Асасцәа хәыҷқәа, ироуз ахшыҩзышьҭра аҟынтәи маҷк иԥхашьа-ԥхаҵо ажәеинраалақәа ирыԥхьеит, еизазгьы урҭ дырҽхәеит, рнапқәа рзеинырҟьеит.
Беслан Ешба ахәыҷқәа рааӡара азы зхахьы аҭакԥхықәра згаз, ахәыҷқәа аиаҭымра рынмырԥшӡакәа изааӡо абекунцәа хра злоу русура азгәеиҭеит.
«Идуӡӡаны иҭабуп ҳәа шәаҳҳәоит ахәыҷқәа рахь агәцаракра аарԥшны гәыблыла иахьышәааӡо азы, шәџьабааи шәыуаҩреи рзы», - ҳәа иҳәеит Беслан Ешба.
Абекун Наталиа Колбаиа, лара дызхылаԥшуа Иракли актәи акласс ахь дцеит, уи аҵара ихшыҩ азцоит, ақалақь ахада иахь аара иара ихәшьара бзиақәа рзы аџьшьара аҳасабала дахәаԥшуеит ҳәа иазгәалҭеит.
Аҳҭнықалақь ахада иԥшӡоу аинсталиациақәа рыла ирхиоу ирацәаны ахәмарратә зонақәа ахьыҟоу Ахақәиҭра Ашҭаҿы игылоу Ашықәсҿыцтәи аԥсаҵла ахь ааԥхьара риҭеит.
