Аҟәа. Жабранмза 15, 2024 шықәса. Аԥсныпресс. Иԥсҭазаара далҵит Аԥснытәи АССР Зҽаԥсазтәыз акультура аусзуҩ, «Ахьӡ-Аԥша» аорден III аҩаӡара акавалер, Аԥсны жәлар Рџьынџьтәылатәи еибашьра аветеран Шьоҭа Џьоџьа-иԥа Мерцхәлаа (1938 – 2024 шш.).
Шьоҭа Мерцхәлаа Аҟәатәи акультураҵаралашаратә Ҵараиурҭа далгеит 1960 шықәсазы. Еиуеиԥшым аамҭақәа рзы Очамчыратәи акультура Аҩны асахьаркыратә напхгаҩыс, С.Ҷанба ихьӡ зху Аԥснытәи адраматә театр ақәыргыларатә ҟәша аиҳабыс аус иуан. 30 шықәса инареиҳаны Очамчыратәи акультура Аҩны адиректорс даман.
Акыр шықәса рыҩныҵҟа Шьоҭа Мерцхәлаа Очамчыра араион жәлар рыкәашареи рашәаҳәареи ансамбль «Ерцахә» асолистс дыҟан.
Шьоаҭа Џьоџьа-иԥа Мерхәлаа аԥсуа жәлар рҟазара азҟаза иакәын, иара есымша уи аӡыргара дашьҭан.
Аԥсны акультура Аминистра Шьоҭа Мерцхәлаа иԥсра инамаданы гәалсра дула ирыдышшылоит уи иуацәеи иҭынхацәеи изааигәоу ауаа зегьы.
«Аԥсны амилаҭтә культура ацәыӡ ду аиуит. Шьоҭа Џьоџьа-иԥа Мерцхәлаа амилаҭтә культура аҿиара, аԥсуа жәлар рҟазара аӡыргара аус аҿы илагала дууп», – ҳәа иҳәеит ансамбль «Ерцахә» анапхгаҩы, Аԥсны Жәлар рартист Нодар Кәарҷиа.
