Аҟәа. Ԥхынҷкәынмза 25, 2023 шықәса. Аԥсныпресс. Жәлар Реизара-Апарламент адепутатцәа «Аруаа рыстатус азы» азакәан аиҭакрақәа аларгалеит.
Ари азакәан аруаа рсоциалтә хьчара азы аҳәынҭқарратә политика шьақәнаргылоит, атәанчахәқәа ршәара аԥҟарақәеи атәанчахәқәа рхышәа-ҵышәеи ашьақәыргыларагьы уахь иналаҵаны:
– аррамаҵзурауаҩ инапынҵақәа анынаигӡоз дҭахазар, ма иоуз ахәрақәа ирыхҟьаны хымз рышьҭахь иԥсҭазаара далҵзар, иҭаацәа атәанчахәы ацны ирызшәахалоит.
– иара убри аҟара роулоит иузахмырԥо амаҵзура ахысраан ироуз ахәрақәеи аинвалидреи ирыхҟьаны анаҩстәи рырратә маҵзура ацҵаразы алшара змам атәанчаҩцәа.
Иарбоу акатегориақәа ирыҵанакуа атәанчаҩцәа ртәанчахәы ахышәа-ҵышәа, «Аруаа рыстатус азы» иҟоу азакәан инақәыршәаны 1992-1993 шш. рзы Аԥсны жәлар Рџьынџьтәылатәи еибашьра алахәылацәа аинвалидра азы ирызшәахо атәанчахәы ахышәа-ҵышәа аҟынтәи 50 % рҟынӡа инаӡоит.
Азакәан иалагалахо аиҭакрақәа хыхь иарбоу акатегориақәа ирыҵанакуа атәанчаҩцәа ртәанчахәы 20% рыла ашьҭыхра иазырхоуп. Иара убри ала, иарбоу ҩ-категориак ирыҵанакуа атәанчаҩцәа ироуло атәанчахәы ахышәа-ҵышәа 1992-1993 шш. рзы Аԥсны жәлар Рџьынџьтәылатәи еибашьра аҿы иҭахаз рҭаацәа ирызшәахо атәанчахәы ахышәа-ҵышәа аҟынтәи 70% рҟынӡа инаӡалоит.
