Аҟәа. Ԥхынҷкәынмза 19, 2023 шықәса. Аԥсныпресс. Ԥхынҷкәынмза 19 рзы Аԥсны Жәлар Реизара-Апарламент аделегациа Ҭырқәтәылаҟа аусуратә визит амҩаԥгара аҳәаақәа ирҭагӡаны, имҩаԥысит аԥснытәи адипломатиатә корпуси аделгациа ахаҭарнакцәеи русуратә еиԥылара, ҳәа адырра ҟанаҵоит Жәлар Реизара-Апарламент апресс-маҵзура.
Аилацәажәара аан Ҭырқәтәыла иҟоу азинмчы змоу Аԥсны ахаҭарнак Ибрахим Аҩӡба адепутатцәа Ахаҭарнакра аусура ихадоу ахырхарҭақәа рзы адырра риҭеит. Ҭырқәтәыла иҟоу Аԥсны адипломатиатә миссиа ихадоу ахыдҵақәа иреиуоуп адиаспора аҩныҵҟа аимадарақәа рырӷәӷәара, иара убас аҭоурыхтә Ԥсадгьыли адиаспореи реизааигатәра иазку ауснагӡатәқәа рымҩаԥгара, аџьынџьуаа рконсультә маҵзура анагӡара, адәныҟаполитикатә инициативақәа рынагӡареи ганрацәала Аԥсны азы ииашоу аинформациа Ҭырқәтәыла аларҵәареи.
Аԥсны Апарламентә делегациа иалоуп Рашида Аиба, Венори Бебиа, Баҭал Џьопуа, Нарсоу Салаҟаиа, Демур Гогиа, Инар Гыцба. Аделегациа иацуп арепатриациа азы аҳәынҭқарратә Еилакы ахантәаҩы Вадим Ҳаразиа, Аҳәынҭеилакы азинтә ҟәша аиҳабы Аслан Сангәлиа, арепатриациа Афонд анапхгаҩы Енвер Чамагәуа.
Адепутатцәа иԥылеит аԥсуа культуратә центрқәа Рфедерациа ахантәаҩы Левент Аҭрышба.
Аиԥылараҿы адиаспора аҩныҵҟа аԥсуа бызшәа аҵара, аетнокультуратә хәдуқәа, атрадициақәа, аҵасқәа, ақьабзқәа реиқәырхареи рырҿиареи, уҳәа азы иахәҭоу аҭагылазаашьақәа раԥҵара иазку апроектқәа рынагӡара азҵаарақәа рзы ргәаанагарақәа еибырҳәеит.
Аԥснытәи аделегациа аҭаара апрограмма иазԥхьагәанаҭоит иара убас аԥсуа-база жәлар рдиаспора ахаҭарнакцәа иааизакны иахьықәынхо ақыҭақәеи аиланхарҭа ҭыԥқәеи рҭаара.
Аԥснытәи аделегациа Ҭырқәтәылатәи Ареспублика аҭаара хыркәшахоит ԥхынҷкәынмза 21 азы.
