Ссир лаԥшҵашәарак сгәалашәоит сара:
Сара сҿаҧхба баацәырҵит бара,
Ииаҟьаз лаԥшнаӡарак еиԥш,
Зеиԥшыҟам ԥшӡа каԥхарак еиԥш.
Аргәаҟ лахьеиқәҵа гәыӷырҭадеи
Рҳашәақә бжьыцәгьа еилаҩынтреи
Ирылҩны иаауан ихааӡа быбжьы,
Сагьеиԥхыӡуан бхыбҿсахьа гәыкы.
Ицон аамҭақәа. Гәыԥҵәага еилаҩынтра
Исҟәнаҟьеит ԥасатәи сгәыӷра.
Исхашҭит бара быбжьы хаа,
Ижәҩантәу уи бхыбҿсахьа.
Лашьца ҭакырҭаҿы уаҩыдарала,
Ицон ҭынч сымшқәа еишьҭагыла,
Нҵәарада, убас гәышьҭыхрада,
Лаӷырӡыда, бзиабарада.
Уажәы сыҧсы ҭалт, иаҿуп азҳара:
Абар саԥхьа баацәырҵ бара,
Иниаҟьаз лаҧшнаӡарак еиԥш,
Зеиԥшыҟам ԥшӡа каԥхарак еиԥш.
Зынӡа гәыӷрала сгәы ҭгәырӷьааит,
Анцәара, убас агәышьҭыхра,
Дырҩегь уи азы еиҭабзаахит,
Алаӷырӡ, абзиабара.
Еиҭеигеит Д. Гәлиа ___
К***
Исгәалашәоит ссирк лаԥшҵашәаран,
Са сҿаԥхьа баацәырҵит бара,
Исҿалашеит мацәыс еимҟьаран
Ацқьара иагениу быԥшра.
Быгәхьааганы гәыӷрада сгәыӷуан,
Наҟ ӡыбларак сама ицон,
Быбжьы хаа ус краамҭаӡа исзааҩуан,
Бхыбҿы гәыкы ҧхыӡла избон.
Таку бжьысит. Ус аамҭа ацәқәырԥара
Са схәыцрақәа агеит ицҟьаны,
Исхашҭит быбжьы хаа агәкыра,
Исхашҭит ижәҩантәу бхы-бҿы.
Тымитышак сҭаршәын цәашьыда,
Сымш лашьцақәа аарла игәагәон,
Гәыӷрада, гәҭыхада, нцәада,
Бзиабарада, разҟыда сџьабон.
Иахьӡеит, иахьӡеит сыԥсы ашара,
Ҩаԥхьа сҿаԥхьа баацәырҵит бара,
Исгәалашәеит мацәыс еимҟьаран
Ацқьара иагениу быԥшра.
Шьҭа ахааназгьы имыцәо ианҿыха,
О, аԥсыцқьа рхалеит сгәаҿы.
Нцәахәыс ҳәа исызкыду сыгәҭыха,
Сыбзиабара, сгәыӷра, сразҟы.
Еиҭеигеит В. Ҵнариа ___
А. П. КЕРН БАХЬ
Исгәалашәоит, мгеимцара ссирны,
Сҿаԥхьа бцәырҵит уи аҽны.
Ицәырҟьа-цәырсуа лаԥшҵашәаран.
Ижәҩантәу ԥшӡаран, бымбатәны!
Ианҭалоз сгәыӷра лаша ԥыххаа –
Имҩахго сшәаӡыӡа, сгәырҩара:
Есааира исыцын ба быбжьы-хаа,
Избон сыҧхыӡаҿ ба бхаҿра.
Ицон ашықәсқәа фырҭынха,
Иаҿын са сгәаҳәа аҵыкәкәара.
Ус-ус, исхашҭит ба быбжьы хаа,
Убас ижәҩантәу ба бхаҿра.
Адунеи иаҟәыгоу, иҭацәу аҭыԥаҿ
Игәагәон са сымш хьанҭақәа убра.
Лабжышыз, гәаҳәараз, насыԥыз,
Дынцәаз – саанрыжьхьан наҟ хара.
Абар, зегь шьҭрақәлеит, еимгеимцаран, Бцәырҵит – бшызбахьаз мшаҽны:
Ицәырҟьа-цәырсуа лаԥшҵашәаран,
Ижәҩантәу ԥшӡаран, бымбатәны!..
Сгәы ҭыҵны ицоит, агәырӷьа иаҳәа,
Абар, ҽакала зегь ааҳәит:
Сгәеисра, сылаӷырӡ, са сгәаҳәа
Ҩаԥхьа ихышхыҵәан ихынҳәит!
Еиҭеигеит М. Лашәриа.
