Items filtered by date: Ашәахьа, 12 Нанҳәа 2024

Аҟәа. Нанҳәамза 12, 2024 шықәса. Аԥсныпресс. Ареспублика Аԥсни Урыстәылатәи Афедерациеи рыбжьара азеиԥш социалтәии аекономикатәи аҵакыра ашьақәыргылара Апрограмма анагӡара азы аҩганктәи аусуратә гәыԥ аилатәара мҩаԥысит нанҳәамза 12 рзы Урыстәыла аекономикатә ҿиара Аминистрра аҿы. Абри азы адырра ҟанаҵоит Аԥсны аекономика Аминистрра апресс-маҵзура.

Азакәанԥҵарақәа реишьашәалара иазку аусура аҩ-ҳәынҭқаррак рхадацәа иҟарҵаз адҵа инақәыршәаны имҩаԥысуеит, уи атәылауаа рсоциалтә еиқәыршәара, ртәанчаҩратә еиқәыршәара, аҵарадырра, агәабзиарахьчара, ашәахтәи аҳазалхратәи аусеиҿкаара, аинвестициатәии абанктәи аусура, уҳәа реиԥш иҟоу аусхкқәа рҿы аусмҩаԥгатәқәа рынагӡара иазырхоуп.  

Аҟәа. Нанҳәамза 12, 2024 шықәса. Аԥсныпресс. Аҩныҵҟатәи аусқәа рминистр Роберт Киут ареспублика аҩныҵҟатәи аусқәа Рминистрра Автоҳәынҭинспекциа Аусбарҭа аҿы аилатәара мҩаԥигеит. Аилатәара рхы аладырхәит Автоҳәынҭинспекциа Аусбарҭа анапхгаҩцәа, Автоҳәынҭинспекциа араинтәии ақалақьтәи аҟәшақәа рнапхгаҩцәа, аструктура ахатәы еилазаара. Аусқәа изаамҭанытәиу рҭагылазаашьеи имҩаԥгаз аусуреи рзы аминистр адырра иҭеит Автоҳәынҭиспекциа аиҳабы аамҭала инапынҵақәа назыгӡо Дамеи Аҩӡба.

Ахатәы еилазаара амҩатә ԥҟарақәа реилагаҩцәа раарԥшра азы ареидтә усмҩаԥгатәқәа рыцҵара азы адҵа рыҭан. Ҭакԥхықәра змам амашьынарныҟәцаҩцәа икомпромиссдоу аҿагылара роуроп, ҳәа инаҵшьны иазгәеиҭеит аҩныҵҟатәи аусқәа рминистр.

Аҟәа. Нанҳәамза 12, 2024 шықәса. Аԥсныпресс /Алеқсеи Шамба/. Аконцерт «Амузыкатә ԥсшьарамшқәа» мҩаԥысит Р.Гәымба ихьӡ зху Аԥснытәи аҳәынҭқарратә филармониа аҿы, амҽыша, нанҳәамза 11 рзы.  Аклассикатә музыка абзиабаҩцәа рҿаԥхьа иқәгылеит А. Чичба  ихьӡ зху Аҟәатәи амузыкатә ҵараиурҭа аушьҭымҭацәа Мари-Емилиа Терзиан-Ҳагба, Виачеслав Станкевич, Ева Постникова, Иарослав Бориаев, Лана Габуниа, Лана Адлеиба, Каиа Хупориа, Леон Барас, Размик Асланиан, Иарна Сымсым.

Аҟәа. Нанҳәамза 12, 2024 шықәса. Аԥсныпресс.   Атәыла аԥыза-министр Алеқсандр Анқәаби Жәларбжьаратәи Аџьар Ҟаԥшь Акомитет ахада Чингиз Раимбекови Амиссиеи ареспублика анапхгаратә усбарҭақәеи русеицура иадҳәалоу азҵаарақәа ирылацәажәеит.  

Чингиз Раимбеков аԥыза-министр Амиссиа ала имҩаԥгаз аусуреи ааигәатәи аамҭазы иҟоу азԥхьагәаҭарақәеи рзы адырра иҭеит

Аҟәа. Нанҳәамза 12, 2024 шықәса. Аԥсныпресс.   Аҟәа ақалақь аҩныҵҟатәи аусқәа Русбарҭа аусзуҩцәа иахьа, нанҳәамза 12 рзы, Аҟәа ақалақь, аџьармыкьа Хада аҿы иҟалаз аинцидент иалахәыз ихаҭара шьақәыргыланы дааныркылеит.

Асааҭ 12:20 инарзынаԥшуа Гәлиа имҩала автомашьына  «Митсубиси паджеро» аԥсҟы зкыз, 1964 шықәсазы ииз, Москва ақалақь аҿы инхо  Габриелов Олег Лев-иԥа апассаџьырцәа рааныжьра дшаҿыз,  имашьынала ааигәа игылаз, 1974 шықәса рзы ииз, Аҟәа ақалақь аҿы инхо Аҩӡба Беслан Ума-иԥа имашьына дахьҳәазеит.   

Аҟәа. Нанҳәамза 12, 2024 шықәса. Аԥсныпресс.  Аԥсны атәылахьчара аделегациа Жәларбжьаратәи арра-техникатә форум «Армия-2024» ахы аланархәуеит, ҳәа адырра ҟанаҵоит Аԥсны атәылахьчара Аминистрра апресс-маҵзура.

Афорум мҩаԥысуеит нанҳәамза 12 – 14 рзы  Москватәи аобасть, аконгресс-цәыргақәҵатә центр «Патриот» аҿы.  Уи рхы аладырхәуеит 83 ҳәынҭқарра рҟынтәи аделегациақәа, урҭ рахьынтә  39 напхгара арҭоит атәылахьчаратә хылаԥшырҭақәа рхадацәеи аштаб хадақәа рнапхгаҩцәеи.

Аԥсны атәылахьчара аминистр, аинрал-полковник Владимир Ануа напхгара зиҭо аԥснытәи аделегациа аилазаараҿы иҟоуп уи ихаҭыԥуаҩцәа – аинрал-леитенант Нодар Аҩӡбеи аполковник Давид Бжьаниеи.

Сухум. 12 августа 2024. Апсныпресс. Торжественная церемония приведения к присяге курсантов первых курсов, направляемых на учебу в вузы МВД России, состоялась в Министерстве внутренних дел Абхазии.

Аҟәа. Нанҳәамза 12, 2024 шықәса. Аԥсныпресс. Урыстәыла аҩныҵҟатәи аусқәа Рминистрра аҵараиурҭақәа рахь идәықәҵахо аԥснытәи акурсантцәа рҭоубашьҭаҵара иадҳәалоу агәырӷьаратә церемониа мҩаԥысит Аԥсны аҩныҵҟатәи аусқәа Рминистрра аҿы.

Аҩныҵҟатәи аусқәа Рминистрра аофициалтә саит аҿы иҟоу адыррақәа рыла, ишьақәгылахьоу атрадициа ала, Аԥсны аҩныҵҟатәи аусқәа Рминистрра анапхгаҩцәеи акурсантцәеи Аԥсны жәлар Рџьынџьтәылатәи еибашьраан рмаҵуратә уалԥшьа анагӡараан иҭахаз амилициа аусзуҩцәа рмемориал амҵан ашәҭ шьыҵәрақәа шьҭарҵеит.

Ахылаԥшырҭа анапхгараҭара  – аминистр, амилициа аинрал-маиор Роберт Киути аминистр актәи ихаҭыԥуаҩ, аинрал-маиор Руслан Ажьибеи алархәны аҿар Аԥсадгьыли Азакәани ажәлари  ламысцқьала рымаҵ аура азы аҭоуба шьҭарҵеит.  

Аҟәа. Нанҳәамза 12, 2024 шықәса. Аԥсныпресс. Аҟәа ақалақь аҿы «Иҭышәынтәалоу аҿиара  азы аҭыԥантәи анапхгареи ахықәкқәеи» («Местные власти и цели устойчивого развития») атема ала асеминар мҩаԥысуеит, ҳәа адырра ҟанаҵоит Аҟәа ақалақь Ахадара аофициалтә саит.

Асеминар аиҿкаара рхахьы иргеит  - Жәларбжьаратәи ассоциациа «Евразиа аҭыԥантәи амчрақәеи еиду ақалақьқәеи» («Объединенные города и местные власти Евразии»), иара убас Аҟәа ақалақь Ахадара.  

Асеминар мҩаԥигоит Ассоцциациа амаӡаныҟәгаҩ Хада Расих Сагитов.

Аҟәа. Нанҳәамза 12, 2024 шықәса. Аԥсныпресс.  16 шықәса раԥхьа, нанҳәамза 12, 2008 шықәса рзы, Аԥсны Арбџьармчқәа Кәыдрытәи аҩхаа аҩадатәи ахәҭа ақырҭуа архәҭақәа рҟынтәи ахы ианақәиҭыртә ашьҭахь Қырҭтәылеи Аԥсни ирыбжьоу аҳәаа аҟынӡа инаӡеит.  

Ари амш аҽны Кәыдрыти аҩхаа аҩадатәи ахәҭа аҿы Аԥсны аиурисдикциа шьақәыргылахеит, ареспублика атерриториалтә акзаара еиҭашьақәыргылан.

Кәыдрытәи аҩхаа ақырҭуа ар рҟынтәи аҭарцәразы арратә аоперациа хыркәшан нанҳәамза 12, 2008 шықәса рзы.

Аԥснытәи арра-ҳаиртә мчқәа  Кәыдрытәи аҩхаа аҿы аҳаиртә жәыларақәа мҩаԥыргоит.

Аԥсныпресс. Нанҳәамза 12, 2008 шықәса. Иахьа, ашьжьымҭан, асааҭ 5 рзы,  аԥснытәи арра-ҳаиртә мчқәа Кәыдрытәи аҩхаа Кәабчара ҳәа иахьашьҭоу аҩадатәи аҭыԥқәа рҿы иҟоу ақырҭуа архәҭақәа рхырӷәӷәарҭақәа абомбақәа рылажьра иалагеит. Асааҭ 09:00 рзы Ажара ақыҭан даҽа аҳаиртә жәыларак мҩаԥгахеит. Абри азы Аԥсныпресс ахь адырра ҟаиҵеит атәылахьчара аминистр актәи ихаҭыԥуаҩ, Арбџьармчқәа Рыштаб Хада анапхгаҩы, аинрал Анатоли  Заицев.

Анатоли Заицев иҟаиҵаз адыррақәа рыла, агәҽанызаара шыҟазгьы, қырҭтәылатәи аруаа ашьыжь асааҭ 04:00 рзы рҭыԥқәа аанырмыжьӡацызт.  

«Ҳара аӷа аблокада изуреи иқәхреи рзы адесант артәара ҳгәы иҭоуп»,  –  ҳәа иазгәеиҭеит Анатоли  Заицев.

Асааҭ 07:00 рзы қырҭтәылатәи арра-ҳаиртә мчқәа аԥснытәи аԥшыхәратә ҳаирплан алашьҭра рҽазыршәеит, аха аинрал иажәақәа рыла,  уи рзалымҵит.

Урыстәылатәи абжьаҟазаратә архәҭақәа ақырҭуа мчратә структурақәа рдемилитаризациа аҳәаақәа ирҭагӡаны 700 цыра инареиҳаны абџьар амхра нарыгӡеит.  

Аԥсныпресс. Нанҳәамза  12, 2008 шықәса. Агрессор мчыла аҭынчрахь икылгаразы аоперациа амҩаԥгараан, уахыки-ҽнаки рыла Урыстәыла абжьаҟазыҩцәа ақырҭуа мчратә структурақәа рдемилитаризациа аҳәаақәа ирҭагӡаны 700 цыра инареиҳаны абџьар амхра нарыгӡеит, уи аиҳарак аҳәаанырцә иҭрыжьыз абџьар ахкқәа ракәын. Абри азы ажурналистцәа адырра риҭеит Абжьаҟазаратә архәҭақәа ркомандаҟаҵаҩ ицхырааҩ Алеқсандр Новицки. 

Аоккупациа зызуз Кәыдрытәи аҩхаа аҟынтәи ақырҭуа архәҭақәа ралцара иазку арратә операциа адгьылхыхьтә хәҭа қәҿиарала имҩаԥысуеит.

Аԥсныпресс. Нанҳәамза 12, 2008 шықәса. Аоккупациа зызуз Кәыдрытәи аҩхаа аҟынтәи ақырҭуа архәҭақәа ралцара иазку арратә операциа адгьылхыхьтә хәҭа қәҿиарала имҩаԥысуеит. Абри азы асааҭ 11:00 рзы ажурналистцәа рзы имҩаԥгаз абрифинг аҿы адырра ҟаиҵеит амассатә информациақәа рхархәагақәа рҿы Аҳәынҭқарра Ахада иофициалтә хаҭарнак Кристиан Бжьаниа.

«Ишдыру еиԥш, Аԥсны атәылахьчара Аминистрра иацы аоккупациа зызу Кәыдрытәи аҩхаа аҿы иҟаз ақырҭуа архәҭақәеи атәылауааи иарбоу азона ааныжьны ицарц алаҳәара ҟанаҵеит. Урҭ иацы асааҭ 19:00 рҟынӡа агуманитартә коридор рыҭан. Аха иарбоу аамҭа нанҳәамза 12, ашьыжь аҟынӡа иацҵан», - ҳәа иҳәеит Криастиан Бжьаниа.

Иахьа ашьыжь, асааҭ 6:00 рзы аоккупациа зызуз Кәыдрытәи аҩхаа аҟынтәи ақырҭуа архәҭақәа ралцара иазку арратә операциа иацҵахеит. 

Уажәы иарбоу аоперациа адгьылхыхьтә хәҭа қәҿиарала имҩаԥысуеит. Аԥснытәи архәҭақәа аҩхаа хыхьтәи ахәҭа иалалеит.   

Аоперациа амҩаԥгараан ахархәара ауит еиуеиԥшым абџьар хкқәа, ахара ахы назго абзарбзанқәа, агәыцә рацәа змоу ахысга «Град», атанкқәа, иара убас ашьха ҭыԥқәа рҿы излеибашьуа ҳаамҭазтәи абџьар.

«Ақырҭуа ган иарбоу арегион аҿы бџьарла еиқәыршәоу рырхәҭақәа ыҟаӡам ҳәа аҳәамҭа шыҟанаҵазгьы, ҳара ҳархәҭақәа аҿагылара роуит. Аԥсны арра-ҳаиртә мчқәа иатәу аҵәиԥрыгақәа ҩба адгьыл аҟынтәи еихсит, аха урҭ рылашьра залымшаӡеит», - ҳәа адырра ҟаиҵеит Кристиан Бжьаниа.

Аԥснытәи архәҭақәа урҭ ирҿыгылоу ақырҭуа архәҭақәа амацәаз иҭаркит.

Аԥсны Арбџьармчқәа раԥхьатәи адесант тәеит ақыҭа Чхалҭа азааигәара.

«Ҳара ҳгәаанагарала, Қырҭтәыла архәҭақәеи егьыр аструктурақәа рхаҭарнакцәеи аоккупациа зызу Кәыдрытәи аҩхаа аҟынтәи ралцара иазку аоперациа аамҭа кьаҿ иалагӡаны ихыркәшахоит», - ҳәа инаҵшьны иазгәеиҭеит Кристиан Бжьаниа.

Амассатә информациақәа рхархәагақәа рҿы Аҳәынҭқарра Ахада иофициалтә хаҭарнак Кристиан Бжьаниа аоперациа зегьы мацара аԥснытәи архәҭақәа рымчала имҩаԥсуеит ҳәа иазгәеиҭеит.

Кристиан Бжьаниа иара убас амассатә информациа ахархәагақәак ишырҳәо ала Кәыдрытәи аҩхаа еимаку ҵакыраӡам ҳәа инаҵшьны иазгәеиҭеит.

«Аиамк-аиҿак зцыз аҵакыра ахылаԥшра аҭара азҵаара мацара ауп. Кәыдрытәи аҩхаа ахаҭа Аԥсны, Гәылрыԥшь араион иахәҭакуп», - ҳәа инаҵшьны иазгәеиҭеит амассатә информациақәа рхархәагақәа рҿы Аҳәынҭқарра Ахада иофициалтә хаҭарнак Кристиан Бжьаниа.

Уажәы ареспублика Ахада Аԥсны ашәарҭадара Ахеилаки Аԥсны Арратә Хеилаки алахәылацәа злоу аилатәара мҩаԥигоит.

Аԥсны Қырҭтәыла ахатә ар амазаара азин амхра азы ажәалагала ҟанаҵоит.

Аԥсныпресс. Нанҳәамза 12, 2008 шықәса. Аԥсны адәныҟатәи аусқәа рминистр Сергеи Шамба жәларбжьаратәи аилазаара ахь Қырҭтәыла ахатә арбџьармчқәа амазаара азин амхра азы аҳәамҭа ҟаиҵеит.

«Аҵыхәтәантәи 100 шықәса рыҩныҵҟа Қырҭтәыла ихьыԥшым ҳәынҭқарраны иҟан 21 шықәса: 1918 шықәса инаркны 1921 шықәанӡа,  иара убас 1990 шықәса инаркны иахьа уажәраанӡа.  Иарбоу аамҭа иалагӡаны иара бжь-еибашьрак рхацыркра иахьӡеит», - ҳәа аҩаша «Интерфакс» акоррепондент диҿцәажәо иҳәеит Сергеи Шамба.  

«Жәларбжьаратәи аилазаара иарбоу хра злам аԥышәа ҳасаб азуны, Қырҭтәыла ахатәы арбџьармчқәа рымазаара азин анамҭароуп. Ахәыҷқәа аспычка дыркра ҟалаӡрм», - ҳәа инаҵшьны иазгәеиҭеит Аԥсны адәныҟатәи аусқәа рминистр.

Кәыдырҭа аҩадатәи ахәҭа аҭарцәра иазку арратә операциа хыркәшахар ауеит аҩаша ахәылԥаз, мамзаргьы ахашаҽны.

Аԥсныпресс. Нанҳәамза 12, 2008 шықәса. Аԥсны Аҳәынҭқарра Ахада Сергеи Багаԥшь Кәыдырҭа аҩадатәи ахәҭа аҭарцәра иазку арратә операциа хыркәшахар ауеит аҩаша ахәылԥаз, мамзаргьы ахашаҽны ҳәа иԥхьаӡоит.