Ареспублика Аԥсни Урыстәылатәи Афедерациеи рыбжьара азеиԥш социалтәии аекономикатәи аҵакыра ашьақәыргылара Апрограмма анагӡара хыркәшахоит 2025 шықәсазы. Аха иахьазы иуҳәар алшоит Урыстәылеи Аԥсни аҳәынҭқарратә усбарҭақәа рыла аԥхьанатә иазԥхьагәаҭаз аусмҩаԥгатәқәа реиҳарак нагӡоуп ҳәа.  Иазԥхьагәаҭаз аумҩаԥгатәқәа реиҳарак иахьазы анагӡара алыршоуп, урҭ рӷьырак  ахыркәшаратә стадиаҟынӡа инаӡахьеит. Убас, ҳазҭоу ашықәс аҩныҵҟа хә-усмҩаԥгатәк рынагӡара алыршахеит: аинтеллектуалтә хатәра ҳәаақәызҵо Ареспублика Аԥсны Атәылауаҩратә Закәанеидкыла аԥшьбатәи ахәҭа адкылара, атәылауаа рсоциалтә маҵзура ашьаҭақәа рзы, атәанчахәытә ԥгаԥса асистема аҿы ихаҿыркроу аҳасабырбара азы, авалиутатә еикәыршара аусеиҿкаара,  уҳәа рзы азакәанқәа рыдкылара мҩаԥысит. Иара убас ҩбаны ашәахтәқәҵара ацәцара азы Аиқәшаҳаҭра анапаҵыҩреи аратификациеи мҩаԥган.

Асоциалтә усхкы иадҳәалоу азакәан апроектқәа реиҳарак реиқәыршәара алыршоуп. Уажәы аҩ-ҳәынҭқаррак рнапхгаратә усбарҭақәа реиҿцәыжәарақәа мҩаԥысуеит.

Аусуратә гәыԥ ацхантәаҩцәаны иҟоуп атәыла аԥыза-министр ихаҭыԥуаҩ, аекономика аминистр Кристина Озгани Урыстәыла аекономикатә ҿиара аминистр ихаҭыԥуаҩ Дмитри Вольвач.