Уаршанхон акостиумқәагьы. Урҭ равтор - Лиубов Белочкина – уаанӡа абалет асолистканы дыҟан, уажәы TODES абалети астудиақәеи рҿы акостиумқәа рдизаинерс аус луеит. Лара иаԥылҵаз акостиумқәа, абалет иаанарԥшуаз ахаҿсахьақәа зеиӷьаҟам ала ихадырҭәааит. Даара ибзианы иҟан асценографиа. Асахьаркыратә арлашареи алҩа алачреи ахәаԥшцәа иаразнак агәырӷьареи аԥшӡареи ратмосфера иагәыланахалеит.
Абалет артистцәа раԥхьатәи аминуҭ инаркны афилармониа азал зырҭәыз ахәаԥшцәа зегьы ргәы акра рылшеит. Акәашарақәа аки-аки рҽеиҭаркуан, аха асцена аҿы аӡәгьы ааԥсарак иныԥшуамызт. Уимоу, артистцәа ахәаԥшцәа ирырҭоз аенергетика еиҳа-еиҳа иазҳауан.
Ҷыдала иалыскаарц сҭахуп аномерқәа ҩба. Актәи аноиер аҿы асцена аамҭак ала иқәлеит афильм «В джазе только девушки» аҟны ихәмаруаз, I Wanna Be Loved by you ашәа зҳәоз Мерлин Монро лхаҿсахьа змаз 11-ҩык аҭыԥҳацәа.
Аҩбатәи аномер Маикл Џьексон изкын, ашәа Billie Jean арҳәарала асцена ахь ицәырҵит 11-ҩык артистцәа. Урҭ рықәгылара ахәаԥшыҩцәа даараӡа ибзианы ирыдыркылеит.
Иҭабуп ҳәа раҳҳәоит абалет TODES рықәгылара азы, уи иҳазцәырнагаз ацәаныррақәа, инарыгӡаз акәашарақәа рыԥшӡара, асцена аиқәыршәара, акәашаратә жанрқәа рыхкырацәара, уҳәа рзы. Браво!
