Аҟәа. Ԥхынҷкәынмза 20, 2023 шықәса. Аԥсныпресс. Гәылрыԥшь араион Апрокуратура Ҭенгиз Адлеиба ишьразы ашьаус хацнаркит, ҳәа адырра ҟанаҵоит Аԥсны апрокуратура Хада апресс-маҵзура.
Заанаҵтәи аусеилыргара Аусбарҭа ала ишьақәыргылоуп ацәгьоура ахҭыс шыҟалаз. Ԥхынҷкәынмза 16, 2023 шықәса, 10 сааҭки 20 минуҭи инарзынаԥшуа, Гәылрыԥшь араион Дранда ақыҭан, 1992 шықәсазы ииз Адлеиба Ҭенгиз Иван-иԥа, Зҭакԥхықәра Ҳәаақәҵоу Аилазаара «Ача-Баба» аусзуҩыс иҟаз, автомашьынала адәқьанқәа рахь ача мҩаԥигон. Аҽны Ҭенгиз Адлеиба "Ача-Баба" аҟынтә ача Дранда ақыҭан, Оглы имҩала иҟоу акалмаҳааӡарҭахь игон. Ҭенгиз Адлеиба апассаџьыр ҳасабала амашьына ицҭатәаз, зхаҭара шьақәыргылам аӡәи иареи акалмаҳатә нхамҩа иалҵны аҳаблабжьарамҩала ацара иаҿын. Убри аамҭазы апассаџьыр изныкымкәа Адлеиба Ҭенгиз диеихсит. Ҭенгиз Адлеиба иоуз ахәрақәа ирыхҟьаны иара уааҵәҟьа иԥсҭазаара далҵит, ихысыз аҭыԥ аҟынтәи еилкаам ахырхарҭа ала иҽиӡеит.
Ԥхынҷкәынмза 17, 2023 шықәса рзы даанкылан, аҩныҵҟатәи аусқәа Рминистрра аусеилыгаанӡаатәи аамҭалатәи аԥхьакырҭа ахь днаган ауаҩшьраҿы игәҩарахаз Кацуба Н. Д.
Заанаҵтәи аусеилыргара Аусбарҭа ауаҩшьразы игәҩароу Кацуба Н.Д. аҭакра изаԥҵәазарц азы Гәылрыԥшьтәи аӡбарҭа ахь азыҳәара дәықәнаҵеит.
