Аусмҩаԥгатә аныҳәатә хәҭа аартуа, «Москва Аҩны» адиректор иабжьгаҩ  Борис Наҟоԥиа еизаз зегьы бзиала шәаабеит ҳәа реиҳәеит:

«Ишыжәдыруа еиԥш, иахьатәи ҳусмҩаԥгатә Аԥсадгьыл ахьчаҩ Имш азгәаҭара иазкуп. Ари амш асовет аамҭақәа раангьы Асовет Еидгыла иахьаҵанакуаз зехьынџьара иазгәарҭон, Аԥсныгьы убас иазгәарҭон ари аныҳәа шьахә.   Ари амш иҷыдоу аҵакы аиуоит иара убас Ҳаԥсадгьыл ахьчаҩцәа 30 шықәса раԥхьа рхы иамеигӡа Аԥсны ахақәиҭреи ахьыԥшымреи шазааргаз анаҳгәалашәо.  Иахьа, Донбас аибашьра анцо аамҭазы, ҳара ҳаҷкәынцәа хацәнымырха урыстәылатәи аруаа ирывагыланы аиашара иазықәԥоит. Ҳара ҳакәзар, иахьа абра, «Москва Аҩны» аҿы 64-аԥырктәы дәқәа рҿы ҳаиндаҭлалоит. Акомандақәа зегьы ақәҿиарақәа рзеиӷьасшьар сҭахуп»,  - ҳәа иҳәеит иара.

«Москва Аҩны» адиректор Алеқсандр Бигәаа ашахматистцәа иахьатәи аицлабрақәа рҿы аманшәалареи ақәҿиарақәеи рзеиӷьаишьеит.

«Сара даара агәра сгоит ари атурнир есышықәса ишеиҿкаахало. Ҳара иҳаҩсыз ашықәс азы иҳамаз агхақәа зегьы ҳасаб азуны иахьатәи атурнир аиҿкаара ҳҽазаҳшәеит. Ҳгәыӷуеит сынтәа ахәмарра еиҳа ишәзыманшәалахап, еиҳа аинтерес аҵаны имҩаԥысып ҳәа. Иҭабуп ҳәа шәасшәоит атурнир зхы алазырхәа зегьы. Ҳара даара ҳаигәырӷьоит уи алахәхара шәахьақәшаҳаҭхаз. Сара ажәалагала ҟасҵоит иааиуа атурнир азы алахәылацәа рхыԥхьаӡара аизырҳара азы атәыла ақалақьқәеи араионқәеи рхадарақәа ахаҭарнакцәагьы ааԥхьара рыҭазарц. Сара ишәзеиӷьасшьоит аинтерес зҵоу ахәмарра, анасыԥ, агәабзиара шьахә», –  ҳәа иҳәеит Алеқсандр Бигәаа.

Ашахмат ахәмарра абзиабаҩцәа дрыдныҳәалеит иара убас Аԥсны Амилаҭтә олимпиатә комитет апрезидент  Валери Аршба:  «Сара исоуз ааԥхьара гәахәара дула исыдыскылеит. Сара ишәгәаласыршәар сҭахуп Аԥсны ашахматтә культура 1926 шықәсазы ишцәырҵыз. Усҟан аентузиастцәа ааизаны раԥхьатәи ашахматтә турнир мҩаԥыргеит. Ари ахәмарра Аԥсны аспорттә  ԥсҭазаараҿы иҷыдоу ароль ааннакылоит. Сара даара сеигәырӷьоит иахьа Аԥсны аспорт азы иҟарҵо ахьырацәоу.  Агәра ганы сыҟоуп ҳҳәынҭқарра аҿы аринахысгьы аспорт аҿиаразы ирылшо зегьы шыҟарҵало».

Аусмҩаԥгатә еиҿкаахеит Москва Анапхгара, Москва ақалақь жәларбжьаратәи адәныҟаекономикатәи аимадарақәа Рдепартаменти Москватәи аидгьылуаа Рыҩни иҟарҵаз адгылара иабзоураны.