Аҟәа. Ажьырныҳәамза 14, 2024 шықәса. Аԥсныпресс. Ажьырныҳәамза 13, 2024 шықәсазы К.С. Станиславскии В.И. Немирович-Данченкои рыхьӡ зху Москватәи академиатә Музыкатә театр аҿы, нанҳәамза 26 рзы Аҟәа ақалақь аҿы иаатыз Амузыкатә фестиваль ду «Хьыбла Герзмаа шәаалыԥхьоит» аркра мҩаԥысит, ҳәа адырра ҟанаҵоит афестиваль апресс-маҵзура.
Урыстәылеи Аԥсни Жәлар рартистка сценак аҿы илыцқәгылеит Хьыбла Герзмаа иаԥшьылгаз Актәи Жәларбжьаратәи аконкурс алауреатцәа Алексеи Кулагин, Ольга Маслова, Виачеслав Василиев, Глеб Периазев, Ливеи Хоу, Екатерина Савинкова, Мариа Лупариова, Артуш Полеиан, Дамир Садуахасов, Жаргал Цырендагбаева, Елизавета Пахомова, Гульдана Алдадосова. Афестиваль аркра иҷыдоу асас иаҳасабала аусмҩаԥгатә ихы алаирхәит Сон Чи Хун.
Урыстәыла, Китаи, Ҟазахсҭан, уҳәа атәылақәа рҟынтәи абаҩхатәра злоу ашәаҳәаҩцәа аурыс композиторцәеи аҳәаанырцәтәи акомпозиторцәеи иаԥырҵаз ариақәа нарыгӡеит. Аконцерт мҩаԥнагеит Москватәи аҳәынҭқарратә академиатә симфониатә оркестр. Адерижиор –Ариф Дадашев.
Ахәылԥаз арежиссиор — Урыстәыла жәлар рартист Алеқсандр Титель.
Аопертә сцена иҩацхахо аиаҵәаџьқәа злахәыз аныҳәатә гала-концерт ала ихыркәшахеит Урыстәыла, Аԥсны, Ҟазахсҭан, Белорусиа еиеуеиԥшым ақалақьқәа рҿы имҩаԥысуаз, акыраамҭа зҵазкуаз амузыкатә марафон.
Амузыкатә фестиваль «Хьыбла Герзмаа шәаалыԥхьоуит…» ахыркәшара К.С. Станиславскии В.И. Немирович-Данченкои рыхьӡ зху Москватәи академиатә Музыкатә театр аҿы иахьымҩаԥысыз машәыршақә иҟамлаӡеит: араҟа имҩаԥысуан амузыкатә дунеи иҿыцу ахьӡқәа азцәырызгаз аопертә шәаҳәаҩы иаԥшьылгаз Жәларбжьаратәи аконкурс. Лара Хьыбла лхаҭа ари атеатр даара бзиа илбоит, уимоу, уи лыҩны гәакьа илзаҩызоуп. Лара 1995 шықәсазы ари атеатр асолисткас дҟалеит, убри инаркны лара акыр игәылҭәаау аусуратә график шлымоугьы, аамҭа ԥшааны лассы-лассы ари асцена аҿы дықәгылалоит.
Иахьа Хьыбла Герзмаа — иналукааша урыстәылатәи шәаҳәаҩуп, адунеи иреиҳаӡоу атеатрқәа рҿы дықәгылахьеит. Метрополитен-опера, Венатәи аҳәынҭқарратә опера, Бавариатәи аҳәынҭқарратә опера, Шатлеии Шанз-Елизеи, Мариинтәи атеатри рҿы изныкымкәа дықәгылахьеит. 2008 шықәса рзы имҩаԥысит Лондон, Ковент Гарден аҟны лдебиут – Чаиковски иопера "Евгени Онегин" аҿы. Лара иара убас Москватәи аконсерваториа асолотә шәаҳәара акафедра адоцентс аус луеит, Амузыкатә фестиваль «Хьыбла Герзмаа шәаалыԥхьоит…» аԥҵаҩыси анапхгаҩыси дыҟоуп, Амилаҭтә оператә премиа «Онегин» апрезидентс, иара убас авокалистцәеи аконцертмеистрцәеи Жәларбжьаратәи рконкурс аԥҵаҩысгьы дыҟоуп.
