Аҟәа. Ажьырныҳәамза 17, 2024 шықәса. Аԥсныпресс. Ҳазҭалаз ашықәс мышқәак рыҩныҵҟа амҩатә-машәырқәа хәба ҟалеит, урҭ ирыхҟьаны ԥшьҩык еиуеиԥшым ахәрақәа роуит, ҩыџьа ҭахеит. Абри азы ахаша, ажьырныҳәамза 17 рзы имҩаԥгаз аҳасабырба-зԥхьагәаҭаратә еилатәара аҿы дықәгыло адырра ҟаиҵеит атәыла аҩныҵҟатәи аусқәа Рминистрра Аҳәынҭавтоинспекциа Аусбарҭа аиҳабы Валентин Траԥшь.
Ижәны автотранспорт аԥсҟы зкыз рганахьала 86 административтә материал еиқәыршәоуп, ҳәа адырра ҟанаҵоит Аԥсны аҩныҵҟатәи аусқәа Рминистрра аофициалтә саит.
Ҳазҭалаз 2024 шықәса 15 мыш рзы имҩаԥгаз аусура аҳасабырба ҟаҵо иқәгылеит иара убас аҩныҵҟатәи аусқәа ртерриториатә усбарҭақәа Аҳәынҭавтоинспекциа аҟәшақәа рнапхгаҩцәа.
Амҩаҿы аныҟәара аганахьала зегь реиҳа азинеилагарақәа шьақыргылоуп Аҟәа ақалақь аҿы. Урҭ рыла еиқәыршәоуп 487 ԥкаанҵа, 27-ҩык амашьанарныҟәцаҩцәа ижәны амашьына аԥсҟы ахьыркыз азы административтә хьрыхәра иақәыршәоуп. Иҳаҩсыз ҩымчыбжь рзы аҳҭнықалақь аҿы иӷәӷәоу ахҟьаԥҟьақәа змоу амҩатә машәыр ҟамлаӡеит.
Атәыла аҩныҵҟатәи аусқәа рминистр Роберт Киут ишазгәеиҭаз ала, аҳҭнықалақь Аҳәынҭавтоинспекциа Аусбарҭа аусура ахаҭабзиара ӷәӷәала ианыԥшуеит кадрла азымхара аҟазаара.
Аҳәынҭавтоинспекциа аусура ахылаԥшра азҭо аҩныҵҟатәи аусқәа рминистр ихаҭыԥуаҩ Беслан Ҷкадуа иарбоу азҵаара аӡбаразы ихадоу ахырхарҭақәа азгәеиҭеит. Аҩныҵҟатәи аусқәа рминистр ауадаҩрақәа ахьыҟоу ахырхарҭақәа азгәаҭаны аусура арӷәӷәаразы анапынҵақәа риҭеит.
Гәдоуҭа араион аҿы аԥстәбара зцыз амҩа-транспорттә машәырк ҟалеит, иаарԥшуп 151 инарзынаԥшуа амҩатә ԥҟарақәа реилагалара иадҳәалоу афактқәа, урҭ рахьынтә 10 – арыжәтә џьбара ыжәны, мамзаргьы арҩышьыгатә маҭәашьар рыдкыланы амашьына аԥсҟы акра иадҳәалоуп.
Аҵыхәтәантәи аамҭазы аиҳарак амҩатә машәыр ахьыҟало ҭыԥны Гәдоуҭа араион ахьалкаахаз инамаданы, аминистр ахылаԥшырҭа атехикатәа маҵзура амҩатә ԥҟарақәа реилагара азгәаҭара иазку автоматизациа зызу акамера ҿыцқәа рышьақәыргыларазы адҵа ҟаиҵеит.
Гагра араион аҿы иаадырԥшит 471 зинеилагара, ф-ҩык амашьынарныҟәцаҩцәа ижәны амашьына аԥсҟы ркын. Араион аҿы иҟалеит амҩатә машәыртә хҭысқәа хԥа, ҩыџьа ауаа ахәрақәа роуит, аӡәы иԥсҭазаара далҵит. Имҩаԥгаз амаҵзуратә гәаҭарақәа рылҵшәақәа рыла Гагратәи Аҳәынҭавтоинспекциа аусзуҩцәа гәыԥҩык рганахьала аҳәаанырцәтәи атранспорттә хархәагақәа рныҟәцаҩцәа рҟынтәи изинркымкәа аԥара рымхра иадҳәалоу афактқәа аарԥшхеит.
Аминистр амилициа агәаҭаратә пункт «Мысра» аусура аганахьалагьы, ахәҭакахьала, амаҵзура анагӡареи аилагарақәа раарԥшра арбагақәеи рганахьала хазы игоу анапынҵақәа риҭеит.
Аҟәа араион аҿы иҳаҩсыз аԥсшьарамшқәа рзы амҩатә ԥҟарақәа реилагара иадҳәалоу 304 факт аарԥшхеит, ижәны амашьына аԥсҟы зкыз жәа-ҩык амашьынарныҟәцаҩцәа административтә хьырхәра иақәыршәоуп, амҩа-транспорттә машәырк аҿы ҩыџьа ауаа ааха роуит.
Ареспублика мрагыларатәи ахәҭа иахьаҵанакуа, Аҳәынҭавтоинспекциа атерриториалтә ҟәшақәа рнапхгаҩцәа иҟарҵаз адыррақәа рыла, ӷәӷәала ахҟьаԥҟьақәа змоу амҩатә машәыр ҳәа акгьы шьақәыргылаӡам.
Гәылрыԥшь араион аҿы иаарԥшхеит амҩатә ԥҟарақәа реилагара иадҳәалоу 93 факт, ижәны амашьына аԥсҟы зкыз аӡәы даанкылан.
Очамчыра араион аҿы Аҳәынҭавтоинспекциа аусзуҩцәа еиқәдыршәеит 259 административтә ԥкаанҵақәа, ижәны амашьына аԥсуы акра азы аа-фактк уахь иналаҵаны. Амҩатә ԥҟарақәа реилагара иадҳәалоу 122 факт аарԥшуп Гал араион аҿы, 53 факт – Ҭҟәарчал араион аҿы.
Ахылаԥшратә системақәа ирҿыцу апрограмматә еиқәыршәара ахь аиагара, ахәҭакахьала амҩатә ԥҟарақәа раарԥшра иазку автоматизациа зызу асистема ахь аиасра инамаданы, атәыла аҩныҵҟатәи аусқәа Рминистрра анапхгара иҟоу астационартә ԥыԥшырҭақәа рырӷәӷәара хықәкыс иҟаҵаны ахатәы еилазаара адислокациа азы аӡбамҭа аднакылеит.
