Аҟәа. Нанҳәамза 12, 2024 шықәса. Аԥсныпресс. Аҟәа ақалақь аҿы «Иҭышәынтәалоу аҿиара азы аҭыԥантәи анапхгареи ахықәкқәеи» («Местные власти и цели устойчивого развития») атема ала асеминар мҩаԥысуеит, ҳәа адырра ҟанаҵоит Аҟәа ақалақь Ахадара аофициалтә саит.
Асеминар аиҿкаара рхахьы иргеит - Жәларбжьаратәи ассоциациа «Евразиа аҭыԥантәи амчрақәеи еиду ақалақьқәеи» («Объединенные города и местные власти Евразии»), иара убас Аҟәа ақалақь Ахадара.
Асеминар мҩаԥигоит Ассоцциациа амаӡаныҟәгаҩ Хада Расих Сагитов.
Асеминар рхы аладырхәуеит Аԥсны ақалақьқәеи араионқәеи рхадарақәа рхаҭарнакцәа.
Асеминар алахәылацәа бзиала шәаабеит ҳәа реиҳәеит Аҟәа ақалақь ахада ихаҭыԥуаҩ Авҭандил Сурманиӡе.
Жәларбжьаратәи ассоциациа «Евразиа аҭыԥантәи амчрақәеи еиду ақалақьқәеи» («Объединенные города и местные власти Евразии») апрезидентс дыҟоуп Аҟәа аиашьаратә қалақь Ҟазан ахада Ильсур Метшин.
