Аҟәа. Жәабранмза 19, 2024 шықәса. Аԥсныпресс. Аҳәынҭқарра Ахада Аслан Бжьаниа атәыла аҩныҵҟатәии адәныҟатәии аполитика иадҳәалоу актуалра злоу азҵаарақәа рылацәажәара иазкны аусуратә еилатәара мҩаԥигеит.
Аиԥылара иалахәын Аҳәынҭқарра Ахада Иусбарҭа анапхгаҩы Абесалом Кәарҷиа, Аҳәынҭқарра Ахада Иусбарҭа анапхгаҩы ихаҭыԥуаҩцәа, иара убас атәыла Анапхгара алахәылацәа.
Аилатәара амшхәаԥштә зҵаара хадақәа В.Г. Арӡынба ихьӡ зху жәларбжьаратәи аҳаирбаӷәаза «Аҟәа» аиҭашьақәыргылара апрограмма анагӡара, абылтәы џьармыкьа аҿы иҟоу аҭагылазаашьа анализ аҭара, иара убас атәыла аҩныҵҟа абаҩарҵәыреи аспорти рыҿиара иадҳәалан.
Атәыла аенергетикеи атранспорти рминистр Џьансыхә Нанба Аҳәынҭқарра Ахада аинвестор ила аҳаирбаӷәаза иахьаҵанакуа игылоу ажәытә хыбрақәа рықәгара шымҩаԥысуа атәы изеиҭеиҳәеит. Хара имгакәа арахь иаагахоит иҷыдоу атехникеи аусзуҩцәеи.
Аҳәынҭқарра Ахада аминистр аргыларатә усурақәа рымҩаԥгара аамҭеихшара еиқәыршәаны изнеигарц азы анапынҵа ииҭеит.
Абылтәы џьармыкьа аҿы ишьақәгылаз аҭагылазаашьагьы инарҭбааны иалацәажәеит. Аҳәынҭқарра Ахада абылтәы џьармыкьа аҿы аҭагылазаашьа аҭышәынтәалареи ауааԥсыреи атәыла абылтәы џьармыкьа алахәылацәеи абылтәы ала реиқәыршәара азҵаара аӡбареи рзы адҵақәа ҟаиҵеит.
Аилатәара аҿы атәыла абаҩарҵәыреи аспорти рыҿиара азы Аҳәынҭқарра Ахада ипрограмма алацәажәара ахшыҩзышьҭа ду аҭан.
Аҵара аминистр Инал Габлиа ашколқәа аспорттә плошьадқәақәа рыла реиқәыршәара азы иҟоу азԥхьагәаҭарақәа дрылацәажәеит.
«Ҳазҭоу ашықәс цәыббрамза нҵәаанӡа апрограмма аҳәаақәа ирҭагӡаны, Аԥсны ашколқәа реиҳарак адәы аҿы аспорт аҽазыҟаҵарақәа рзы аспорттә инвентарь ала еиқәыршәахоит», – ҳәа иазгәеиҭеит аминистр.
Аҳәынҭқарра Ахада аҵара аминистр ари азҵаара хаҭала ахылаԥшра аиҭаларц азы анапынҵа ииҭеит, убри аан уи аҿар рыбжьара абаҩарҵәыреи аспорти рыҿиара иаҵоу аҵакы ахадара инаҵшьны иазгәеиҭеит.
