Нхыҵ-Кавкатәи хатәгәаԥхарауаа рымадара азы Аԥсны Аҳәынҭқарра Ахада иабжьгаҩ Рисмаг Аџьынџал 13-ҩык Аԥсны иреиҳау арратә ҳамҭақәа ируаку – Леон иорден ранашьоуп, «Агәымшәаразы амедал» аибашьҩык ианашьоуп, 90-ҩык «Аиааира азы» аиубилеитә медалқәа ранашьахеит ҳәа иазгәеиҭеит.  

«Адокументқәа шьҭыхын, ихадаз, аибашьра ацашьа ианыԥшыз ахҭысқәа зхы алазырхәыз хатәгәаԥхарала еибашьуаз алкаахеит. Рыцҳарас иҟалаз, иахьа аҳамҭақәа занаршьо афырхацәа 30 шықәса рыҩныҵҟа аҳәынҭқарратә џьшьара рмоуӡацкәа иаанханы иҟан», – ҳәа иҳәеит Рисмаг Аџьынџьал.

Аԥснытәи аделегациа ахаҭарнакцәа  Аԥсни Адыгеиеи жәытә-натә аахыс ҭоурыхла ишьақәгылоу аимадара шрыбжьоу азгәарҭеит. Урҭ ражәақәа рыла, Аԥсны ирхашҭраны иҟаӡам иуадаҩӡаз аамҭазы хатәгәаԥхарала иааны зашьцәа ирывагыланы еибашьуаз, анаҩсгьы аибашьрашьҭахьтәи аамҭазгьы аԥсуа жәлар ацхыраара рызҭоз Адыгеиа жәлар. Аԥсуаа аӡәырҩы аиашьаратә республикаҿы ирыдыркылеит, усураҭыԥла еиқәдыршәеит, асоциалтә цхыраареи иреиҳаӡоу аҵараиуразы алшареи рырҭеит. Уи хашҭшьа ақәӡам наунагӡа!