Аҟәа. Ԥхынҷкәынмза 21, 2023 шықәса. Аԥсныпресс. Апрокуратура Хада азакәанԥҵара ақәныҟәара ахылаԥшра Аусбарҭа 2022 шықәса инаркны 2023 шықәса актәи азыбжа аҟынӡа азинмчы змоу аусбарҭақәа рыла «Административтә зинеилагарақәа рзы аӡбараеиҿкаара азы» Ареспублика Аԥсны Азакәанеидкыла ақәныҟәара ахьынӡаларшаз азы апланла иазԥхьагәаҭаз агәаҭара мҩаԥнагеит.
Аҩныҵҟатәи аусқәа Рминистрра Аҳәынҭинспекциа аусбарҭа агәаҭараан Аинспекциа амаҵурауаа русура аҿы аилагарақәа аадырԥшит, инҭкааны иуҳәозар, Автоинспекциа аусзуҩцәа, «Административтә зинеилагарақәа рзы аӡбараеиҿкаара азы» Ареспублика Аԥсны Азакәанеидкыла ахәҭаҷ 119, ахәҭа 1 инақәыршәаны, даҽакала иуҳәозар, ижәны, мамзаргьы арҩышьыгатә маҭәашьар рыдкыланы амашьына аԥсҟы акра азы ауааԥсыра административтә ҭакԥхықәа рақәыршәараан аилагарақәа ҟарҵон.
Иарбоу азинеилагара азы административтә ҭакԥхықәра адҵара азы шьаҭас иҟоуп алкотестер ахархәарала, мамзаргьы амедицинатә гәаҭарала амашьынарныҟәцаҩ ижәны дыҟоу дыҟаму, мамзаргьы арҩышьыгатә маҭәашьар идкыланы дыҟоу-дыҟаму аилкаара. Аилагарақәа абарҭ афактқәа рыла иалкаахеит: амедицинатә гәаҭара алҵшәақәа зныз адырранҵақәа, мамзаргьы аметрологиатә гәаҭара иахысыз алкатестерқәа ыҟаӡамызт.
Иара убас (ижәны, мамзаргьы арҩышьыгатә маҭәашьар рыдкыланы амашьына аԥсҟы акра азы) аҩынтәраан азинеилагаразы иаанкылаз ахаҿы «Административтә зинеилагарақәа рзы аӡбараеиҿкаара азы» Ареспублика Аԥсны Азакәанеидкыла ахәҭаҷ 119, ахәҭа 1 инақәыршәаны аҭакԥхықәра иақәыршәара афакт аарԥшын. Убри аан иарбоу ахаҿы Ареспублика Аԥсны Административтә зинеилагарақәа рзы Азакәанеидкыла ахәҭаҷ 119, ахәҭа 5 инақәыршәаны аҭакԥхықәара идзар ахәҭан. Иарбоу Азакәанеидкыла ахәҭаҷ инақәыршәаны, иарбоу ахаҿы иҟаиҵаз азинеилагара азы ахьырхәра аҳасабала 15 мшы абанандаҩтәреи атранспорттә хархәага аныҟәцаразы аршаҳаҭга шықәсык имхреи азԥхьагәаҭоуп.
Агәаҭара аихшьаалақәа рыла апрокурор Хада ихаҭыԥуаҩ Дамир Кәыҵниа атәыла аҩныҵҟатәи аусқәа Рминистрра Аҳәынҭиспекциа ахь 35 қәшаҳаҭымхара дықәиҵеит, иаарԥшыз аилагарақәа рырҽеиреи аринахысгьы урҭ рыԥхьырҟәҟәаареи, иара убас аԥҟарақәа еилазгаз ахаҿқәа алеишәатә ҭакԥхықәра рақәыршәареи рзы аҩныҵҟатәи аусқәа рминистр Роберт Киут иахь азԥхьанага ҟаиҵеит.
