақәа изаамҭанытәиу 56-тәи араунд амҩаԥгара азы иҟоу алшарақәеи аҭагылазаашьақәеи иарбоу аформат аҳәаақәа ирҭагӡаны анаҩс имҩаԥгахо аусуреи.  

Аиԥылара аҿы атәыла адәныҟатәи аусқәа рминистр ихаҭыԥуаҩ Иракли Ҭыжәба аԥсуа ган ааигәатәи арегионқәа рҿы ишьақәгыло аҭагылазаашьа, иара убас Қырҭтәыла аҩныҵҟа имҩаԥысуа аполитикатә процессқәеи  акыр иазҿлымҳауп ҳәа иазгәеиҭеит.

«Ҳара ахшыҩзышьҭра аҭаны ҳацклаԥшуеит иахьа Қырҭтәыла имҩаԥысуа аполитикатә процессқәа, Қырҭтәыла иҳараку амаҵзурақәа змоу анапхгаҩцәа аконфликт аиҭарҿиареи ашәарҭадареи рызҵаарақәа ирыдҳәаланы иҟарҵо аҳәамҭақәа», - ҳәа иҳәеит Иракли Ҭыжәба.

Аҟәа. Цәыббрамза 14, 2022 шықәса. Аԥсныпресс.  Аԥсны Ауаажәларратә Палата аҿы имҩаԥысуеит Аҳәынҭқарра Ахада Аслан Бжьаниеи аоппозициа ахаҭарнакцәеи реиԥылара.

Аиԥылара цәыббрамза 6, 2022 шықәса рзы ареспубликатә уаажәларратә еиҿкаара «Аԥсны жәлар реиҿкаара» анапхгаҩы Адгәыр Арӡынба, ареспубликатә уаажәларратә еиҿкаара «Аруаа» анапхгаҩы Ҭемыр Гәлиа, ареспубликатә политикатә партиа  «Аԥсны жәлар ракзаара Афорум» ахантәаҩы Аслан Барцыц, аполитикатә партиа «Аԥсны» ахантәаҩы Витали Габниа, Ауаажәларратә Палата абазаҿы Аконсультативтә Хеилак аԥҵаразы  Аиқәшаҳаҭра апроект алацәажәара инамаданы  аиԥылара аиҿкааразы  инашьҭыз ааԥхьара инақәыршәаны, Ауаажәларратә Палата абжьгареи абжьацәажәареи рыла еиҿкаахеит.

Аиԥылара рхы аладырхәуеит Аԥсны Аҳәынҭқарра Ахада Ихаҭыԥуаҩ Бадра Гәынба, Аҳәынҭқарра Ахада Иусбарҭа анапхгаҩы Џьансыхә Нанба, ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иусбарҭа анапхгаҩы ихаҭыԥуаҩ Зураб Қаџьаа, адәныҟатәи аусқәа рминистр Инал Арӡынба, «Аԥсны Жәлар Реиҿкаара» анаԥхгаҩы Адгәыр Арӡынба, Ареспубликатә уаажәларратә Еиҿкаара «Аруаа» анапхгаҩы Ҭемыр Гәлиа, Ареспубликатә политикатә Партиа «Аԥсны Жәлар ракзаара Афорум»  ахантәаҩы Аслан Барцыц, аполитикатә Партиа «Аԥсны» ахантәаҩы Витали Габниа.

Аҟәа. Цәыббрамза 14, 2022 шықәса. Аԥсныпресс. Аԥсны атранспорттә  Прокуратура жәеиза шықәса зхыҵуаз Сара Ахвелидиани  лҭахара афакт инамаданы агәаҭара хацнаркит. Абри атәы аанацҳауеит Апрокуратура Хада асаит.

Аҟәа. Цәыббрамза 14, 2022 шықәса. Аԥсныпресс. Аԥсны Аҳәынҭқарратә шәарҭадара Амаҵзура апресс-маҵзура иҟанаҵо адыррақәа рыла, цәыббрамза 15 -27 рзы Аҟәа ақалақь аҿы антитеррористтә ҽазыҟаҵарақәа мҩаԥгахоит.  Аҽызаҟаҵарақәа Аҟәатәи амшынтә баӷәазеи уи иаԥну аҵакыреи рҿы имҩаԥыслоит.

Аҟәа. Цәыббрамза 14, 2022 шықәса. Аԥсныпресс. Аҟәа ақалақь Ахада Беслан Ешба цәыббрамза  23 рзы ақалақьзегьтәи аекологиатә акциа «Ицқьоу ақалақь» амҩаԥгара азы Ақәҵара инапы аҵаиҩит, ҳәа адырра ҟанаҵоит аҳҭнықалақь Ахадара асаит.

Аҳҭнықалақь Ахадара ақалақь ауааԥсыра зегьы акциа рхы аладырхәырц рықалақь гәакьа  иацхраарц азы ааԥхьара ҟанаҵоит.

Акциа аиҿкаареи амҩаԥгареи рзы ақалақьтә штаб аԥҵоуп.

Аҟәа.  Цәыббрамза 14, 2022 шықәса. Аԥсныпресс. Имҩаԥысит Аҳәынҭқарра Ахадеи Аԥсны Жәлар Реизара – Апарламент адепутатцәеи реиԥылара.

Аԥсны Аҳәынҭқарра Ахада Аслан Бжьаниа ареспублика адепутаттә корпус ахаҭарнакцәа алархәны аиԥылара мҩаԥигеит.

Аиԥылара иалахәын Аҳәынҭқарра Ахада Ихаҭыԥуаҩ Бадра Гәынба, аԥыза-министр Алеқсандр Анқәаб, Аҳәынҭқарра Ахада Иубарҭа Анапхгаҩы Џьансыхә Нанба, Ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иубарҭа Анапхгаҩы ихаҭыԥуаҩ Зураб Қаџьаиа, адәныҟатәи аусқәа рминистр Инал Арӡынба.

Аҟәа. Цәыббрамза 12, 2022 шықәса. Аԥсныпресс. Ҩаԥхьа агуманитартә еидара Донбассҟа идәықәҵахеит. Аԥсны Иҷыдоу аҭагылазаашьақәа рзы Аминистрра аусзуҩцәа Донецҟҟа инаргараны иҟоуп   17 тонна агуманитартә еидара.