Илзеиӷьаҳшьоит Анжела Чагә-иԥҳа зегьы раԥхьаӡа иргыланы агәабзиара, ахирра, ашықәснҵыра ду», – ҳәа иазгәаҭоуп аҿари аспорти русқәа рзы аҳәынҭқарратә Еилакы иҟанаҵаз адныҳәалара аҿы.

Папба Анжела Чагә-иԥҳа диит ажьырныҳәамза 14, 1939 шықәсазы Аҟәа ақалақь аҿы.  

1946 шықәсазы Алада Ешыра ақыҭан ашкол ахь дцеит.

1953 шықәсазы дҭалеит  Н.Лакоба ихьӡ зху Аҟәатәи ашкол №10.

1958 шықәсазы,  ашкол даналга ашьҭахь дҭалеит М.Горки ихьӡ зху  Аҟәатәи аҳәынҭқарратә арҵаҩратә Институт (анемец бызшәеи аԥсуа бызшәеи рыҟәша).

Иара убри ашықәсан аҵара Аминистрра ала лышкол гәакьа ахь анемец бызшәа арҵаҩыс аусуразы ддәықәҵахеит. Араҟа лара инеиԥынкыланы  45 шықәса аус луит.

Ашкол аҿы аҵара анылҵоз аамҭазы лара еицырдыруа азыҟаҩ Радко Божков иҿы лҽазыҟалҵон. Аинститут аҿы лара лҽазыҟалҵон  Владимир Ҳашба иҿы.

Анжела Папба 1965 шықәсанӡа Аԥсны еизгоу акоманда азы дыхәмаруан.

Қырҭтәыла еизгоу акоманда аҿы лара Асовет Еидгыла Аспартакиада далахәын.

1964 шықәсазы Қарҭтәи аҳәынҭқарратә Университет акоманда аилазаараҿы лара Асовет Еидгыла ачемпионат лхы алалырхәит, акоманда ахԥатәи аҭыԥ ааннакылеит.

Аԥсны аспорт аҿиара аҿы ллагала азы, ашколхәыҷқәа III Рыспартакиада аҿы қәҿиарала лықәгыларазы лара иланашьахеит Аԥснытәи АССР Иреиҳаӡоу Асовет Апрезидиум аҳаҭыртә шәҟәы.

1986 шықәсазы иланашьахеит «Қырҭтәыла жәлар рҵарадырра аҿы зус бзиаӡаны иназыгӡо» ҳәа агәышԥтәы дырга.

1986 шықәсазы «Аџьа аветеран» ҳәа амедал ланашьахеит.

1990 шықәсазы жәлар рҵарадырра аусхкы аҿы Анжела Папба  «Аԥснытәи АССР жәлар рҵарадырра Зҽаԥсазтәыз аусзуҩ» ҳәа аҳаҭыртә хьӡы ланашьахеит.  

Анжела Чагә-иԥҳа Папба – Аԥсны ҳаҭыр зқәу аспорт азҟаза, амҵәышәмпыл азы ареспубликатә категориа змоу аӡбаҩ.

Анжела Чагә-иԥҳа Папба 2001 шықәса раахыс Аԥсны аҵара Аминистрра  Ареспубликатә ахәыҷтәы-қәыԥштә спорттә хәмаррақәа рышкол аҵара аҟәша аиҳабыс аус луеит.