Аҟәа. Лҵарамза 8, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа анҭыҵтәи аусуратә еилацәажәара мҩаԥигеит Очамчыра араион Администрациаҟны.
Амшхәаԥштә аҟны иқәгылан араион асоциал-економикатә ҿиара иадҳәалаз азҵаатәқәа.
Араион ахада Беслан Бигәаа аусурақәа рцашьа иазкны аҳасабырба ҟаиҵеит. Иара иҟаиҵаз адыррала, Очамчыра араион Аинвестициатә программа аҳәаақәа ирҭагӡаны 2020-2022 шш.рзы, Аԥсны Аҳәынҭқарра асоциал-економикатә ҿиара афинанстә лимит иартәеит 376 383 нызқь мааҭ, иазоужьуп 322 954 нызқь мааҭ, иахаршәалоуп -16 нызқь мааҭ, 2022 ш. алимит аҟынтә ахархәара алыршамхеит - 53 411 нызқь мааҭ.
Беслан Бигәаа адырра ҟаиҵеит аусмҩаԥгатәқәа фба шынагӡоу азы: Тамшь ақыҭан аишьцәа Занҭариаа рыхьӡ зху амҩаҟны акаҭранбетонн ақәырҭәага мыруга; аихшарҭатә цәаҳәақәа шьаҭанкылатәи рырҽеира; Звольтҳараку 220 кв. «Аҽгәара» арҽеиратә усуразы амыругеи амаҭәахәқәеи раахәара; Ԥсоуи Егрыи рыбжьара Ареспубликатә мҩаду Аҟәа-Очамчыра иаҵанакуа аҭыҧ (актәи аетап) фымцалашарала аиқәыршәара; Мықә ақыҭан акаҭранбетон ақәырҭәаразы амыруга.
Иара убас, афинанс азоужьын Мықә ақыҭан аӡеизакырҭатә ргыламҭа аргылара.
Беслан Бигәаа иҟаиҵаз адыррала, ареспубликатә биуџьет абзоурала 2021 шықәсазы Ӷәада ақыҭан ацҳаҟны шьаҭанкылатәи арҽеиратә усура мҩаԥган, Аҭара ақыҭа анхацәа ӡыла реиқәыршәаразы аӡыҵыҵырҭа аҟаҵаразы адгьыл кылырҵәеит, Гәыԥи Маркәылеи ақыҭақәа рыҟны астадион хәыҷқәа ргылан, аӡыҵыҵырҭа аҟаҵаразы адгьыл кылырҵәеит Маркәыла ақыҭан, Кәтол ақыҭа Ҭоумышь аҳаблан, Аӡҩыбжьа ақыҭан, Афымцамҩангага цәақәаҳәақәа -0,4 кв еиҭашьақәыргылан Гәыԥ ақыҭан, Ҷлоу ақыҭан аӡымҩангага еиҭашьақәыргылан ирҽеины.
2022 шықәсазы Ареспубликатә биуџьет аҟынтә афинансзоужьра мҩаԥган Гәыԥ ақыҭа афымцеиқәыршәареи, Ҷлоу ақыҭан Б. Шьынқәба иҩны-амузеи, Аӡҩыбжьа ақыҭаҟны ӡыла реиқәыршәаразы адгьылқәа ркылҵәареи, Очамчыра араион аӡымҩангагатә цәаҳәақәа шьаҭанкыла рырҽеиреи, Очамчыра араион афельдшер-акушертә пункт арҽеиреи рус.
Аизараҟны ирзааҭгылан афымцамчы, ашәахтәқәа реизгара, акриминогентә ҭагылазаашьа уҳәа ирызкыз азҵаатәқәа.
Аҳәынҭқарра Ахада иныҟәара иалахәын Ахада Ихаҭыԥуаҩ Бадра Гәынба, Ахада Иусбарҭа Анапхгаҩы Џьансыхә Нанба.
