Иԥсы ҭанаҵы ацқьа деицырдыруа иҟалахьан ирҿиоз аџьашьахәқәа рыла. Убас иара Мира ақалақь амлакра ӷәӷәа иацәыихьчеит — Анцәа иахь иматанеира ала. Иара иматанеирала аӡы иагоз, иӡааҟәрылоз аӷбақәа ирҭаз амшынуаа дрыцхараауан, ииашамкәа абахҭа иҭакыз рҭыжьра алиршон.

Убасала, ацқьа Никәала Аџьашьахәрҿиаҩы иҟаиҵаз аџьашьахәқәа иреиуоуп иара ауаҩы хҩык иԥҳацәа хаҵа рышьҭраҿы дышицхрааз. Уи атәы зҳәо ажәабжь ыҟоуп. Аб Виссарион ишеиҭаиҳәаз ала, ацқьа игәылара дынхон хаҵак, уи иԥҳацәа ишахәҭоу ала разҟыла реиқәыршәаразы алшара имаӡамызт. Даара игәнигон иара уи.

«Иԥҳацәа хаҵа рышьҭра аамҭа анааи, иара иҟаиҵарыз изымдыруа, аԥара ахьииԥшаарыз  дақәымшәо дықәхеит.  Ацқьа Никәала иакәзар, иара усҟан Анцәа ихьӡала хра злоу аусқәа рымҩаԥгара даҿын. Иҟалаз ахҭыс атәы аниаҳа маӡала ахаҵа иҩны аԥенџьыр ала иаҭахыз аԥара зҭаз амакәан ҩнаижьит. Егьи ари аԥара аниба даара деигәарӷьеит. Убас ацқьа Никәала арҭ ауаа дрыцхрааит. Иара дзыцхырааз ауаҩы ари ҟазҵаз анеиликаа, дындәылҵын Никәала Аџьашьахәрҿиаҩы иҿаԥхьа дшьамхышгылеит».

Иазгәарҭоит, ацқьа Николаи 325 шықәсазы Никеиа ақалақь аҿы имҩаԥысыз Актәи Адунеизегьтәи Иреиҳаӡоу Ақьырсиан-динмаҵзуҩцәа Реизара далахәын ҳәа.  

Уажәы Кьырсатәи Ачгара иахьаамҭоу инамаданы, аб Виссарион зегьы ирабжьеигоит русқәа, рыгәҭакқа, рыкрыфара аҿы излауа ала аҽынкылара аадырԥшларц.

«Инагӡаны еилышәкарц сҭахуп абри зегьы заҭаху. Аԥсҭазаара аԥсрала инҵәаӡом, аԥсҭазаара – ари аԥсра злалаго ауп, аԥсра акәзар – уи иҿыцу аԥсҭазаара алагара ауп. Џьанаҭ гыларҭас иҳаурц ҳҭахызар, ацқьа Николаи Аџьашьахәрҿиаҩы ишыҟаиҵоз еиԥш иԥшьоу аԥҟарақәа зегьы ҳрықәныҟәалароуп», –  ҳәа еиҭеиҳәеит иара.

Ацқьа Никәала Аџьашьахәрҿиаҩы диит 270 шықәсазы ликииатәи ақалақь Патара аҿы. Усҟан уи бырзентәи акалониа акәын. Иахьа уи ҭырқәтәылатәи апровинциақәа Анталиеи Муглеи рҵакырақәа роуп, Патара ахьыҟаз ҳәа ишырыԥхьаӡо Гелемиш аҳабла аҿы ауп. Аԥшьаҩы Никәала иԥсҭазаара далҵит акыр иқәрахь днеихьаны 4-тәи ашәышықәса аҽеиҩшамҭазы.  Раԥхьатәи аамҭақәа рзы ацқьа имбаауа ицәеижьхәҭақәа  ақалақь Мира Ликиатәи акафедралтә уахәамаҿы ишьҭан. Аха 1087 шықәсазы урҭ рыхәҭак италиатәи ақалақь Бари (Италиа), ацқьа Сҭефан ихьӡала иргылоу ауахәама ахь ииаган.