Аҟәа. Ԥхынҷкәынмза 19, 2023 шықәса. Аԥсныпресс. Атәыла аҩныҵҟатәии адәныҟатәи аполитика иадҳәалоу актуалра злоу азҵаарақәа ирызкын ԥхынҷкәынмза 19 рзы Аҳәынҭқарра Ахада Аслан Бжьаниа имҩаԥигаз аилатәара, ҳәа адырра ҟанаҵоит Аҳәынҭқарра Ахада ипресс-маҵзура. Аилатәара иалахәын аҭыԥантәи Ахадарақәа рхадацәеи Аԥсны иҟоу Урыстәыла Ацҳаражәҳәарҭа ахаҭарнакцәеи.
Аҳәынҭқарра Ахада ҷыдала ахшыҩзышьҭра аиҭеит хәажәкырамза 17, 2024 шықәсазы имҩаԥысраны иҟоу Урыстәылатәи Афедерациа Ахада иалхрақәа Аԥсны рымҩаԥгаразы аҽазыҟаҵарақәа.
«Ари аҩыза акрызҵазкуа ахҭыс ибзианы ҳҽазыҟаҳҵароуп, Аԥсны Аҳәынҭқарраҿы инхо Урыстәыла атәылауаа излауала ирацәаны ралахәра еиҿаҳкаароуп», - ҳәа иҳәеит Аслан Бжьаниа.
Аҳәынҭқарра Ахада атәыла аԥыза-министр Алеқандр Анқәаб, Аҳәынҭқарра Ахада Иусбарҭа анапхгаҩы Абесалом Кәарҷиа адҵа риҭеит Аԥсны инхо Урыстәыла атәылауаа зегьы абжьыҭира иалахәхаразы алшарақәа рзаԥҵазарц.
Иарбоу аусмҩаԥгатәқәа Аԥсны иҟоу Урыстәылатәи Афедерациа Ацҳаражәҳәарҭа аус ацурала имҩаԥысроуп.
Аслан Бжьания дырҩегьых инаҵшьны иазгәеиҭеит иарбоу ахҭыс иаҵоу аҵакы ахадара, уи Аԥсны жәлар Урыстәыла Ахада Владимир Путин даара ҳаҭыр-пату шиқәырҵо иҳәеит, насгьы уи икандидатура иадгыло акы ишырацәо азы агәрагара ааирԥшит.
