Аҟәа. Нанҳәамза 12, 2024 шықәса. Аԥсныпресс. Аҩныҵҟатәи аусқәа рминистр Роберт Киут ареспублика аҩныҵҟатәи аусқәа Рминистрра Автоҳәынҭинспекциа Аусбарҭа аҿы аилатәара мҩаԥигеит. Аилатәара рхы аладырхәит Автоҳәынҭинспекциа Аусбарҭа анапхгаҩцәа, Автоҳәынҭинспекциа араинтәии ақалақьтәи аҟәшақәа рнапхгаҩцәа, аструктура ахатәы еилазаара. Аусқәа изаамҭанытәиу рҭагылазаашьеи имҩаԥгаз аусуреи рзы аминистр адырра иҭеит Автоҳәынҭиспекциа аиҳабы аамҭала инапынҵақәа назыгӡо Дамеи Аҩӡба.
Ахатәы еилазаара амҩатә ԥҟарақәа реилагаҩцәа раарԥшра азы ареидтә усмҩаԥгатәқәа рыцҵара азы адҵа рыҭан. Ҭакԥхықәра змам амашьынарныҟәцаҩцәа икомпромиссдоу аҿагылара роуроп, ҳәа инаҵшьны иазгәеиҭеит аҩныҵҟатәи аусқәа рминистр.
Хазы иалацәажәеит Автоҳәынҭинспекциа аусзуҩцәа рхаҭақәагьы рдисциплина атема. Лассы-лассы уи еиҳа еиӷьзаргьы ҟалон ҳәа агәаанагара цәырҵуеит ҳәа иазгәарҭеит анапхгаҩцәа.
Автоҳәынҭинспекциа араионтә ҟәшақәа рнапхгаҩцәа рмаериал-техникатә еиқәыршәара аганахьала рҭаххрақәа ирылацәажәеит. Азыҳәарақәеи ажәалагалақәеи зегьы ҳасаб рзухоит ҳәа иазгәеиҭеит аҩныҵҟатәи аусқәа рминистр.
Аилатәара ахыркәшамҭаз аҩныҵҟатәи аусқәа Рминистрра анапхгара ахатәы еилазаара аҿаԥхьа ҩаԥхьа дҵаны иқәдыргылеит атәыла амҩақәа рҿы атранспорттә машәыртә хҭысқәа рхыԥхьаӡара армаҷра азы аҭыԥқәа рҿы излауа ала аусура дырӷәӷәарц азы.
