«Иахьа аӡәыр ргәы иабозар ҟалап ари ахьыԥхьаӡара акыр идууп ҳәа, аха уи ус акәӡам. Аибашьра ҟалаанӡа Аԥсны иахьаҵанакуаз иҟан ԥшьышә нызықь рҟынӡа амаамын, Аҟәа мацара –  урҭ рхыԥхьаӡара зқьи бжаки рҟынӡа инаӡон.  Аибашьра анҵәара амш азы иаанхаз амаамынқәа рхыԥхьаӡара 100 маҷк инацҵаны рҟынӡа инаӡон. Хәыҷы-хәыҷла ҳара урҭ рхыԥхьаӡара ԥшьынтә аизырҳара ҳалҳаршеит», – ҳәа иҳәеит Аинститут адиректор.

Зураб Миквабиа иажәақәа рыла,  амаамынқәа рыфатәзша аӡынразы аиҳарак изыдҳәалоу ари аамҭазы иҟоу ашәырқәеи ауҭраҭыхқәеи роуп. Иаагозар, аԥхынра, еиҳарак ирацәоуп аиаҵәара, еиуеиԥшым ауҭраҭыхқәа, аӡынра акәзар – ацитрустә шәырқәеи аҵәақәеи.  

Амаамынқәа аӡынра лассы-лассы ичмазаҩхалома ҳәа азҵаара аҭак ҟаҵо, Зураб Миквабиа иҳәеит: «Мап, урҭ ус лассы-ласы ичмазаҩхаӡом. Аха иҳаҩсыз аӡынразы лассы-лассы алашара ахьдырцәоз иахҟьаны ҩ-маамынк ҳцәыԥсгәышьеит».

Зураб Миквабиа Аинститут анаукатә усурагьы дазааҭгылеит.

«Н. Ф. Гамалеи ихьӡ зху аепидемиологиеи амикробиологиеи рзы Амилаҭтә ҭҵаарадыратә Центри (ақ. Москва) ҳареи аусеицура бзиа ҳабжьоуп.  Н. Ф. Гамалеи ихьӡ зху Аинститут аҟынтәи ҩ-лабораториак араҟа ҳара ҳҿы аус ауеит. Лабораториаки ҳареи аусеицура ҳабжьоуижьҭеи абар шьҭа 10 шықәса ҵуеит.  Ҳара аимҳәаршә аҟынтәи авакцина аус адулара ҳаҿуп. Аҩбатәи алабораториеи ҳареи аапкра аҟынтәи авакцина аԥҵара иазку аусура мҩаԥаагоит. Ҳара иара убас иҿыцу аусура атема ҳазцәырҵит, уи Анаука-ҭыжьратә Еидгылара «Радий» (ақ. Москва) алархәны инаҳагӡоит. Ҳара зшьамҩангагатә системаҿы, згәаҵәа аҿы апаталогиақәа аарԥшу амаамынқәа алаҳхит. Урҭ ҷыдала, иҿыцу атехнологиақәа рыла иаарыху аҵәақәа рҿаҳҵоит. Раԥхьатәи алҵшәақәа ақәҿиарақәа рыҟаларазы уақәдыргәыӷуеит.  Ари аексперимент абар хымчыбжь ирылагӡаны имҩаԥысуеит, ҳара реалла хра злоу алҵшәақәа аабоит.

Зураб Миквабиа иажәақәа рыла, Аексперименталтә паталогиеи атерапиеи Ринститути Германиатәи аспециалистцәеи уаанӡа аусеицура рыбжьан. «Аха, асанкциақәеи, Аԥсны хәҭакахьала мацара азхаҵареи инарымаданы, аимадара еиԥҟьахеит.

Ааигәа ҳара иазгәаҳҭон Аинститут 95-шықәса ахыҵра. Егьырҭ атәылақәа рҟынтәи аҵарауаа адныҳәаларатә телеграммақәа ҳзаарышьҭит, иагьырҳәеит урҭ Аԥсныҟа аара шрабжьарымго ҳәа», - ҳәа иҳәеит Зураб Миквабиа.

Аинститут адиректор иазгәеиҭеит дара ирымоу афинансркра шазымхо.

«Ҳара иаҳзоужьхо аԥаратә хархәагақәа зегьы аусзуҩцәа руалафахәы рызшәареи амаамынқәа рыфатә адгалареи афымцамч ахәԥса ашәареи рзы иныххоит. Анаукатә усура акәзар, араҟа афинансқәа рзоужьра аганахьла ауадаҩрақәа ыҟоуп. Шәара ҳара ҳахь шәанхалоз ижәбазар ҟалап амҩа зеиԥшроу. Ҳара ԥшьы-шықәса ирылагӡаны аинстанциақәа зегьы ҳрыдҵаалахьеит, аҳәара ҟаҳҵеит Аҳәынҭқарра Ахада иахь, атәыла аԥыза-министр иахь, ацхыраара ҳақәдыргәыӷит, аха макьаназы аус еиҭаҵшьа амоуӡацт. Аекскурсиақәа рымҩаԥгарала ҳара иҳарҳауа аԥарақәа зегьы ишиашоу иҷыдоу асчиот иахыԥхьаӡалахоит, урҭ статиацыԥхьаӡа еихшахоит. Ҳара арҭ аԥарақәа  еихшаны аԥстәқәа рыфатә ааҳхәоит, акоммуналтә маҵзурақәа рыхә ҳшәоит, ареактивқәа ааҳхәоит. Ҳвольерқәа рӷьырак аиҭашьақәыргылара рҭахны иҟоуп, аха ҳара уи азы иҳамоу аԥаратә хархәагақәа ҳазхаӡом». 

Аҟәатәи амаамынқәа рааӡарҭа аԥҵан 1927 – тәи ашықәс азы. Апитомник иаҵанакит ахирург, атәылаҿацәҭҵааҩы, апрофессор А.А. Остроумов ԥыхьатәи инхарҭа. 1958 шықәсазы апитомник абазаҿы иаԥҵан аексперименталтә паталогиеи атерапиеи рзы анаука-ҭҵааратә Институт.