Аҟәа. Абҵарамза 6, 2024 шықәса. Аԥсныпресс. Аԥсны идуу амаининг-фермақәа ыҟаӡам, ҳәа Аԥсуа телехәаԥшра аефир аҿы аҳәамҭа ҟаиҵит Аԥсны аԥыза-министр ихаҭыԥуаҩ, аенергетикеи атранспорти рминистр Џьансыхә Нанба.

Иара иазәеиҭеит, Аҳәынҭқарра Ахада инапынҵала, иҳаҩсыз  ашықәс азы изакәанымкәа акриптовалиута арҳара аԥхьырҟәҟәаара азы аоперативтә штабқәа аԥҵан ҳәа.

«Ҳазҭоу ашықәс актәи азыбжазы ҳара АУН «Амшынеиқәафымцач» аспециалистцәа ҳацны «стресс-тест» ҳәа изышҭоу аусмҩаԥгатә  мҩаԥаагеит. Иалкаау атехникатә уснагӡатәқәак ирылҵшәаны амаинерцәа инырхәо афымцамч амҽхак еилкаахеит  –  40-45 мегаватт.  Ари акыр идуу афымцамч амҽхак ауп». – ҳәа иҳәеит Џьансыхә Нанба.   

Аҟәа. Абҵарамза 6, 2024 шықәса. Аԥсныпресс. Аџьынџьуаа аԥсадгьыл ахь рырхынҳәразы Аҳәынҭқарратә Еилакы ахантәаҩы Вадим Ҳаразиа напхгара зиҭо аԥснытәи аделегациа Каир ақалақ аҿы, Египет иҟоу Урыстәыла ацҳаражәҳәаҩ  Георги Борисенко иԥылеит, – ҳәа адырра ҟанаҵоит Аҳәынҭеилакы апресс-маҵзура.

Вадим Ҳаразиа Георги Борисенко изеиҭеиҳәеит аԥснытәи аделегациа Египет аҭаара хықәкы хадас иамоу атәы. Уи – Аԥснытәи акультуратә Цент Каир ақалақь аҿы аԥҵара иадҳәалоу азҵаарақәа рыӡбара ауп.

Аиԥылараҿы Египет иҟоу Урыстәыла Ацҳаражәҳәарҭа аԥснытәи аџьынџьуаа  (милаҭла иаԥсыуоу Египет атәылауаа) рзы зда урҭ рҭоурыхтә ԥсадгьыл аҭааразы аҭагылазаашьақәа раԥҵара амуа атранзиттә визақәа реиқәыршәара аганахала  Урыстәыла Ацҳаражәҳәарҭа ацхыраара иалацәажәеит.

Аҟәа. Абҵарамза 6, 2024 шықәса. Аԥсныпресс. Женева ихыркәшахеит  Кавказнҭыҵ ашәарҭадареи аҭышәынәалареи рзы Жәларбжьаратәи Женеватәи аиҿцәажәарақәа 62-тәи араунд.   ЕАР, ОБСЕ, ЕХ рыцхантәаҩрала имҩаԥысыз аилацәажәарақәа рхы аладырхәит Аԥсны, Аахыҵ Уаԥстәыла, Қырҭәыла, Урыстәыла, Еиду Америка Аштатқәа.  Абри азы адырра ҟанаҵоит Аԥсны адәныҟатәи аусқәа Рминистрра апресс-маҵзура.

Аԥснытәи аганахьала аиԥылара иалахәын: Аԥсны адәныҟатәи аусқәа рминистр ихаҭыԥуаҩ  Одиссеи Бигәаа, Женеватәи аиҿцәажәарақәа рлахәылацәа, Аԥсны АдәАР ахаҭарнакцәа Лаша Аҩӡба, Артур Гагәылиа.

Женеватәи аиҿцәажәарақәа 62-тәи араунд аҿы ҩ-гәыԥкны аилацәажәарақәа мҩаԥысуан — ашәарҭадареи агуманитартәи зҵаарақәа рзы.

Аиԥылара аҿы уи алахәылацәа иазԥхьагәаҭаз амшхәаԥшә зҵаарақәа  пункцыԥхьаӡа иазааҭгылеит. Еиуеиԥшм атемақәа шьҭыхын. Ахәҭакахьала, актәи агәыԥ аҿы иалацәажәон аҳәаа иаԥну араионқәа рҿы аҭагылазаашьа. Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа 62-тәи араунд аҟны иалацәажәан иара убас амч ахамырхәаразы адокумент аицеиқәшаҳаҭра аус адулара азҵаара.

Аԥсны ахаҭарнакцәа ақырҭуа ган иадыргалеит ҿырҳәалатәи аицҳәамҭа авариант ҿыц, аха ақырҭуа ган аҽазныкгьы мап ацәнакит аԥсуа ган ажәалагала. Аҽазныкгьы, ақырҭуа ган ахымҩаԥгашьа иалнамыршеит абри азҵаараҿы акы азеицнеира.

Аԥсни Қырҭтәылеи, Аахыҵ Уаԥстәылеи Қырҭтәылеи рҳәааҟны аҭагылазаашьа аилатәара алахәылацәа зегьы, ақырҭуа ган ада, иҭышәынтәалоу ҳәа ахәшьара арҭеит. Ахәшьара бзиа аҭан аԥсынтәи амчрақәа иаԥырҵаз агуманитартә коридор.

Убри аан аиԥылара алахәылацәа зегьы еицҿакны иазгәарҭеит ԥхьаҟазы ашьаҿақәа реицеихгара ада ԥсыхәа шыҟам. Аԥсны, Аахыҵ Уаԥстәыла, Урыстәыла еиҭахгьы инаҵшьны ирҳәеит Қырҭтәыла амч ахамырхәаразы аиқәшаҳаҭра анапаҵаҩреи Гал Аидысларақәа рызхьаԥшреи раԥырҟәҟәаареи рзы амеханизм (МПРИ) арҿыцреи шаҭаху. Аганқәа ргәаанагарақәа еибырҳәеит.

Аҟәа. Абҵарамза 6, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа абҵарамза 6 рзы амилаҭтә телеканал аредакциа даҭааит. Аслан Бжьаниа Аԥснытәи аҳәынҭқарратә Телерадиоеилахәыра аԥҵара амш инамаданы уи аиҳабы Ирина Агрԥҳаи аусзуҩцәеи дрыдныҳәалеит. Абри атәы аанацҳауеит атәыла Ахада ипресс-маҵзура.

Иара ателерадиоеилахәыра аколлективв дырԥыло амилаҭтә телехәаԥшра аԥсуа ҳәынҭқарреи уи ажәлари ринтересқәа рыхьчараҿы инанагӡо ароль ҷыдала иазгәеиҭеит.

«1978 шықәса абҵарамза 6 рзы Аԥсуа телехәаԥшра раԥхьаӡакәны аефир ахь ицәырҵит. Ари амилаҭтә ҵысра ашьҭыҵреи аҿиареи рус акырӡа иацхрааит, уи иалҵшәаны ишьақәгылеит иахьатәи аԥсуа ҳәынҭқарра. Ари амш иугәаланаршәоит ҳажәлар знысыз ахақәиҭреи ахатәҳәаақәҵареи рышҟа инагаз амҩа хьанҭа», - ҳәа иҳәеит Аслан Бжьаниа. 

Аҟәа. Абҵарамза 6, 2024 шықәса. Аԥсныпресс.    Аԥснытәи ателехәаԥшара иахыҵит 46-шықәса. Аԥсуа телехәаԥшра егьырҭ ателехәаԥшратә каналқәа шцәырҵхьоугьы, иахьа уажәраанӡа азеиԥшмилаҭтә телехәаԥшраны иҟоуп, ҳтәыла ахи-аҵыхәеи зегьынџьара инаӡоит. Ашьыжь аԥсуа телехәаԥшра аефир аҿы ицәырҵуеит асааҭ 08:00 рзы. Ҽынлатәи адырраҭарақәа рзеиԥш ҭагӡара 14 сааҭ рҟынӡа инаӡоит. Аԥснытәи аҳәынҭқарратә Телерадиоеилахәыра аҿы аус зуа рхыԥхьаӡара 160 - ҩык рҟынӡа инаӡот.  

Иахьа акьыԥхьтәи аелектронтәи амассатә информациа ахархәагақәа, иара убас аинтернет ресурсқәеи хыԥхьаӡара рацәала ианыҟоу аамҭазы, Аԥснытәи ателехәаԥшра ареспублика аҿы зегьы реиҳа идуу ахәаԥшцәа раудиториа амоуп. Ажәабжь ҿыцқәа рдырраҭара «Амшеикәшара» акыр шықәса раԥхьа еиԥш уажәгьы аполитикатә, аекономикатә, асоциалтә, акультуратә информациа ахыҵхырҭа хаданы иҟоуп ареспублика  ауааԥсыра рзы. Амш иалагӡаны аефир ахь ицәырҵуеит аԥсышәалеи урыс бызшәалеи ԥшь-блок рҟынӡа ажәабжь ҿыцқәа. Ҳазҭоу аамҭазы Аԥснытәи аҳәынҭқарратә Телерадиоеилахәыра аструктура иалоуп ауаажәларра-политиатә, аинформациатә программақәа, атематикатә редакциа, ашьыжьтәи адырраҭара «Шьыжьбзиа Аԥсынтәыла» аредакциа, Аԥсны арадиои атехникатә маҵзуреи.  Атематикатә редакциа аҿы иҟоуп  хыԥхьаӡара рацәала  автортә ателехәаԥшратә проектқәа. Апрограммақәа зегьы ахатәы хықәкытә аудиториа, ахронометраж, аефир ахь ацәырҵра апериодра  амоуп.

Аҟәа. Абҵарамза 6, 2024 шықәса. Аԥсныпресс. Иреиҳаӡоу аспорттә ҟазара Ашкол акоманда аҳәса ркомандақәа рыбжьара амҵәышәмпыл азы Жәларбжьаратәи атурнир «Кавказ ажәларқәа реиҩызара Ахраҿа» аҿы аиааира агеит.

Аҟәа. Абҵарамза 5, 2024 шықәса. Аԥсныпресс. Абоксиор Харитон Агрба зыкапантә категориа 67 кьыла  рҟынӡа инаӡо аспортсменцәа рыбжьара IBA аверсиа ала адунеи ачемпион имаҟа аиура иҽаԥсаитәит, иара убри ала актәи абжьарабжатә капан иаҵанакуа рыбжьара WBA атитул аиуразы ашҭазааҩыс дҟалеит.  

Аиндаҭлара ашьҭахь Харитон ари аиндаҭлара аҟынтәи иоуз ацәаныррақәа дрыхцәажәеит.  

«Адунеи ачемпионс ушыҟоу аилкаара даараӡа игәахәароуп, аишазы. Раԥхьатәи ахықәкы нагӡоуп», - ҳәа иҳәеит Харитон Агрба.

Аҟәа. Абҵарамза 5, 2024 шықәса. Аԥсныпресс. Аҟәатәи 14-ҩык аспортсменцәа карате кекусинкаи IFK (кумите) азы Ҟрым Аԥхьахәгара рхы аладырхәит.

Абҵарамза 3 рзы Симферополь имҩаԥысуаз атурнир рхы аладырхәит Урыстәыла ԥшь-регионк рҟынтәи: Ҟрым, Ростовтәи аобласти Краснодартәи  атәылаҿацәи, Адыгеиа, иара убас Аԥснынтәи  15 командак реилазаара аҿы  210-ҩык аспортсменцәа.

Аҟәа. Жьҭаарамза 31, 2024 шықәса. Аԥсныпресс. Жьҭаарамза 29, 2024 шықәса рзы Аҟәатәи ақалақьтә ӡбарҭа аҿы Џьансыхә Адлеиба Аԥсны Ашьаустә Закәанеидкыла ахәҭаҷ  207, ахәҭа  1 иазԥхьагәанаҭо ацәгьоуразы (амбжьахра, абџар, мамзаргьы абџьар аҳасабала рхы иадырхәо  амаҭәарқәа рхархәарала ауаажәларра пату рықәымҵара аазырԥшуа азинеиҿкаара   аилагара азы) иду ахара аганахьала ашьаусеилыргаратә еилатәара мҩаԥысит.  

Аҟәа. Жьҭаарамза 31, 2024 шықәса. Аԥсныпресс. Аԥсны Аҳәынҭқарра адәныҟатәи аусқәа рминистр Сергеи Шамба Аахыҵ Уаԥстәылатәи Ареспублика Аҩбатәи Ахада Едуард Кокоиты 60 шықәса ихыҵра идиныҳәалеит.

Адныҳәалараҿы иазгәаҭоуп:

“Шәара шәтәылеи шәыуаажәлари рпатриот иаша, рхьыԥшымреи рсуверенитети рзы ақәԥара ахыҵхырҭаҿы игылаз шәакәны шәыҟоуп. Шәполитикатә мҩаҿы иуадаҩыз аԥышәарақәа шәрықәшәеит, хаҭала, Қырҭтәыла имҩаԥнагаз арратә агрессиа.